30 agns di politiche linguistiche pal furlan

30 agns indaûr, cu la Leç Regjonâl 15, si po dî che e tacave pardabon la politiche linguistiche a pro de lenghe furlane: nol è che prime no si fasès nuie, ma al mancjave il nivel di planificazion puartade indenant dal ent public.

In chescj ultins trente agns no si è lâts indenant drets, ma a ondis e ancje a cessecûl.

Cundut che l'OLF nol ves autonomie di belanç e che al ves a ce fâ cu lis codis des polemichis su lis grafiis e des zelosiis tra clapis e cuntun mont inteletuâl che al jere dispès antifurlan, si pues dî che chel prin organisim di politiche linguistiche al vedi fat miracui.

Dopo e je rivade la ARLeF che e à stentât a partî, ancje parcè che masse politics a vevin cirût di fâle jessi plui un imprest tes lôr mans, che no un imprest pe lenghe furlane.
E à funzionât une vore ben cuant che al è stât president Lorenzo Fabbro, diretôr Massim Duche, ancje parcè che il president de regjon Illy e l'assessôr Antonaz i tignivin e dongje e veve ancje il Servizi Regjonâl cun diretôr Marco Stolfo.

Dopo, cun president Lorenzo Zanon e diretôr William Cisilino si è fermât dut par agns: il president de regjon Tondo al jere antifurlan declarât e i assessôrs di riferiment (Molinaro prime e De Anna dopo) a vevin o une posizion debile inte zonte o pocje competence tal setôr. No dome si è fermât dut ma il diretôr William Cisilino al à tacât a lavorâ in maniere sistematiche par indebilî la struture e comandâ dut lui: la prime robe al à trasformât il Comitât Tecnic Sientific intun orghin consultîf e no plui decisionâl.

Dopo cu la zonte Serracchiani lis robis a son ladis pôc miôr: al è tornât president de ARLeF Lorenzo Fabbro che al à cirût di tornâ a inviâ lis robis, ma al è rivât a concretizâ pôc e nuie, parcè che la zonte e in particolâr l'assessôr Torrenti i blocavin sù dut. Al à podût dome imbastî e semenâ, e par dî al veretât al à fat ancje cualchi erôr.

Finide chê dade e je tacade la ete di Fedriga president de regjon, Roberti assessôr, Eros Cisilino president de ARLeF e simpri William Cisilino diretôr: pe prime legjislature lis robis no son ladis mâl. Ae zonte i interessave cussì pôc dal furlan e e veve cussì tancj bêçs che e lassave che la ARLeF e fasès un pôc ce che e voleve: cussì si à podût lavorâ pardabon tes iniziativis imbastidis cu la gjestion prime e si à ancje tacât alc di gnûf (e par dî la veretât si à ancje pierdût robis che al sarès stât miôr puartâ indenant e si à ancje butât vie bêçs in progjets cence sintiment).

Tai ultins agns e je sucedude la catastrofe che o viodìn ancje vuê: l'assessôr Roberti al à tacât a meti pardabon il bec, cu la sô ande autoritarie, i Cisilins a àn fat deventâ la ARLeF une istituzion par promovi se stesse e i siei sorestants, no la lenghe furlane. La propagande false e bausarie e je deventade la carateristiche fondamentâl de comunicazion, dongje des stupidagjinis che a butin jù il status de lenghe. Chei che a lavorin pardabon pe lenghe furlane a vegnin viodûts come rivâi pericolôs di ricatâ, di sotanâ o di eliminâ.

Chest al è un pôc cemût che le viôt jo, ma joibe ai 25 di Jugn si podarà sintî ce che a pensin Sergio Cecotti, Lorenzo Fabbro, Stefania Garlatti-Costa e Massimo Moretuzzo.

LAGER FVG

 

I numars dal “gjenocidi” e il conflit linguistic

O tachi chest scrit cun dâts statistics uficiâi, cjapâts sù in chestis ricercjis di sociolinguistiche:

1977: ricercje dal ISIG;

1998: ricercje dal CIRF, paiade dal OLF;

2014: ricercje dal de Uniud - Dipartiment di Siencis Umanis paiade de ARLeF;

2023: ricercje IRES / FEF paiade de ARLeF.

Locutôrs regolârs

1977: 77%

1998: 57,2%

2014: 47,6%

2023: 33,5%

Locutôrs ocasionâi

1998: 20%

2014: 19,9%

2023: 19%

In numars

2014: locutôrs regolârs (420.000) + ocasionâi (180.000) = 600.000

2023: locutôrs regolârs (282.000) + ocasionâi (162.000) = 444.000

A son numars che no ur coventin tancj coments: la pierdite di plui di 150.000 locutôrs in mancul di 10 agns (plui di 1/4 dal totâl) si pues definî cence fastidis “gjenocidi linguistic” o “stermini linguistic”.

Lis lenghis no muerin di bessolis, par sparî a àn bisugne o di fats catastrofics che a scancelin o che a savoltin la comunitât che lis fevele, o a son vitimis di un procès ben cognossût e studiât che si clame sostituzion linguistiche: cheste seconde definizion e je chê che e descrîf ben ce che al è sucedût e ce che al va indenant a sucedi in Friûl.

Il sisteme di podê nazionalist talian al à decidût (za plui di 150 agns indaûr e cun confermis e inerziis che a rivin fin in dì di vuê) di fâ sparî la lenghe furlane e di fâ che in Friûl si feveli dome talian. Si à di jessi clârs: il conflit nol è tra lenghis, lis lenghis a puedin simpri vivi insiemi e il talian nol è nemì dal furlan, il conflit al è di sisteme di podê.

In Friûl il conflit linguistic al à pardabon lis proporzions di un gjenocidi.

E je vere che no son copaments, torturis e violencis fisichis, no si fâs murî di fam lis personis, ma la eliminazion progressive de lenghe furlane e reste un crimin cuintri dai furlans e di dute la umanitât, parcè che une lenghe e je un patrimoni no dome di chei che le fevelin, ma di ducj.

Za agns indaûr o vevi scrit di cheste dinamiche plui in lunc, no torni a dî chês stessis robis (se us interesse leiêt ca).

Cjamp di stermini linguistic

O passi al resonament che al fâs nassi il titul di chest scrit: un dai sistemis di stermini plui cognossûts, rapresentâts e presints tal imagjinari coletîf al è chel dal Lager e o viodìn che tantis dinamichis a tornin in paralêl ancje tal nestri câs di stermini “dome” linguistic.

Cemût mai milions di personis in Europe, che a jerin une vore di plui dai lôr vuardians, si son lassadis puartâ tai cjamps di stermini e si son lassadis sassinâ cence nancje lotâ?

Prin di dut parcè che in ogni câs chei milions di personis a jerin une piçule minorance intun sisteme maioritari une vore plui fuart di lôr e po parcè che no je stade fate une sole azion militâr cuntun front e doi esercits, dulà che si podeve ancje pierdi e jessi sterminâts, ma dulà che e jere une lote. A son stâts gjavâts dirits un pôc par volte, dant ai individuis la impression che vivi simpri piês, ma cualchi moment in plui, al sarès stât miôr che no jessi copâts daurman (robe che in ogni câs e podeve sucedi in cualsisei moment). Al è stât staronzât e po gjavât il dirit al lavôr, po ae cjase, po ae proprietât personâl, po a vivi dongje cun chei de stesse famee, a vê un non, a mangjâ ce che al bastave par vivi, infin e je stade gjavade la pussibilitât di vivi par plui di cualchi setemane, se e leve ben.

Ae lenghe furlane i è stât gjavât il dirit di jessi doprade tai puescj di podê, te scuele, te glesie, infin, par vie di dutis chês altris pressions, ancje te famee: al è chest procès sistematic che le puarte a sparî, nuie altri.

Ma un altri element impuartant dal Lager al jere il sisteme di colaborazionisim, fam, pericul e isolament.

Une figure clâf intal Lager al jere il Kapò: un presonîr privilegjât, pal solit sielt tra i criminâi comuns. Il Kapò al veve plui mangjâ e altris vantaçs e al veve podê assolût sui presonîrs dal so bloc: par tignî la sô posizion al spiave, al torturave, al copave a discrezion, judant i vuardians a mantignî il lôr sisteme di podê. Dispès al jere fintremai plui odeât des SS. Al è clâr che in cheste fase dal stermini de lenghe furlane la part dal Kapò le fâs la ARLeF.

Lis associazions furlanistis invezit a son i presonîrs: smagrîts, spaurîts, anemics, a puedin vê la tentazion di vendisi par un toc di pan, a puedin acetâ umiliazions, a puedin ancje colaborâ cence nancje rindisi cont. Par esempli partecipant a incuintris di comissions che a son dome une justificazion legâl pai sorestants dal cjamp, o domandant par plasê di comedâ cualchi virgule intun Plan Gjenerâl di Politiche Linguistiche che nol segne nissun obietîf positîf pe lenghe furlane, che nol impegne la Regjon a fâ nuie di bon, che al vignarà doprât dome par vê un imprest di prepotence in plui cuintri di chei che pal furlan a lavorin pardabon.

Podê e fuarce, vite e muart

Tal 1945 i cjars armâts sovietics e aleâts a àn podût liberâ un pôcs di presonîrs dai Lager, chei plui fortunâts.

Tal secul XXI nol sarà nissun “cjar armât” che al liberarà la lenghe furlane dal sisteme di estinzion dulà che le àn butade: dome i furlans a puedin liberâle e nudrîle e prime di dut lis associazions furlanistis.

Che si rindin cont che il Kapò dal bloc o in câs ancje il Lagerkommandant a àn il podê, ma al è un podê miserabil, e che a àn ancje pôre, parcè che a àn podê, ma no àn nissune fuarce.

Rindìnsi cont che la vere fuarce di fâ alc pe lenghe furlane le vin noaltris, e o vin di doprâle cuintri di chest sisteme criminâl.

La alternative e je acetâ une porzion simpri plui misare di pan neri e sec, ubidî a lis regulis che a son studiadis par fânus sparî, lassâsi mangjâ dai pedoi e murî se no vuê, doman o passantdoman, cence vê plui nancje la dignitât di personis e il nestri non.

"Puartebandieris" di ce e di cui?

Dopo doi agns che al è fûr o fâs cualchi coment (o miôr o torni a fâlu) a "Marcho, l'ultima bandiera". Chest docufilm al conte la storie di Marc di Murùs, ultin puartebandiere furlan, decapitât dai invasôrs venezians tal 1421: une figure storiche che e jere stade tirade fûr de dismentie scuasi trente agns indaûr de Academie dal Friûl, cun studis e interpretazions di Albert Travain, Carli Pup, Massim Duche e Marc Just.

No voi a tocjâ ni i aspiets cinematografics ni storics di chest lavôr, che in gjenerâl al è stât preseât, ma i aspiets di politiche linguistiche. Di fat “Marcho. L'ultima bandiera” al è coprodusût de Agjenzie Regjonâl pe Lenghe Furlane, cuntune spese avonde impuartante, e i aspiets linguistics a son salacor chei plui problematics di chest docufilm.

Intal complès al è un prodot pensât pal public di lenghe taliane, dutis lis scritis a son par talian, la vôs fûr di cjamp che e conte i fats e je par talian, ducj i esperts intervistâts a fevelin dome par talian.

E je però une presince de lenghe furlane, sottitulade par talian, tes senis di finzion, in bocje dome a cualchi personaç: Marc di Murùs, chei de sô famee, altris nobii furlans e il patriarcje Bertrant. Al è un furlan contemporani avonde coret, li che a son stâts insedâts elements arcaics (in particolâr i articui in espressions tant che “lu patriarcje” e “ju nestris bens”); te interpretazion dal patriarcje Bertrant l'atôr al recite par furlan cun acent francês. Ducj chei altris personaçs de finzion, che a sedin il dôs di Vignesie, il patriarcje Luduì di Teck, il re di Ongjarie, o cualsisei cjapitani, no fevelin in chês che a vevin di jessi lis lôr lenghis o varietâts, ma a fevelin par talian standard contemporani.

In struc no je une preocupazion di riproduzion filologjiche des lenghis di chê situazion storiche, che e sarès une vore dificile, ma un incalm dal furlan, intun complès che al è dal dut talian.

Efiets di politiche linguistiche

Stant che la ARLeF e à competencis di politiche linguistiche e no di poie gjeneriche ai documentaris storics par talian, ancje se a àn argoment che al tocje il Friûl, al è in sostance impropri che la ARLeF e vedi coprodusût “Marcho. L'ultima bandiera”.

La justificazion a cheste coproduzion e je la presince dal furlan in cualchi sene di finzion, cemût che o vin viodût parsore: ma ce efiets comunicatîfs e sociolinguistics vegnino fûr di une opare dal gjenar?

Un prin efiet al è che il public talian al à un contat cu la lenghe furlane: se nol saveve za, al savarà che la lenghe furlane e esist, o almancul e esisteve tal Cuatricent. Nol è un mâl.

I efiets sociolinguistics in Friûl, invezit, a son negatîfs.

I furlans, soredut i fruts che a vivin in Friûl, ta chest docufilm a viodin che il furlan lu fevelave dome Marc di Morùs e pôcs altris, e che invezit venezians, todescs, in sumis ducj chei altris, a fevelin talian: ce che si comuniche al è che il talian standard di vuê al è la lenghe normâl, e che magari za tal Cuatricent al jere la lenghe assolude; il furlan invezit nol à di jessi normâl, al è un alc di carateristic, un pôc miôr di un element folcloristic come il kilt scozês o lis plumis tal cjâf dai indians di Americhe, ma no tant miôr.

Soredut parcè che il public furlan al viôt ancje che i esperts furlans, tant che Gianfranco Ellero e Alberto Travain, cundut che a sepin furlan miôr di me, a fevelin par talian. Fintremai William Cisilino, diretôr de ARLeF, in chest docufilm al fevele par talian. Pardabon no podevino fevelâ par furlan?

La interpretazion dal public e sarà clare: il furlan al è alc che vuê nol dopre nissun, nancje i studiôs furlans, nancje chei che a disin di jessi furlaniscj, nancje il diretôr dal ent regjonâl che al varès di lavorâ pal ben de lenghe furlane.

Al è in contrast cun ducj chei che a saressin i obietîfs declarâts de politiche linguistiche pe lenghe furlane: cirî di fâ in maniere che il furlan al sedi une lenghe normâl, che e sedi fevelade no dome a nivel di famee (li che si fevele simpri di mancul) o popolâr, ma ancje a nivel alt e istituzionâl.

E je stade une sielte, cussiente o incussiente, che e fâs une vore di dam e che no jere la sole che si podeve fâ. Al baste viodi altris produzions dai ultins agns, fasint dome trê esemplis (a podaressin jessi di plui) di documentaris. "Friûl: viaç te storie", di Massimo Garlatti-Costa, documentari storic, ancje cun cualchi sene di finzion, al è dut par furlan. "Ces guerriers de la nuit, sur les traces des benandanti" de regjste francese di pari furlan Christiane Rorato, al jere stât produsût in plui lenghis e al lassave a ogni intervistât la libertât di fevelâ te sô lenghe, ancje par furlan. "Rumore bianco", documentari dedicât al Tiliment dal regjist Alberto Fasulo, al trate lis lenghis tant che elements naturâi leâts ae presince umane e in maniere naturâl al da spazi al furlan come a chês altris lenghis feveladis di cui che vîf cul flum.

Il fat al è che tra i responsabii de ARLeF di vuê nol è cui che al resoni in tiermins di consecuencis positivis su la lenghe furlane: il ben de lenghe furlane nol è l'obietîf de politiche linguistiche regjonâl; la lenghe furlane, pe politiche linguistiche regjonâl, e je un imprest di doprâ, ancje vuastantlu, par rivâ a altris fins.

Une cuistion etiche

Tal mont di vuê al somee normâl che politics e aministradôrs a doprin bêçs publics par fâ promozion di se stes: o resti de idee che i bêçs publics a van doprâts pal interès public e no pe promozion di part o personâl. E je une cuistion etiche.

Il diretôr de ARLeF ai 31 di Mai dal 2023 al firmave l'afidament a Arte Video dal servizi di realizazion in coproduzion di “Marcho. L'ultima bandiera”: la spese di chel afidament e je stade di € 81.967,20 nets.

Tai titui dal docufilm nol risulte dome che la ARLeF e sedi coprodutore o sponsor (cemût che al sarès logjic), al ven fûr il non e cognon dal diretôr William Cisilino tant che coautôr dal sogjet e po ancje tant che coprodutôr. Cun di plui il diretôr de ARLeF al ven fûr ancje intes ripresis fevelant di elements di storie dal Patriarciât: al è dome lui tra ducj i intervistâts (Franco Cardini, Flavia Maria De Vitt, Gianfranco Ellero, Alberto Travain) a fevelâ di storie cence jessi un storic.

Isal etic? La mê rispueste e je: no, nol è etic, al è profitâ de gjestion di bêçs publics par cjapâsi merits personâi, ancje tignint in cont che il diretôr al varès di vê dome incjariis di funzionari, la rapresentance istituzionâl de ARLeF i tocje al president.

Programma di riforma della Regione Autocrate Fedriga Venezia Giulia

 

O soi vignût a savê di chest program, pal moment classificât come “risiervât” (ma nancje tant), e lu publichi.

Programma di riforma della Regione Autocrate Fedriga Venezia Giulia.

Punto 1 - Denominazione della Regione

a) Considerato che l'attuale denominazione della Regione risulta anacronistica e divisiva, la nuova denominazione è ufficialmente “Regione Autocrate Fedriga Venezia Giulia”.

Il territorio regionale si articola in:

• la Città: corrispondente alla città di Trieste e a tutte le strutture ad essa utili, ovunque esse si trovino;

• i Territori Costieri della Venezia Giulia, che comprendono una fascia di costa che entra in terraferma per 20 km, dalla foce del Tagliamento alle Bocche di Cattaro;

• l'Entroterra della Venezia Giulia, che comprende tutti gli altri territori della Regione, all'interno o all'esterno dei confini della Repubblica Italiana, a discrezione del Presidente della Regione.

b) Onde ottimizzare il funzionamento della gestione delle risorse pubbliche e ridurre le spese amministrative:

• i Territori Costieri della Venezia Giulia godono di riconoscimento geografico, ma dipendono amministrativamente dalla Città;

• l'Entroterra della Venezia Giulia, per questioni di livello superiore al quello comunale, dipende dall'amministrazione diretta del Presidente della Regione Autocrate.

Punto 2 - Mandati del Presidente

Considerato che non sono permessi più di due mandati consecutivi nella carica di Presidente della Regione Autocrate, si ratifica la limitazione di numero di mandati a due, il secondo dei quali vitalizio.

Punto 3 - Autonomie locali e democrazia interna

La Regione Autocrate Fedriga Venezia Giulia dichiara in tutte le occasioni di rispettare e adottare i valori della Democrazia, al fine di evitare inutili critiche, e li applica nelle seguenti forme alle Autonomie locali:

Regione

a) essendo il secondo mandato presidenziale di carattere vitalizio, gli elettori sono chiamati alle urne solo in caso di fine del primo mandato o di decesso del Presidente in carica;

b) per garantire la stabilità di governo, la campagna elettorale del Presidente in scadenza alla fine del primo mandato è pagata dalle casse regionali, voce “Fondo per la Democrazia e la Partecipazione”; a candidati alternativi al presidente in carica è consentito presentarsi alle elezioni, ma non svolgere attività di campagna elettorale, poiché ciò turberebbe la serenità democratica della popolazione;

c) in caso di decesso del Presidente della Regione l'unico candidato a cui sarà permesso svolgere campagna elettorale, a spese della Regione, sarà:

• il migliore amico del Presidente deceduto, o in sua assenza

• l'amante principale del Presidente deceduto, o in sua assenza

• la vedova/il vedovo del Presidente deceduto, o in sua assenza

• persona designata dal Presidente del Consiglio dei Ministri della Repubblica Italiana.

d) Incentivo alla partecipazione: a chi avrà adempiuto al proprio diritto/dovere di votare il Presidente della Regione Autocrate, e che avrà correttamente votato il candidato sostenuto dal “Fondo per la Democrazia e la Partecipazione” verrà regalato dal presidente di seggio elettorale un lecca-lecca a forma di logo di “Io sono Fedriga Venezia Giulia”.

Comuni

e) la democrazia e le libere elezioni sono garantite anche a livello comunale;

f) è prevista la candidatura alla carica di Sindaco di persona di fiducia del Presidente della Regione Autocrate Fedriga Venezia Giulia, debitamente finanziata dal “Fondo per la Democrazia e la Partecipazione”;

g) è permessa altresì la candidatura di aspiranti Sindaco alternativi alla persona di fiducia del Presidente della Regione Autocrate Fedriga Venezia Giulia;

h) in caso di logica vittoria del candidato sostenuto dal Presidente della Regione Autocrate e dal “Fondo per la Democrazia e la Partecipazione, il Comune dispone stanziamenti regionali a sostegno di tutte le attività più inutili (o in caso dannose) individuate dal Sindaco entrato in carica. In caso di inattesa vittoria del candidato alternativo, tutte le spese comunali vengono sostenute con rivalsa sul patrimonio personale del Sindaco, degli Assessori e dei Consiglieri comunali di maggioranza.

Punto 4 - Lingue minoritarie, identità locale, cultura

a) La presenza indesiderata di lingue minoritarie (fr.....no, slavo, germatodescruccofono) è il fondamento della specialità regionale: di conseguenza è missione primaria della Regione Autocrate applicare la specialità con sistematico e determinato impegno al fine di eliminare tale indesiderata presenza.

b) Fino al raggiungimento dell'obiettivo di cui al punto precedente, le azioni indirizzate alle lingue indesiderate vengono svolte con le seguenti priorità:

• massimizzare il danno;

• fare da volano all'inerzia storica di ghettizzazione, ridicolizzazione e sostituzione linguistica;

• creare prodotti scadenti concorrenziali a eventuali prodotti utili;

• favorire l'indebitamento e la chiusura di eventuali realtà impegnate per l'assurda sopravvivenza delle lingue indesiderate;

• esasperare la complicazione burocratica e l'arbitrio di figure chiave che si distinguano per incompetenza e squilibrio mentale.

c) Nelle more dell'applicazione dei punti a) e b) si sconsiglia di usare il sostantivo paleogeografico “Fr...i” e il sostantivo aggettivo indesiderato “fr...ano”

d) Si sostiene la creazione di un'orgogliosa identità “Io sono Fedriga Venezia Giulia” i cui contenuti esclusivi devono essere:

• il tricolore italiano; 

• la scritta “Io sono Fedriga Venezia Giulia” eventualmente abbreviata in "Io sono FVG";

• prodotti di merchandising di pessimo gusto e lecca-lecca “Io sono Fedriga Venezia Giulia” al solo gusto zucchero;

e) Ai fini di sostenere e completare il punto d) una volta raggiunti gli obiettivi dei punti a) e b):

• in una prima fase: sarà proibito parlare, scrivere e pensare in fr...no, slavo e germatodescruccofono

• in una seconda fase: sarà proibito parlare, scrivere e pensare.

Cjacaris e risultâts

Il Colloquium retoromanistich al è une ocasion, che e cole une volte ogni trê agns, par cjatâsi tra furlans, ladins des Dolomitis e rumançs. 

Cheste volte al è stât a Gurize, inmaneât de SFF dai 20 ai 22 di Novembar.

Al jere previodût il salût dal president de ARLeF, Eros Cisilino, che no si è fat viodi.

Al jere in program un intervent dal diretôr de ARLeF William Cisilino, parcè che si veve notât lui. La dì prime al à visât che nol sarès vignût e al à mandât un dipendent a fâ la biele figure di presentâ la sô relazion: une relazion dulà che si fevelave dai elements previodûts des normis e dai plans plurienâi come se par magjie a fossin ducj metûts in vore.

Ae fin de relazion mi soi permetût di cjapâ la peraule e fâ la liste dai risultâts reâi.

La plateforme "plui potente"

 La Arlef si dîs di bessole che https://supedizionari.arlef.it al è la plateforme plui potente su la lenghe furlane.

Declarazions dal gjenar mi somein un tic fûr di lûc: a san plui di propagande eletorâl che no di un ent che al varès di lavorâ pardabon pe promozion de lenghe furlane e no pe promozion di se stes o de sô plateforme.

A son passe 25 agns che o lavori tai dizionaris e o fâs fadie a pensâ cun ce criteris che si puedi definî la "potence" di un imprest lessicografic.

In dut câs, di plateformis di cheste sorte (cun plui dizionaris furlans dentri) cumò mi pâr che a 'nd è dome dôs, alore almancul nol sarà di lavorâ masse a fâ il confront: di une bande https://supedizionari.arlef.it e di chê altre "Imprescj pe lenghe furlane" tal sît https://lenghefurlane.eu

Provìn a cirî propit il leme "lessicografic":

Tal Superdizionari mi disin che e je une peraule che no esist! Mi vessino dite che no le àn te base di dâts, ma no, propit no esist.

Ise po propit vere? In Imprescj pe Lenghe Furlane sì che al è, no dome, ma cjalant tal formari si pues vê ancje la sô morfologjie (lis formis masculine e feminine, singolâr e plurâl) e se si scrivile juste tal coretôr ortografic, chel le acete.

Par altri "lessicografic" no dome al esist, ma lu dopre ancje la ARLeF, par esempli ca.

Ca sot une imagjin di che e fâs un pôc il struc de situazion:

Mi reste dome une domande: ma parcè un ent public, invezit di judâ chei che a lavorin, si metial a declarâ robis falsis? Come un frut che al fâs a cui che al pisse plui lontan e ancjemò si pisse intor.

Cjarte straçade

Îr o soi lât intun ufici dulà che la lenghe furlane le doprin ben e no mâl.

E a doprin ancje i dizionaris: ca e je une foto.

Il Nuovo Pirona e il Faggin (abàs a man drete e a man çampe), vieris e gloriôs, a son stâts tant doprâts par desenis di agns (il Faggin al è dal 1985) e cussì dispès che cul timp la cuvierte si è disleade e cussì ancje cualchi pagjine.

Il DOF (abàs tal mieç) publicât tal 2008, al è stât doprât ancje lui, ma un pôc par vie che al è plui zovin di plui di 20 agns, un pôc parcè che la leadure e je plui elastiche e adatade a un libri di passe 1000 pagjinis, al è ancjemò in buinis cundizions.

Ma ce che o vuei mostrâ al è il Grant Dizionari Bilengâl Talian-Furlan, di cjarte, in 6 volums: al è ancjemò te pelicule di plastiche, dal 2011 incà a nissun no i è nancje vignude la tentazion o la curiositât di vierzilu.

Nol è un fat isolât o râr: pardut li che o ai viodût il GDBTF di cjarte al è o ancjemò te pelicule o, gjavade la pelicule, si viôt che nol è mai stât tocjât.

Tal 2011 la stampe di cjarte e jere stade in pratiche imponude de ARLeF (president di chê volte Lorenzo Zanon), un pôc par stropâ la bocje, cun sîs volums di cjarte, a chei che a vevin fat polemiche cuintri dal GDBTF, un pôc par meti un tombâl parsore dal progjet, un pôc magari par altris resons che no sai. A son stâts spindûts 120.000,00 € pe stampe, consegne e presentazion dal GDBTF di cjarte (di ce che o sai 1.900 copiis).

In chê volte o jeri stât dal dut contrari ae stampe dal GDBTF in chê forme e cuantitât: i miei argoments, in struc, a jerin che e sarès stade dome une straçarie di bêçs publics.

A son passâts scuasi 15 agns e si pues viodi: il GDBTF di cjarte no lu dopre e no lu à doprât nissun, no parcè che nol sedi un bon dizionari, ma parcè che se un al à voie di movi il pês di chei 6 volums al va in palestre o a fâ une tasse di lens, e se invezit al vûl cirî une peraule lu fâs cul ordenadôr o cul telefonut.

Di fat, intant, il GDBTF eletronic, a disposizion di ducj tal sît web dal CLAAP, al veve ogni mês plui di 4.000 visitis e desenis di miârs di ricercjis.

Po la ARLeF, de fin dal 2023, e à di fat puartât il CLAAP a sierâ, ma par fortune il Grant Dizionari Bilengâl Talian-Furlan, e altris imprescj, si puedin viodi tal sît https://lenghefurlane.eu/

Us lassi di fâ cualchi riflession sui obietîfs, su la competence, su la capacitât di prevision, su la responsabilitât e su la etiche di cui che al decît cemût che si spindin i bêçs publics che a varessin di jessi pe lenghe furlane.

Imprescj pe lenghe furlane

Se no si sês visâts, o podês cjatâ in linie, cence regjistrazions o limitazions, ducj i imprescj che us coventin pe lenghe furlane.

Tal sît https://dizionarifurlan.eu/ al è il dizionari dut par furlan, chel cu lis descrizions plui detaiadis e profondis e cun plui esemplis (passe 70.000, pal moment), cjapâts scuasi simpri citant autôr e opare.

Nol è finît, ma al à za une buine cuantitât di lemis e al è daûr a cressi!

Tal sît https://lenghefurlane.eu/ a son i imprescj fats tai ultins 25 agns di CFL2000, CLAAP, Informazion Furlane e Serling. Il Grant Dizionari Bilengâl Talian-Furlan, il Dizionari ortografic, il Coretôr ortografic, i cuadris flessionâi.

Dopraitju!

Miedi e malât

 

Se un al è vieli e malât, nol pues pretindi miracui dal miedi, e in ogni câs nissun nol vîf par simpri.

Pes lenghis al è compagn: la politiche linguistiche e je il miedi e no pues fâ miracui e prime o dopo ancje lis lenghis a muerin.

Però si pues sperâ di vê fortune e di intivâsi tun miedi brâf che, par cheste volte, ti vuarìs e ti regale ancjemò cualchi an.

E se si à dome sîs mês di vite, une robe al è vê un miedi che ti sta dongje, che al viôt di te, che ti gjave i dolôrs, che ti permet di passâ il ultins mês seren cu la famee e di decidi cul cjâf clâr cemût disponi de ereditât; une altre robe al è vê un miedi che ti fâs stâ piês e ti sassine chei ultins moments, che a podaressin jessi preziôs; e une altre robe ancjemò al è vê un miedi che ti conte balis, che ti instupidìs di dormiis e intant ti robe chei cuatri carantans di pension e al cîr ancje di imbroiâ la tô famee, e dongje si svante di mil merits che nol à.

Pensait ae lenghe furlane vuê e pensait a cui che vuê al decît dulà che a van i bêçs de politiche linguistiche e cemût: no si pretindin miracui, ma ciertis indegnitâts no si perdonin.

Obietîfs di planificazion cisiliniane dal corpus: someti o eliminâ cui che al lavore

Te Conference di lunis stât o calcoli in maniere positive doi intervents dai relatôrs: chel di Vittorio Dell'Aquila e chel di Franco Finco. Si son fondâts suntun ordin concetuâl sientific e a àn metût jù dâts che a permetin di resonâ.

Par dîle dute a àn ancje vût di fâ esercizis di ecuilibrisim, parcè che o savìn che lis istruzions (o imposizions) a jerin di no dî nuie che al podès lâ cuintri de ARLeF.

Chi a son doi pas dal intervent di Franco Finco che al fevele di planificazion dal corpus e che al dîs lis robis cemût che a son, cence jentrâ in detais che al sarès stât imprudent evidenziâ.

Stant che jo no ai fastidis di prudence o imprudence, o cjapi la ocasion des sôs peraulis, par pandi i detais che lui nol à podût contâ, ancje parcè che magari no ju podeve nancje cognossi insot. Par dî la veretât no scrîf dut dut nancje jo, par dûl di personis che a àn fat erôrs bruts, ma in (plui o mancul) buine fede e che in ogni câs cumò no àn plui efiets (istès o ai plui rispiet pe veretât che pes personis, alore se al covente o pues ancje tirâ fûr dut).

In ce struturis si devino dongje, tai ultins agns, i lavoradôrs che a àn fat scuasi ducj i imprescj (GDBTF, DOF, COF, Traddutôr JUDE, Corpus etichetât, Certificazions) che al fevele Finco?

Te cooperative Serling, dome pe part produtive.

Tal CLAAP (Centri di linguistiche aplicade "Agnul Pitane") par une altre porzion di part produtive e par dute la part contratuâl cu la ARLeF pai progjets finanziâts (espansions dal GDBTF, prin nucli dal Corpus etichetât, dizionari monolengâl, plateforme didatiche Lenghis).

Pes Certificazions la Serling o jo cun contrat individuâl o vin produsût il materiâl cun contrat cu la Universitât dal Friûl-CIRF

Ce materiâi jerino sparîts par "motîfs economics, gjestionâi etc."?

Il GDBTF incrosât cul DOF, il Coretôr ortografic in linie, i cuadris flessionâi, il Corpus etichetât (sît claap.org), la plateforme Lenghis, dut il materiâl interatîf des Certificazions linguistichis (sît aform.uniud.it)

Cuâi sono stâts i "motîfs economics, gjestionâi etc." che a àn puartât a cheste situazion?

Pes Certificazions: la ARLeF e à pretindût il passaç di possès di dut il materiâl che e veve finanziât (no comprât). La Universitât jal varès ancje passât cence fastidis, ma la formule legâl elaborade de ARLeF e je stade inacetabile e duncje la Universitât no à podût procedi. Di un an incà (sui timps no soi sigûr al 100%) no je in vore nissune convenzion par mantignî la funzionalitât e la sigurece dal materiâl interatîf tal sît de universitât e duncje no si pues doprâlu.

Pal materiâl dal CLAAP: la ARLeF e à fat murî il CLAAP, duncje al è normâl che i siei sîts a sedin sparîts (in efiets a podevin sparî intune maniere un pôc mancul spasmodiche e irazionâl, però no si podeve tignîju sù). Ancje in chest câs la ARLeF, tal 2023, e à pretindût di impossessâsi, in maniere ilegjitime, dal materiâl che al jere stât dome finanziât, no cuistât e che al jere costât une vore di plui dal finanziament (al è come se il Stât ti des un finanziament par comedâ il cuviert, e dopo al disès che tu âs di dâi la cjase). La pretese de ARLeF (e cuant che o feveli de ARLeF, no feveli de struture, o feveli dal president Eros Cisilino e dal diretôr William Cisilino, che le àn secuestrade) no dome e jere ilegjitime, ma tal câs dal dizionari monolengâl (in linie, ancje se no publicizât, de Vierte dal 2021, par permeti ae ARLeF di controlâ la esecuzion dal lavôr) e leve ancje cuintri dal ecuilibri e dal completament dal progjet. Cualchi incompetent (no si sa cui) al veve scrit tal Plan Gjenerâl di Politiche Linguistiche 2021-2025 che il dizionari al sarès finît in cheste dade di timp e cuntune cuantitât di uns 7.000 lemis e che al veve di jessi stampât di cjarte: par capî trop che e je fûr dai semenâts cheste decision al baste pensâ che Nuovo Pirona e Faggin a àn tor dai 20.000-30.000 lemis, il GDBTF a 'nd à 48.000, il COF 68.000. Nuie di fâ, par chest progjet a bastin 7.000 par fâ une stampe di cjarte che po al è impussibil inzornâ.

Il CLAAP, dopo di vê cirût di fâ jentrâ in reson i Cisilins, al à otignût dome di viodi blocâts ducj i procediments burocratics e di restâ cence nissun finanziament: cussì al à scugnût sierâ buteghe e sierâ ancje i sîts.

In struc: i problemis che a àn fat sparî di Internet materiâl interatîf des Certificazions, GDBTF, Corpus etichetât, dizionari monolengâl (ducj finanziâts de Regjon/ARLeF) e altri materiâl, ju àn creât di pueste propit il president e il diretôr de ARLeF par volontât di domini, e dulà che a àn podût a àn ancje causât la eliminazion des struturis produtivis (cul CLAAP a son rivâts, cu la Universitât a rivin dome a dâi fastidi, cu la Serling o viodarìn).

Ce situazion ise cumò?

Cumò ducj i materiâi che la Serling e à dirit di doprâ, a son stâts tornâts a meti a disposizion di ducj, tai sîts dizionarifurlan.eu e lenghefurlane.eu, cence nissun finanziament public.

Te ARLeF il president Eros Cisilino e il diretôr William Cisilino a van indenant a compuartâsi come simpri.

Cemût dî robis falsis cun elements vêrs

 

Chest al è un articul dal Gazzettino di vuê.

Nol è firmât, duncje al è probabil che al sedi la riproduzion tâl e cuâl di un comunicât de ARLeF o di cualchi ufici regjonâl. Magari cussì no, si sa che vuê gjornâi e gjornaliscj no àn timp ni bêçs par cirî, scrivi e par controlâ se un comunicât al è vêr.

Si centre la atenzion su tropis fameis che a domandin il furlan pai lôr fîs, e va ben: o savìn che si è simpri tor dal 70% e che plui dal 50% des fameis di imigrâts lu domande.

Ma ise cheste la vere notizie? Meti dongje lis peraulis "Friulano" "scuole" e "crescita" piturial pardabon la realtât?

No isal impuartant meti la atenzion su trops fruts che a imparin e che a doprin il furlan a scuele?

La leç 482/99 e dîs che la scuele e à di garantî che i fruts a imparin il furlan!

La normative i da ae ARLeF la funzion di controlâ i risultâts didatics: no lu à mai fat.

La realtât e je che in dì di vuê scuasi nissun frut al impare furlan a scuele: se lu impare lu impare a cjase o cui amîs, a scuele no.

No dome: ma dai passe 1500 insegnants de liste regjonâl che in teorie a insegnin furlan, no son mai stadis contoladis lis competencis. Tancj no san nancje fevelâ furlan, ma a jessi in chê liste li si cjape cualchi franc in plui. La grande part no sa scrivi: no pensi che a sedin plui di 30 chei che a rivin a fâ un detât di 20 riis cence fâ almancul 20 erôrs.

Ma la ARLeF e la Regjon a van indenant a pontâ la atenzion dome su tropis fameis che a domandin il furlan a scuele: no metin in vore la leç, no le fasin meti in vore, a lassin i insegnats stes te ignorance e tal analfabetisim.

Chihuahuas

La Conference Regjonâl su la lenghe furlane di îr e je stade un esempli di cemût che une istituzion (la Regjon) e un ent regjonâl (la ARLeF) a puedin montâ cui bêçs publics une architeture di bausiis e di miezis veretâts cence che nissun al disi cic.

Nus contin che a son stadis fatis robis straordenariis (che però nissun viôt e che no funzionin, par esempli il tradutôr automatic e il program di sintesi vocaliche), si cjapin merits di lavôrs fats di altris (par esempli il tradutôr automatic di Google), a disin che o sin plens di dâts par fâ valutazions (però no àn mostrât nissun dât ni fat nissune valutazion fondade sui dâts), o vin il 70% di fameis che a domandin furlan a scuele pai fruts, ma che dopo in nissune scuele i fruts no lu imparin nol è impuartant.

Elena D'Orlando nus à regalât une perle di alte concezion dal furlan: e à dite che e varès fevelât par talian parcè che il furlan nol à i regjistris par jessi doprât intune ocasion cussì formâl e sientifiche (par altri intant che le scoltavin ancje membris de Societât Sientifiche e Tecnologjiche Furlane). Nol è il furlan a no vê i regjistris, e je la professoresse D'Orlando che no sa doprâ il furlan. E nissun al pretint che lu dopri, ma almancul che no vegni a sputanâlu, tant par doprâ un regjistri che che jê e calcole just pe nestre lenghe... 

Altris a àn dimostrât la dignitât morâl di un chihuahua: ur àn dite di saltâ sul scagnut, e lôr a àn saltât, dopo stant che a son piçui piçui, a àn saltât propit pôc. Di chê altre bande ce si aial di spietâsi di une raze che e je stade selezionade par jessi piçule?

Ur àn comandât ancje di cori a cjapâ il baston e a puartâlu indaûr al paron: e lôr vie di corse e indaûr di corse a puartâlu, cence tignî cont che il baston ur al dan pal cjâf ogni dì.

E dut il public a cisicâ parsot, a dîsi un cun chel altri che lis robis no son cemût che lis contin, ma dopo, a viert, nissune critiche.

Scuasi nissune: Gabriele Zanello, inmò prime dai intervents dai relatôrs, al à criticât campagnis comunicativis de ARLeF stesse che a mortifichin il furlan: a àn fat fente di no capîlu. Marc Stolf e Carli Pup a àn vût cûr di tirâ fûr cualchi sclese di veretât.

Il rest cuços.

 

Pôre

Sabide stade une persone che e lavore di agns pe lenghe furlane, fasint pardabon robis bielis, mi à scrit par vê une consulence.

E je daûr a preparâ materiâl scrit par furlan e e veve un dubi.

Jo i rispuint ce che mi somee plui just e mi scrîf di gnûf disintmi graciis une vore e mi conte che i varès domandât cheste consulence ae ARLeF ma che e à pôre, motivade, che i "robedin" dut il lavôr.

Cheste e je la situazion de politiche linguistiche pe lenghe furlane: cui che al lavore pal furlan al pues vê pôre di vê a ce fâ cu la ARLeF parcè che al à la percezion che e puedi compuartâsi come un criminâl.

O ai dute la documentazion scrite, che par altri e va indenant a contâ altris biei detais...

Pal Pat pe Autonomie, par Moretuzzo president

 

Cinc agns indaûr il Pat pe Autonomie al rivave a fâ une imprese no di pôc: cjapâ sù lis firmis e cori tes elezions regjonâls.

Al rivave a fâ ancje une altre grande imprese: puartâ in consei regjonâl doi rapresentants, Massimo Moretuzzo e Giampaolo Bidoli.

In chescj cinc agns il Pat pe Autonomie al à vût une evoluzion in coerence cu la situazion politiche: lassant la posizion di partît “di racuelte”, al à cjapât chê di partît autonomist di aree ecologjiste e progressiste.

Al è sucedût ce che si veve previodût cun Un Friûl diferent, ma par un altri troi.

Trop che al è stât bon il lavôr fat dal Pat pe Autonomie si lu viôt: in cinc agns al è stât il sôl partît a fâ pardabon oposizion no par riflès condizionât, ma cun riflessions profondis sui problemis vêrs dal Friûl e de regjon e cjatant e proponint soluzions concretis.

In cinc agns il Pat pe Autonomie al è passât di jessi une piçule presince miracolose tal consei regjonâl, a jessi la vere vuide e la espression plui coerente e rispietade de politiche progressiste in Friûl e a Triest.

La reson e je che la fuarce dal Pat pe Autonomie no ven di lontan: e ven dal Friûl e dai furlans.

Il Pat pe Autonomie al rive cumò al nivel di funzion plui alt descrit di Sergio Cecotti za tal 2016: “competi par gjestî l'autoguvier dal teritori (par esempli traviers il guvier de regjon) par realizâ, tal concret, chel stes autoguvier e il "destin storic" de comunitât teritoriâl”.

L'auguri al è che ancje altris intuizions e previsions di Sergio Cecotti, in partricolâr sul so “program massimâl”, si inverin in curt.

Los ojos de las caras (I voi de muse)

 

Una niña de nuef años a ojo se parava: «¡Ya Campeador, en buena çinxiestes espada! El rey lo ha vedado, anoch dél entró su carta, con grant recabdo e fuertemientre seellada. Non vos osariemos abrir nin coger por nada; si non, perderiemos los averes e las casas, e aun demás los ojos de las caras. [...]»

Une frute di nûf agns devant dai voi si parave: «Lafè Campeador, in buine ore tu âs cenzût la spade! Il re lu à improibît, nossere la sô letare e je rivade,           cun grant comant e a fuart sigjilade.             No us olsaressin vierzi ni acetâ par nuie;         se no, o pierdaressin i avês e lis cjasis,     e cun di plui i voi de muse. [...]»

Tal secul XI il re Alfons VI di Castilie al menaçave di gjavâ i voi a cui che al ves judât il Cid Ruy Diaz, che lui al calcolave un traditôr.

Tal 2021 il traditôr al è, tra chei altris, Pablo Hasel, un rapper che si permet di cjantâ che i Borbons a son ladrons, condanât a trê agns di preson.

Tal secul XXI cui che al manifeste pe libertât di Pablo Hasel e pe libertât di espression in Spagne, al pues lâ incuintri ae stesse pene dal secul XI: la polizie e interven cun violence indiscriminade, ancje cuintri di cui che nol fâs nissun dam e che nol compuarte nissun pericul. Par dispierdi la int che e reclame dirits democratics, a svolin lis balis di gome tratis dai poliziots (spagnûi o catalans che a sedin) e ben dispès al è cualchi manifestant che al piert un voli (o un testicul).

https://www.naciodigital.cat/noticia/216099/perd-ull-noia-ferida-impacte-bala-foam-dels-mossos-barcelona

https://www.vilaweb.cat/noticies/manifestant-ferida-ull-foam-mossos/

Fedriga e il Tiliment: domandis e rispuestis

Domande 1 - Parcè la maiorance dal Consei Regjonâl dal Friûl - VJ aie votât cuintri de candidature dal Tiliment tant che patrimoni Unesco?

Parcè che ur al à dite Fedriga

Domande 2 - Parcè assessôrs come chei pal ambient (Soccimarro) o pal turisim (Bini) varessino di jessi cuintri de valorizazion internazionâl dal Tiliment?

Parcè che ur al à dite Fedriga

Domande 3 - Parcè une maiorance di consei regjonâl varessie di votâ cuintri dal sintiment di amôr de stragrande maiorance dai citadins de Regjon pal Tiliment?

Parcè che conseîrs e assessôrs a san benon che no dipendin plui dal vôt dai furlans, a dipendin dome di Fedriga.  

Domande 4 - Parcè Fedriga isal cuintri de candidature dal Tiliment tant che patrimoni Unesco?

Parcè che dal Friûl, dai Furlans, dal ambient, dal Tiliment no i free nuie: i free dome di fâ contents i siei amîs adalt. Amîs che no àn nissune vision politiche e nissun program economic: dome chel di metisi bêçs publics tes sachetis cuntune des plui grandis mangjadoriis che a son simpri stadis in Italie: ciment, ciment e ciment.

E se il Tiliment al devente patrimoni Unesco, a deventin plui dificii i crimins ambientâi, fats magari ancje rispietant lis leçs fatis propit pai amiuts.

Domande 5 - Cualchi altre reson?

A acetâ une propueste inteligjente fate de oposizion, la maiorance e à pôre di dâi reson e di fâ brute figure, parcè che di buinis iniziativis, la maiorance, no 'nd à nancje une tal cjâf.

Domande 6 - Ce fâ?

La zonte Fedriga e je il tierç disastri.

Zonte Tondo - program politic: lassaitmi durmî, cuant che mi svei anìn a bevi un tai, però paiait voaltris, che ducj i bêçs de regjon, che par altri in ogni câs a son vuestris, ju ai regalâts a Tremonti...

Zonte Serracchiani - program politic: o ai di jessi plui renziane di Renzi, cussì a fuarce di rugnâ e vuacâ in "effevuggì" e di sbassâ orelis e menâ la code a Rome, mi rive une biele poltrone... Ah, e ancje jo i regali i vuestris bêçs al guvier!

Zonte Fedriga - program politic: anìn daûr dal ministri Salvini!! (pss, Salvini si è dimetût cirint di fâ il babio e le à cjapade tal comedon... nol è plui ministri) Ostie! e cumò ce fasìno? Ah, mmm, ehh, boh. No sai l'impuartant al è ubidî, a Salvini o a cualsisei, no soi migo bon di fâ altri, e voaltris muci che se no us mandi a cjase: no mi plâs la int che e pense e ancjemò mancul chê che e fevele!

Nol baste che la Regjon e sedi Autonome, al covente che e sedi guviernade di autonomiscj!

Sostignìn il Pat pe Autonomie!

Pal ben dal Friûl, pal ben dai Furlans.

Il Friûl politic

Ve ca, infin, une mape dal Friûl.

Cualchidun i disarès “Friûl storic”, ma cheste definizion e à doi difiets: un al è che se si fevele di storie e somee une robe passade e sierade, chel altri al è che il Friûl, come la plui part des regjons e nazions de Europe, dilunc dai secui al à cambiât un tic forme e dimension, duncje di mapis a 'nd coventaressin tantis, pes diviersis etis storichis.

Alore chest al è il Friûl politic: politic par vie che al è il teritori di riferiment di chei che al Friûl i tegnin, che a vuelin che al cressi, che al deventi libar di fâ lis sieltis pal so avignî, e chest si à di fâlu, par fuarce, ancje cu la politiche.

Par cualchidun “politic” e “aministratîf” (soredut se si fevele di une mape) a son la stesse robe, ma pai grups di podê di scjale taliane il Friûl aministratîf nol à di esisti: al è il FVG, une sigle che no vûl dî nuie e che e fâs ducj plui puars di identitât; la capitâl aministrative de regjon, fate par passe 97% di teritori furlan, al è Triest; te comunicazion regjonâl e taliane si cîr in dutis lis manieris di no doprâ nancje la peraule Friûl, si inventin nons che no àn nissun sens e nissune realtât storiche (tant che Venezia Giulia, Isontino, Destra Tagliamento) par scancelâ Friûl orientâl e Friûl ocidentâl, par scancelâ il Friûl in gjenerâl; la volontât democratiche dai Comuns dal Mandament di Puart che a àn votât par tornâ cul rest dal Friûl e je scjafoiade de prepotence di Vignesie e di Rome...

Alore bon: un Friûl aministratîf no lu vin, ma il dovê di jessi responsabii pe nestre Patrie e di cirî di fâ il so ben, chel sì che lu vin, e cussì o vin un Friûl politic.

Ca si pues viodi dulà che al scomence e dulà che al finìs (e se mai cualchidun al varà la voie di gjavâsi, almancul al savarà di ce gjavâsi).

NOTE: cheste mape e je a disposizion in vetoriâl e si pues doprâle e cambiâle, zontâ nons e fenomens che si puedin mostrâ, di maniere di fâ viodi aspiets fisics, antropics o cualsisei robe interessante pe didatiche, pe comunicazion, par ce che si vûl. Fasêtle zirâ e dopraitle!

Al è un judiç a Berlin... e la Cort di Justizie de Union Europeane in Lussemburc

Oriol Junqueras al è il presindet di Esquerra Republicana de Catalunya, partît indipendentist di çampe.

Come altris al è responsabil de dinamiche che e à puartât al referendum (no autorizât de Spagne) di indipendence de Catalogne e ae sô repression.

Al è in preson di plui di doi agns: par tignîlu in preson cautelâr prime de condane, il public ministeri al veve montât cuintri di lui e di chei altris imputâts la acuse di ribelion, che po e je stade refudade fintremai te condane, dal Novembar passât.

Intant però a son stadis elezions: chês pal Parlament spagnûl e chês pal Parlament european.

Nancje la justizie spagnole no je rivade a improibîi a Oriol Junqueras di partecipâ, e di vinci, prime de condane: no son rivâts a cjatâ la maniere di gjavâi i dirits politics.

Une volte elet, pe Spagne, il deputât al à di lâ a zurâ di rispietâ la costituzion e di fâ cualchi firme e al pues partecipâ aes ativitâts dal parlament e al gjolt, si sa, di imunitât parlamentâr: nol pues jessi tignût in preson o processât o condanât cence domandâ il permès al Parlament stes.

Pe “justizie” spagnole chest nol è stât un probleme cuant che Oriol Junqueras al è stât elet deputât a Madrid tal Mai dal 2019: la maiorance dal Parlament di Madrid e je spagnoliste anticatalane e i à gjavât daurman la imunitât a Junqueras e a altris deputâts catalans, par che a puedin jessi processâts...

Il probleme al è rivât cuant che Junqueras al è stât elet tal Parlament European, simpri tal Mai dal 2019: i judiçs spagnûi a son paste intindude cui politics spagnûi, ma a san che in Europe al è un altri pâr di maniis. No ur varessin dât il permès di puartâ indevant un procès politic.

Alore a àn inventât une scuse incoerente e fûr dai semenâts: a Junqueras i àn permetût di zurâ su la costituzion pal Parlament spagnûl, no i àn lassât fâ l'istès pal Parlament european!!!

In cheste maniere, par un vizi formâl produsût di pueste, Junqueras (in compagnie cun altris indipendentiscj) al è stât declarât elet, ma po nol è stât includût te liste di parlamentârs euproeans spagnûi de Spagne stesse.

Il procès al è lât indevant, ma, par fâ fente di jessi un alc democratics, i judiçs a àn domandât ae Cort di Justizie de Union Europeane se Oriol Junqueras al veve imunitât come parlamentâr european cundut che il procès al jere za tacât e cundut che nol fos lât a zurâ su la Costituzion (parcè che no jal vevin permetût).

Fate cheste domande, però, no àn spietât la rispueste e a àn spessât a condanâ Junqueras e chei altris tal mês di Otubar.

Vuê e je rivade la sentence: pe Cort di Justizie de Union Europeane no valin nainis, Junqueras al jere parlamentâr e al veve imunitât, la formalitât di zurâ su la costituzion spagnole no à nissun valôr in Europe.

Nol podeve ni jessi tignût in preson, ni jessi processât, ni jessi condanât cence domandâ il permès al Parlament European.

Intun paîs civîl cheste sentence e compuartarès la nulitât de condane: in Spagne a ciraran cualchi altre scuse par tignîlu in preson ancjemò un pôc... juste par fâ viodi che a comandin lôr e che si sbatin des regulis de democrazie.

In Catalogne la sole soluzion (im)pussibile e je la autonomie

Tai agns dopo de fin de ditature franchiste jenfri Catalogne e Spagne al jere une sorte di ecuilibri positîf: i partîts autonomiscj, in particolâr di centridiestre, a tignivin in man la regjon e i garantivin une posizion di benstâ une vore plui alt de medie spagnole.

Di chê altre bande la Spagne e veve un vuadagn, parcè che si cjapave une biele fete dai contribûts dai catalans.

Ma di là de convenience al jere un sisteme politic che al corispuindeve al volê popolâr: si pues dî che intune maniere o intune altre, ducj i catalans a jerin autonomiscj, cualchidun al jere ancje indipendentist, ma par intant la autonomie i leve ben.

Chest ecuilibri positîf si è rot cu lis crisis economichis e politichis di chest mileni: si è passâts a sisteme un dulà che al somee che nol sedi avonde puest par ducj e alore invezit di tratâ cul aversari, si cîr di eliminâlu. In particolâr, i partîts spagnûi (in crisi par coruzion e ineficience) a àn viodût che i partîts catalaniscj (in crisi par incapacitât di cjatâ soluzions ai problemis sociâi de Catalogne) a jerin vulnerabii e a àn cirût di eliminâju une volte par dutis, par cjapâ il lôr puest tal guvier de regjon plui produtive de Spagne.

Za cheste dinamiche e baste par capî che la politiche spagnole no je tant democratiche, par vie che in democrazie vere a valin la tratative e il confront, l'obietîf di eliminazion dal aversari nol è previodût.

I partîts autonomiscj catalans, cjatant sierade cualsisei puarte ae tratative e restant cun ancjemò mancul mieçs par frontâ lis dibisugnis de regjon, a àn reagjît domandant 100 par vê 10: invezit di domandâ plui autonomie par no vê nuie, a àn tacât a fevelâ di indipendence sperant di vê plui autonomie.

Ma ancje cheste dinamiche ur è scjampade di man a ducj e si è polarizade: il confront politic si è zuiât, a nivel spagnûl, su cui che al jere plui anticatalan (une gare vergognose, che e finìs pate), a nivel catalan e je stade la rivalitât su cui che al jere un indipendentist plui vêr di chei altris.

La agression anticatalane puartade indevant dai partîts spagnûi e je stade un at criminâl, ma i catalaniscj a àn fat une rie biele lungje di erôrs, consolâts dome dal fat che i erôrs de Spagne a jerin plui grues. Cumò i efiets plui bruts, a nivel sociâl e politic a son doi:

• te polarizazion dal confront al è restât pustot il cjamp de autonomie: i partîts catalaniscj par mantignî visibilitât, e vôts a àn di jessi indipendentiscj, un eventuâl messaç autonomist al somearès viliac e traditôr;
• il confront politic si è slontanât dal minim comun denominadôr dal sintî politic dai catalans, che al jere stât par desenis di agns e che al è ancjemò la autonomie.

Il risultât al è che a son stâts partîts anticatalans che a àn cjapât sù la bandiere de autonomie (une vore false) cuintri de indipendence, e che une grande fete di eletorât al è obleât a votâ par posizions che nol condivît. Di fat a scuegnin votâ:

• o i partîts indipendentiscj, che a rivin parsore dal 40% dai vôts, intant che dome il 30% (forsit) dai catalans al votarès pe indipendence intun referendum
• o partîts spagnoliscj che a disin di difindi la autonomie, ma che in realtât tai ultins agns le àn dome impedide e disvuedade
• o piçui partîts che a cirin dome di sorevivi, che a disin di jessi vierts, in teorie, a diviersis eventualitâts, ma che in pratiche su chest teme no proponin nuie e no rapresentin nissun.

Cjalade dal difûr la situazion e à une soluzion perfete, clare e democratiche: al varès di nassi un partît autonomist autentic (no fals), in câs viert ancje ae indipendence se la autodeterminazion e puartarà di chê bande (ma fin cumò no va cussì), ma che al vedi di prin obietîf chel di meti in vore une autonomie fuarte pe Catalogne e che al canalizi lis fuarcis su chest teme.

Un partît dal gjenar al varès un bacin potenziâl dal 70-75% dai vôts: di fat si podarès permetisi ancje di fâ sù doi partîts autonomiscj cun visions sociâls diviersis, ma ducj i doi autentics.

Cheste e sarès ancje la uniche soluzion pussibile ae crisi politiche tra Spagne e Catalogne.

Ma tal stes timp e je ancje une soluzion impussibile, par vie che la polarizazion e je lade masse indevant e tornâ al teme de autonomie, ancje se al sarès inteligjent e democratic, no i convignarès a nissun dai centris di podê:

• i partîts catalaniscj che si son butâts sul indipendentisim a passaressin de centralitât ae margjinalitât residuâl;
• pai centris di podê spagnûi une autonomie vere de Catalogne e sarès pôc mancul disastrose che la lôr indipendence: il sisteme di coruzion e ineficience al à masse bisugne dai bêçs dai catalans.

Alore invezit de sole soluzion pussibile e democratiche, si pues previodi* che e sarà la soluzion plui conveniente pai partîts: vâl a dî, lâ indevant come cumò, cence nissune soluzion e cence nissun dialic.

(*) Dopo si sa ben che lis previsions no tegnin mai cont di dut...

La dimension nazionâl de cuistion catalane

La propagande anticatalaniste e pant il so discors plui di dut su chescj ponts:

1. la cuistion catalane si fonde su rivendicazion nazionalistichis/etnichis anacronistichis tun moment storic dulà che si à di unîsi e no di dividisi
2. (version pal forest) i indipendentiscj a son egoiscj di diestre, che no vuelin condividi lis lôr risorsis cui spagnûi plui puars e che a metin in pericul la Europe, come chei altris moviments sovraniscj di diestre in Europe
3. (version pe Spagne) i indipendentiscj a son radicâi di çampe, che a metin in pericul l'ordin costituzionâl

Ducj i tre chescj ponts a son fals: chei plui facii di dimostrâ a son il 2 e il 3, stant che si escludin un cun chel altri.

Il fat che l'indipendentisim catalan al sedi un sovranisim di diestre si dinee ancje dome cul fat che i siei nemîs plui estrems a son propit i sovraniscj di diestre spagnûi, vâl a dî i neofranchiscj di VOX (amîs de Lega di Salvini...)

Invezit il fat che l'indipendentisim al sedi un moviment radicâl di çampe al ven dineât dai risultâts eletorâi: tra i partîts che si declarin indipendentiscj chel maioritari al è di çampe moderade (Esquerra Repubilcana, 22,56% dai vôts tes ultimis elezions) il secont al è di centridiestre (Junts per Catalunya, 13,68%) e dome il tierç al è di çampe plene (CUP, 6,35%). Par altri al è di notâ che une buine fete dal eletorât catalanist al à facilitât di cambiâ orientament jenfri Esquerra Republicana e Junts per Catalunya, daûr di episodis o situazions contingjentis.

La realtât alore e je che il moviment catalanist/indipendentist al è trasversâl, di çampe a diestre e des fassis sociâls puaris fin a chês de grande imprenditorie: chest element al è une vore impuartant e al da une fuarce e un valôr straordenari a chest fenomen, ma cemût che si pues viodi, par esempli, te stampe taliane, al da une complessitât dificile di capî par cui che al è usât a pinsîrs e informazions semplificadis. Par altri se il mont informatîf talian in gjenar nol rive a capî e a interpretâ nancje la realtât taliane, no si pues pretindi che al sedi bon di capî lis situazions complessis di altris bandis dal mont...

Il fat che la cuistion catalane e sedi nazionaliste-etniche al è ancjemò plui complès, e ancjemò plui interessant, par vie che al oblee a tornâ a frontâ e a capî il concet di nazion.

Cualsisei che al vedi vivût in Catalogne o che le vedi ancje dome visitade cui voi vierts, al sa benon che il concet di “etnie” catalane nol esist: la catalanitât e je la partignince a un teritori e a une culture, l'amôr par une lenghe cence esclusion di chês altris. La catalanitât e je vierte a ducj chei che a vegnin a stâ in Catalogne, cence nissune discriminazion di “sanc”, “colôr”, “religjon”, e in fin dai fats nancje di lenghe. Al è clâr che la lenghe catalane e je un fatôr di coesion sociâl impuartant, ma tes protestis dai ultins agns a van ancje personis che il catalan, magari lu san come seconde lenghe, ma no lu doprin mai e a fevelin simpri par spagnûl.

Un altri element al è la mancjance totâl di conotazion razistichis: frasis o pinsîrs come “i spagnûi che a tornin a cjase lôr” a son alc di impussibil di imagjinâ in Catalogne. Tal moment stes che un imigrât, de Spagne o dal rest dal mont, al va a vivi in Catalogne, al devente part de comunitât teritoriâl catalane, cui stes dirits e cui stes dovês di chei altris e cence barieris identitariis: po al è libar di sielzi lui il so nivel di integrazion e identificazion.

Al è di notâ ancje che tes protestis dai ultins agns il fatôr linguistic e identitari a son presints a doi nivei:

1. a son presints parcè che a son naturâi in cualsisei fenomen de societât catalane
2. a puedin jessi sprocs di difese de lenghe catalane, ma dome in rispueste aes tantis menacis dai partîts nazionaliscj spagnûi di gjavâle de scuele e de uficialitât

Alore la lenghe e la identitât catalanis a son un ingredient dal fenomen, a son un fatôr di coesion sociâl a priori, ma no son par nuie il vêr pont di confront.

Il confront vêr e il nivel di concezion di nazion a son suntun altri plan, che al è chel di comunitât politiche. La nazion catalane e je la comunitât di personis che a vivin in Catalogne e che a vuelin jessi sogjet politic, titolârs di dirits e podês coletîfs, no dome a nivel individuâl e nancje dome a nivel di citadinance spagnole o europeane.

Dome une minorance dai catalans e je indipendentiste, ma almancul un 75% dai Catalans al à cussience che i catalans a formin une nazion distinte dentri dal stât spagnûl e che a àn il dirit di decidi dal lôr destin (autodeterminazion) e ancje dal rapuart politic e economic di vê dentri dal stât spagnûl (autonomie).

Alore la cuistion nazionâl catalane, tal so confront di vuê, no à nuie di anacronistic, no je une cuistion etniche o linguistiche o egoiste o sovraniste: e je la cuistion di une comunitât teritoriâl che e rivendiche il dirit di jessi sogjet politic autonom, rispiet a un podê centrâl dal stât che i dinee chest dirit, e che al à tindincis autoritariis a dineâ une vore di dirits democratics.

E je une cuistion pardabon atuâl: chê dai dirits politics individuâi e coletîfs e chê des fondis de democrazie.

Il fatôr che al da dongje lis protestis, sostignudis ancje di grande part no indipendentiste, al è la incapacitât politiche spagnole, la sô struture corote, la sô reazion autoritarie: lis protestis a son indreçadis cuintri dal sisteme feudâl spagnûl, no cuintri de identitât o de nazion spagnole.

La nazion Catalogne e da une prospetive di democrazie vere, di eficience che e permeti mancul coruzion e plui prosperitât.

In fin dai fats a son lis promessis di progrès e libertât che a dan dutis lis nazions ancjemò no istituzionalizadis (ancje chê furlane), e che cualchidune e manten ancje dopo istituzionalizade.

Fintremai i inteletuâi talians a varessin di rivâ a capî une dinamiche dal gjenar, se a pensassin a ce che al è sucedût tal risorziment talian: il fatôr nazionalistic talian si messedave, te plui part dai idealiscj dal risorziments, cui valôrs liberâi, di modernitât rispiet al assolutisim.

Po par disgracie la Italie unide si è formade sot de monarchie Savoie, cuntun sisteme ancjemò plui incentradôr e assolutist di chel asburgjic o di chei altris presints te Italie preunitarie...

L'auguri e je che ai catalans, se mai a varan la indipendence, ur ledi un pôc miôr che ai talians.