Wickipedia

Al è un pôc di timp che no met sù nuie di gnûf, ma la cuistion e je che o ai dismenteât in Friûl la machine fotografiche!
In ogni câs par scrivi alc o cjapi ispirazion di une gnove dade dal furlanist. Il catalan al à 100.000 articui di Wickipedia.
Sigûr che in cheste enciclopedie libare a sucedin robis curiosis: il Catalan al rive a 100.000 articui; il furlan nancje a 2.500 (in ogni câs brâfs chei che ju àn scrits). Ce che al da di maravee a son chês che noaltris pal solit nancje no calcolìn lenghis: il venit, e che a 'nd à passe 7.000, il sicilian scuasi 12.000, il lombart e il piemontês 13.000 e rots.
Vino di disperâsi e di pensâ che o vin mancul articui di lôr e che il nestri moviment al è piçul che mai e indaûr come la code dal mus?
O pensi di no. Il fat al è che chei che i tegnin venit, sicilian, lombart e v.i. a àn di vê doprât wickipedia tant che lûc di rivendicazion, stant che no àn nissune leç serie che ju ricognossi e cussì a puedin lâ ator a dî "O vin un slac di articui di wickipedia: al vûl dî che la nestre e je une lenghe". Une cuintriprove che chest al è pussibil e ven dal Volapük, une lenghe artificiâl che si calcole fevelade di un 30 di lôr in dut il mont: a vuê al à 114.146 articui in wickipedia, plui che no il catalan, il rumen, il danês, il cec, l'ongjarês e v.i.
Consolìnsi: in Friûl o vin cirût di lâ plui sul pratic e o vin 3 leçs di tutele (buinis o mancul buinis) e int che e lavore ogni dì. Sperìn di rivâ une dì o chê altre a vê ancje une biele enciclopedie par furlan.