Pat pe Autonomie o astension (intune des sôs diviersis formis)


Si svicinin pardabon lis elezions: pai eletôrs furlans lis sieltis a somein trê, in realtât a son dôs, e diferentis di ce che a presentin i mieçs di comunicazion uficiâi.
Lis trê sieltis “utilis” presentadis dal sisteme uficiâl a son:
- votâ a centridiestre
- votâ a centriçampe
- votâ M5S
In sostance però il vôt indreçât intune cualsisei di chestis pussibilitâts al è compagn: a son agns che nissun nol è in stât di capî la diference jenfri centridiestre e centriçampe talianis, nissune des dôs no à ni i numars ni lis ideis par guviernâ e par fâ ce che i eletôrs si spietaressin, che in struc al sarès “salvâ la Italie” (e in concret salvâ i sparagns e lis prospetivis di ogni singul eletôr).
Cundut che di façade al somee une fuarce alternative, il M5S al à i stes difiets: nissune pussibilitât di guviernâ la republiche; un grum di ideis confusionadis che no puartaressin di nissune bande o che a puartaressin al disio par erôrs di calcul e par incoerence; inesperience aministrative aromai provade. Cun di plui, cemût che i jere sucedût ae Leghe, il svicinament al "podê dal Stât" al à za inviât la metamorfosi dal M5S: di moviment che al someave rivoluzionari, se al vinçarà avonde e se al rivarà a sorevivi ae sô stesse confusion, si trasformarà intune altre, gnove DC. Dut al fâs pensâ che cheste metamorfosi e sarès ancjemò plui svelte di ce che e jere stade cu la Leghe (che intant e à mot la sô pedine e si è metude te casele de ultradiestre).
Alore, in sostance, votâ cualsisei partît talian al è come astignîsi: al vûl dî delegâ il podê a candidâts che no valin nuie, che no rispuindin ni ai eletôrs, ni al teritori, ma a partîts che no àn nissune soluzion di ufrî e che a son bogns dome di gjavâsi dal confront cu la int contant une sdrume di bausiis.
Par fortune, rispiet a dutis lis variantis di astension, che in ogni câs no salvaran la Italie, ca di nô o vin il vôt pardabon util che o podìn dâ al Pat pe Autonomie: par salvâ il Friûl (e di chê strade, par ironie storiche, ancje Triest!!!).

Tristerie


Riccardo Illy a ogni pît alçât al fâs savê di jessi un candidât indipendent dal PD, anzit al è fintremai il so sproc eletorâl: intant che il PD al à sassinât la nestre autonomie e al voleve fâ ancje di piês cul referendum che par fortune al à pierdût, Illy al proclame di jessi paladin de autonomie speciâl. Se al sarà elet no si sa ben cemût che al podarà fâ valê cheste sô idee dentri dal so grup parlamentâr.
Francesco Martines, cun in bande un simbul dal pd picinin picinin picinin, e cuant che al pues ancje cence simbul, al ven fûr cui slogan “mancul bêçs ai armaments e plui ai asîi nît e ai ricercjadôrs” o “fasìn ricognossi la lenghe furlane e chê roseane come patrimoni de umanitât de UNESCO”: pecjât che Renzi e Gentiloni fin cumò a àn cresûts i bêçs pai armaments e che la maiorance PD a Rome e in Regjon e à tignût il furlan ben lontan de RAI e di une presince dignitose te scuele.
Debora Serracchiani e je la (no)protagoniste de campagne eletorâl plui lamie e lontane de int che si puedi visâsi des nestris bandis: e à di vê capît che la sô uniche pussibilitât di jessi votade e je che la int no si visi che e je in liste.
...
Conclusion: se i politics si vergognin di presentâsi come candidâts dal PD, i eletôrs a àn di vergognâsi di votâju.

PS: jo no mi vergogni di dî che tes ultimis regjonâls o vevi votât la Serracchiani, che e faseve sperâ di jessi mancul piês di Tondo, che forsit al jere stât pardabon piês, e Cristiano Shaurli. Dal sigûr no tornarai a votâ te stesse maniere. Za cumò tes politichis, e po tes aministrativis, o pues sielzi il miôr e no il mancul piês.




Parcè puedial someâ che o domandìn chê e simpri chê?

Cemût che si pues viodi des citazions che o ai publicât tes ultimis setemanis, a son tantis desenis di agns che i furlans a domandin autonomie, e cierts cantins a son simpri chei:
  • dirit di vê une buine aministrazion, plui decentrade che si pues;
  • dirit di doprâ chenti la plui part des tassis che o paìn;
  • dirit di destinâ l'ûs de aghe e de fuarce eletriche;
  • valorizazion des nestris lenghis e des nestris identitâts;
  • competence su la scuele;
  • dirit di cirî e di cjatâ il nestri destin inte storie, dirit di jessi un popul.
Se o domandìn simpri chel, si podarès pensâ che o sin indaûr, che o domandìn robis vecjis e no vin nuie di gnûf di dî.
Al contrari jo o pensi che al è il stât talian a jessi indaûr, a son i politics talians, cul lôr centralisim inaturâl, antifurlan e antitalian, a jessi fers a concezions che za 100 agns indaûr no funzionavin e che a àn puartât dome disgraciis: alore cuintri dal malfunzionament che al reste simpri chel, ancje lis domandis autonomistis a restin e a son simpri plui fuartis.


Vino di fevelâ di imigrazion?



Intant une premetidure:

  1. i emigrants a son personis, a àn i lôr dirits e i lôr dovês come ducj;
  2. la emigrazion e je un fenomen, che al pues sucedi in tantis formis.

Po disìn dôs peraulis su la nestre emigrazion.

140 agns indaûr lis primis nâfs di colons furlans a levin in Argjentine: no levin bessôi, ju vevin clamâts e selezionâts par popolâ ciertis zonis determinadis.

Pôc mancul di 100 agns indaûr tancj contadins de Basse furlane, clamâts e selezionâts par volê dal guvier francês, a levin a ripopolâ campagnis ocitanis, restadis cence oms par vie dai stragjos de prime vuere mondiâl e de epidemie spagnole, tancj operaris invezit a levin tes citâts.

A son dome doi esemplis: tai stes agns o tai agns dopo a son stâts fenomens compagns par lâ in Australie, Stâts Unîts, Canadà e v.i.

Al è un mît di butâ jù: chê de emigrazion no je stade une carateristiche tipiche furlane, cemût che si crôt tal imagjinari coletîf, l'istès a fasevin scuasi ducj i popui de Europe.

Par butâ jù un altri mît, o citi cemût che me visi une frase dal professôr di gjeografie Francesco Micelli: “i popui no migrin pe lôr miserie, al è plen il mont di popui che a muerin di fam ma a restin dulà che a son: i popui a migrin pe grande fam di lavoradôrs che a àn i stâts siôrs”.

Alore analizant ce che al è sucedût ai furlans o podìn viodi che a son migrâts ator par dut il mont in agns là che i guviers a decidevin in maniere organizade tropis personis che a coventavin, di dulà che a vevin di vignî e dulà che a vevin di lâ (e tornant ai esemplis di prime, la Pampa argjentine e la Vasconie no jerin dal sigûr un paradîs, par no fevelâ des minieris de Belgjiche).

A son un pocjis di desenis di agns che i guviers, soredut dai stâts europeans, a àn cambiât politiche: invezit di organizâ lôr e direzi i flus migratoris, a àn decidût che al è plui comut che lu fasi la criminalitât organizade:

  • nol covente paiâ i promotôrs des campagnis di imigrazion
  • nol covente garantî nissun dirit ai migrants
  • si pues doprâ la tension e la pôre par controlâ sedi i citadins europeans che i migrants

Cualsisei persone di sintiment e scuen dî che chest sisteme al è inuman, contrari ai dirits minims des personis e a un model di convivence civîl, ma il dibatiment che al è intai mieçs di comunicazion in Italie si centre dome sul fat di jessi “cuintri dai imigrâts” o sul fat di fâ fente di jessi “a pro dai imigrâts”, cence analizâ il fenomen de migrazion.

Ce che o vin di pretindi come citadins, al è che si torni a fevelâ dai problemis te lôr essence e te lôr complessitât, che si cjati soluzions: se i guviers dal fin dal Votcent e dal Nûfcent, cence satelits, drons e sistemis di ogni sorte, a rivavin a organizâ une migrazion plui umane di chê di vuê, a puedin fâlu ancje i nestris guviers.

Chest al vûl dî judâ i paîs di origjin dai migrants a organizâsi, a vê un sisteme scolastic miôr, a vê mancul coruzion, a vê plui ricjece; noaltris o varessin i vantaçs di une convivence serene a cjase nestre e paîs plui svilupâts tant che interlocutôrs tes relazions internazionâls.


E par intant:
NO votâ cui che al dîs di jessi cuintri dai migrants: al à dut l'interès a mantignî chest sisteme inuman;
NO votâ cui che al fâs fente di jessi a pro dai migrants:  al à dut l'interès a mantignî chest sisteme inuman.


Autonomie al vûl dî dâ valôr ae complessitât





Il sisteme centralistic al funzione tal interès di piçui grups, che aromai o podìn viodi ducj che a son deventâts une caste.

La caste dominante, in cambi di dutis lis risorsis che e tire dongje, no da nuie indaûr ae(s) comunitât(s), anzit e vûl predâ simpri di plui.

La preocupazion principâl de caste e je mantignî il so podê, aromai cence nissune justificazion: par chel e cîr di vê a ce fâ cuntune masse omologade, cun mancul identitât che si pues o cuntune sole identitât debile e pustice, facile di doprâ, tirant e sburtant cu la disinformazion, cu la pôre e cul imbroi di piçui torneconts individuâi.



Lis identitâts profondis invezit a oblein cui che al guvierne a un confront razionâl, a un sfuarç di comprension e di mediazion, ae ricercje di soluzions: a metin in evidence dulà che a son lis cuistions veris.

Il probleme grant dal centralisim al è che la complessitât e la presince di identitâts profondis a son la carateristiche fondamentâl dal Friûl, e ancje dal Friûl – VJ, e ancje de Italie, chê vere (par no fevelâ de Europe e dal mont): no dome a son une carateristiche fondamentâl, ma a son ancje une cause di ricjece e di oportunitâts.

Il centralisim, refudant di capî e di ricognossi la nestre complessitât, al decît di distruzi la nestre ricjece e lis nestris oportunitâts.

La Autonomie al contrari, e je la uniche strade par dâ valôr ae complessitât, par incressi pardabon la ricjece (in ducj i sens: inteletive, culturâl, morâl, economiche...) di ducj i furlans, e ancje di ducj i talians.



Mantignî la lenghe furlane al vûl dî mantignî la Autonomie


Il conflit cuintri de lenghe furlane e je une lote cuintri de sovranitât dai furlans.
La reson dai sfuarçs dal stât talian di scancelâ il furlan, chês altris lenghis minoritariis e fintremai i diviers dialets talians, e je chê di fâ che ducj i citadins a sedin omologâts: in cheste maniere no varessin reson di domandâ autonomie (o indipendence o di passâ sot di un altri stât...) e a saressin plui facii di controlâ e di comandâ.
Tai ultins 150 agns i centris di podê dal stât talian a àn puartât indevant il conflit linguistic in cheste maniere:
  • insegnant a scuele dome il talian;
  • escludint il furlan di dutis lis situazions uficiâls;
  • fasint che i mestris a disessin ai gjenitôrs che no vevin di fevelâ par furlan ai fruts, se di no no varessin imparât ben il talian (che e je une bausie dineade di ducj i studis pedagogjics)
  • fasint une propagande che e presentave il furlan tant che une lenghe di stale e di ostarie, dineant e impedint ogni sô valôr te vite moderne;
  • implantant un conflit distrutîf e razist: talian, lenghe dal savê, cuintri furlan, lenghe de ignorance;
  • relegant al folclôr lis espressions de culture furlane, magari cul colaborazionisim de Societât Filologjiche Furlane;
  • acetant di fâ lis leçs di tutele des lenghis minoritariis dome cun 50 agns di ritart rispiet ae costituzion de Republiche;
  • ridusint chestis leçs a no vê efiet par omission di aplicazion e tais di finanziament.
Cun dut achest a son ancjemò tancj furlans che a doprin il furlan e une maiorance straordenarie di furlans, ancje di chei che a fevelin dome talian, a calcolin che la nestre lenghe e sedi une part fondamentâl dal nestri patrimoni.
Tignìn ben a ments une robe: la lenghe furlane no je dome un patrimoni culturâl, nol è dome un dirit astrat.
La lenghe furlane e je une arme: mantignî la lenghe furlane al vûl dî difindi ducj i nestris dirits, e tra i prins chel di jessi aministrâts cun justizie e eficience, aministrant chenti i bêçs des nestris tassis.
La lenghe furlane e je fondamentâl par difindi la nestre Autonomie, la nestre Autonomie e je fondamentâl par difindi la lenghe furlane.


Che nissun disponi di nô sensa di nô



A cjaval de fin dal Votcent e dai prins 15 agns dal Nûfcent, il Friûl al jere tiere puare: tal Friûl “regnicul” la sole alternative ae miserie e jere la emigrazion. La Italie unide e jere plene di debits e cence prospetivis di progrès economic e sociâl. Ancje dal Friûl “imperiâl” e jere emigrazion, ma lis viertiduris dal Imperi a ciertis riformis a lassavin sperâ tun avignî miôr: il cooperativisim, massime di fonde catoliche, si slargjave jenfri slovens e furlans, che a mantignivin ognidun la lôr identitât e une buine colaborazion.

Lis figuris di riferiment dai furlans a jerin i deputâts Luigi Faidutti e Giuseppe Bugatto che a baterin une vore pal ricognossiment uficiâl dal popul furlan tal Imperi Asburgjic.

Sul finî de vuere, cul pericul di anession violente dal Friûl austriac al Ream di Italie, Faidutti e Bugatto a rivendicarin il dirit di autodeterminazion dal popul furlan. La sieradure dal discors di Bugatto tal parlament di Viene dai 25 di Otubar dal 1918 e je stade pronunziade tal furlan di Dael: “Se ducj nus bandonin, nus judarìn di bessôi, Dio che fedi il rest, no uarìn che nissun disponi di nô sensa di nô!”.

Pôc dopo il Ream di Italie al vinceve la vuere: il Friûl al jere unît sot di un stes stât, ma distrut de vuere, cuntune economie in zenoglon, nissune indenizazion e ricostruzion; a rivavin aventurîrs e criminâi di dute Italie par profitâ di une “tiere di concuiste” e par perseguitâ slovens e furlans austriacants.

Par reazion a cheste ocupazion, si slargjave in Friûl il socialisim e po il comunisim, cu la aspirazion ae costituzion di une Republiche Furlane indipendente.

Il Fassisim talian al scancelavave lis pussibilitâts di inverâ chest progjet: Faidutti e Bugatto no àn mai plui podût tornâ a Gurize, menaçâts di muart dai fassiscj; Zuan Minut, pont di riferiment dal socialisim e comunisim furlan, al leve in esili in Uruguay.

Cun dut achest, la volontât di autonomie e autodeterminazion dai furlans e je restade une vore vive, e e je ancje vuê.


Ce fasaressistu cun 250 milions di euros ad an?


250 milions di euros ad an al è ce che nus saressin costâts e che nus costaressin, plui o mancul, il pat Tondo-Tremonti e il pat Serracchiani-Padoan: no si pues jessi masse sigûrs, parcè che i numars no son trasparents, ma cheste cifre e somee chê plui basse e prudente.
Par cualchidun chê sdrume di milions a son un "regâl" fat dai presidents de nestre regjon al stât talian, che nol mancjarà di doprâju cu la sô solite eficience.
Daûr de mê interpretazion personâl, si podarès calcolâju plui une compre, che no un regâl: no sai... se jo o fos un politic che al dipent di un partît talian, o podarès ben spindi 250 milions di euros par comprâ la mê posizion tal partît e te schede eletorâl. Cualchidun al disarès che o soi mat, che a son masse bêçs, ma no ju paiarès migo jo, ju paiaressin ben i furlans...
Il vantaç de mê interpretazion e je che i regâi, al pâr mâl domandâju indaûr: invezit, se si compre un prodot che no si è sodisfats o se si pense di jessi stâts imbroiâts, si puedin vê i bêçs indaûr.
Viodût che come furlans o paìn chest acuist, o disarès di mandâ indaûr il prodot (Tondo e Serracchiani a cjase) e di domandâ indaûr i milions di euros, di spindi pe nestre comunitât.
NO al pat Tondo-Tremonti, NO al pat Serracchiani-Padoan.
SÌ al PAT PE AUTONOMIE


1946 - 2018. La nestre scuele, competence de nestre regjon: par fâ civiltât, par fâ Europe, par distruzi il spirt nazionalistic.




Ma, a parte tutto, si pensi con quale accuratezza e quale tendenza alla profondità ci si potrebbe curare in genere delle istituzioni a carattere educativo, in una regione così cosciente di sé come potrebbe divenire la friulana, per via della sua lingua e della sua tradizione. Del resto la mentalità dei suoi abitanti (sempre per restare in margine ai vantaggi troppo ovvii) è molto settentrionale, cioè nel tempo stesso positiva e romantica; molto adatta dunque a tramutarsi in “civiltà”. È in queste “civiltà” che si progredisce, che si distrugge lo spirito nazionalistico, che si coltivano problemi superpolitici, (come il federalismo europeo).

Pier Paolo Pasolini, 1946


Definizion di Autonomie


La mê definizion di Autonomie e je: mantignî plui risorsis e competencis che si pues a nivel locâl e doprâlis a pro de comunitât, invezit di slontanâlis intun centri lontan, che lis fâs sparî pro di une piçule caste privilegjiade.

Dome te autonomie e je la garanzie des libertâts democratichis

"Compito del Movimento Popolare Friulano è unire, al disopra di ogni partito, tutte le forze, fino ad oggi sparse, di coloro che nelle autonomie regionali vedono l'unica garanzia delle libertà democratiche."

Gianfranco D'Aronco, 1947

Pat pe autonomie - Une bataie che e va indevant


...
(Il stât talian) Al à di dânus chê autonomie par la cuâl lis aghis e la fuarce eletriche a no devente statâl, ma e reste furlane. Al à di dânus plui partecipazion tes tassis che o paìn.
Guai cuant che al piert la pazience il puar! Ur domandìn une robe: se no son bogns di aministrâ, che a vebin il coragjo di lâ vie; se a son bogns di aministrâ a àn di vê il coragjo di criticâ i lôr superiôrs. Nol è lecit plui te nestre tiere, nol è lecit no vê coragjo. Chel che no lu à pe nestre int, nol servìs la int, al servìs cualchidun altri.
...

Francesc Placerean, 1976