Al è un judiç a Berlin... e la Cort di Justizie de Union Europeane in Lussemburc

Oriol Junqueras al è il presindet di Esquerra Republicana de Catalunya, partît indipendentist di çampe.

Come altris al è responsabil de dinamiche che e à puartât al referendum (no autorizât de Spagne) di indipendence de Catalogne e ae sô repression.

Al è in preson di plui di doi agns: par tignîlu in preson cautelâr prime de condane, il public ministeri al veve montât cuintri di lui e di chei altris imputâts la acuse di ribelion, che po e je stade refudade fintremai te condane, dal Novembar passât.

Intant però a son stadis elezions: chês pal Parlament spagnûl e chês pal Parlament european.

Nancje la justizie spagnole no je rivade a improibîi a Oriol Junqueras di partecipâ, e di vinci, prime de condane: no son rivâts a cjatâ la maniere di gjavâi i dirits politics.

Une volte elet, pe Spagne, il deputât al à di lâ a zurâ di rispietâ la costituzion e di fâ cualchi firme e al pues partecipâ aes ativitâts dal parlament e al gjolt, si sa, di imunitât parlamentâr: nol pues jessi tignût in preson o processât o condanât cence domandâ il permès al Parlament stes.

Pe “justizie” spagnole chest nol è stât un probleme cuant che Oriol Junqueras al è stât elet deputât a Madrid tal Mai dal 2019: la maiorance dal Parlament di Madrid e je spagnoliste anticatalane e i à gjavât daurman la imunitât a Junqueras e a altris deputâts catalans, par che a puedin jessi processâts...

Il probleme al è rivât cuant che Junqueras al è stât elet tal Parlament European, simpri tal Mai dal 2019: i judiçs spagnûi a son paste intindude cui politics spagnûi, ma a san che in Europe al è un altri pâr di maniis. No ur varessin dât il permès di puartâ indevant un procès politic.

Alore a àn inventât une scuse incoerente e fûr dai semenâts: a Junqueras i àn permetût di zurâ su la costituzion pal Parlament spagnûl, no i àn lassât fâ l'istès pal Parlament european!!!

In cheste maniere, par un vizi formâl produsût di pueste, Junqueras (in compagnie cun altris indipendentiscj) al è stât declarât elet, ma po nol è stât includût te liste di parlamentârs euproeans spagnûi de Spagne stesse.

Il procès al è lât indevant, ma, par fâ fente di jessi un alc democratics, i judiçs a àn domandât ae Cort di Justizie de Union Europeane se Oriol Junqueras al veve imunitât come parlamentâr european cundut che il procès al jere za tacât e cundut che nol fos lât a zurâ su la Costituzion (parcè che no jal vevin permetût).

Fate cheste domande, però, no àn spietât la rispueste e a àn spessât a condanâ Junqueras e chei altris tal mês di Otubar.

Vuê e je rivade la sentence: pe Cort di Justizie de Union Europeane no valin nainis, Junqueras al jere parlamentâr e al veve imunitât, la formalitât di zurâ su la costituzion spagnole no à nissun valôr in Europe.

Nol podeve ni jessi tignût in preson, ni jessi processât, ni jessi condanât cence domandâ il permès al Parlament European.

Intun paîs civîl cheste sentence e compuartarès la nulitât de condane: in Spagne a ciraran cualchi altre scuse par tignîlu in preson ancjemò un pôc... juste par fâ viodi che a comandin lôr e che si sbatin des regulis de democrazie.

In Catalogne la sole soluzion (im)pussibile e je la autonomie

Tai agns dopo de fin de ditature franchiste jenfri Catalogne e Spagne al jere une sorte di ecuilibri positîf: i partîts autonomiscj, in particolâr di centridiestre, a tignivin in man la regjon e i garantivin une posizion di benstâ une vore plui alt de medie spagnole.

Di chê altre bande la Spagne e veve un vuadagn, parcè che si cjapave une biele fete dai contribûts dai catalans.

Ma di là de convenience al jere un sisteme politic che al corispuindeve al volê popolâr: si pues dî che intune maniere o intune altre, ducj i catalans a jerin autonomiscj, cualchidun al jere ancje indipendentist, ma par intant la autonomie i leve ben.

Chest ecuilibri positîf si è rot cu lis crisis economichis e politichis di chest mileni: si è passâts a sisteme un dulà che al somee che nol sedi avonde puest par ducj e alore invezit di tratâ cul aversari, si cîr di eliminâlu. In particolâr, i partîts spagnûi (in crisi par coruzion e ineficience) a àn viodût che i partîts catalaniscj (in crisi par incapacitât di cjatâ soluzions ai problemis sociâi de Catalogne) a jerin vulnerabii e a àn cirût di eliminâju une volte par dutis, par cjapâ il lôr puest tal guvier de regjon plui produtive de Spagne.

Za cheste dinamiche e baste par capî che la politiche spagnole no je tant democratiche, par vie che in democrazie vere a valin la tratative e il confront, l'obietîf di eliminazion dal aversari nol è previodût.

I partîts autonomiscj catalans, cjatant sierade cualsisei puarte ae tratative e restant cun ancjemò mancul mieçs par frontâ lis dibisugnis de regjon, a àn reagjît domandant 100 par vê 10: invezit di domandâ plui autonomie par no vê nuie, a àn tacât a fevelâ di indipendence sperant di vê plui autonomie.

Ma ancje cheste dinamiche ur è scjampade di man a ducj e si è polarizade: il confront politic si è zuiât, a nivel spagnûl, su cui che al jere plui anticatalan (une gare vergognose, che e finìs pate), a nivel catalan e je stade la rivalitât su cui che al jere un indipendentist plui vêr di chei altris.

La agression anticatalane puartade indevant dai partîts spagnûi e je stade un at criminâl, ma i catalaniscj a àn fat une rie biele lungje di erôrs, consolâts dome dal fat che i erôrs de Spagne a jerin plui grues. Cumò i efiets plui bruts, a nivel sociâl e politic a son doi:

• te polarizazion dal confront al è restât pustot il cjamp de autonomie: i partîts catalaniscj par mantignî visibilitât, e vôts a àn di jessi indipendentiscj, un eventuâl messaç autonomist al somearès viliac e traditôr;
• il confront politic si è slontanât dal minim comun denominadôr dal sintî politic dai catalans, che al jere stât par desenis di agns e che al è ancjemò la autonomie.

Il risultât al è che a son stâts partîts anticatalans che a àn cjapât sù la bandiere de autonomie (une vore false) cuintri de indipendence, e che une grande fete di eletorât al è obleât a votâ par posizions che nol condivît. Di fat a scuegnin votâ:

• o i partîts indipendentiscj, che a rivin parsore dal 40% dai vôts, intant che dome il 30% (forsit) dai catalans al votarès pe indipendence intun referendum
• o partîts spagnoliscj che a disin di difindi la autonomie, ma che in realtât tai ultins agns le àn dome impedide e disvuedade
• o piçui partîts che a cirin dome di sorevivi, che a disin di jessi vierts, in teorie, a diviersis eventualitâts, ma che in pratiche su chest teme no proponin nuie e no rapresentin nissun.

Cjalade dal difûr la situazion e à une soluzion perfete, clare e democratiche: al varès di nassi un partît autonomist autentic (no fals), in câs viert ancje ae indipendence se la autodeterminazion e puartarà di chê bande (ma fin cumò no va cussì), ma che al vedi di prin obietîf chel di meti in vore une autonomie fuarte pe Catalogne e che al canalizi lis fuarcis su chest teme.

Un partît dal gjenar al varès un bacin potenziâl dal 70-75% dai vôts: di fat si podarès permetisi ancje di fâ sù doi partîts autonomiscj cun visions sociâls diviersis, ma ducj i doi autentics.

Cheste e sarès ancje la uniche soluzion pussibile ae crisi politiche tra Spagne e Catalogne.

Ma tal stes timp e je ancje une soluzion impussibile, par vie che la polarizazion e je lade masse indevant e tornâ al teme de autonomie, ancje se al sarès inteligjent e democratic, no i convignarès a nissun dai centris di podê:

• i partîts catalaniscj che si son butâts sul indipendentisim a passaressin de centralitât ae margjinalitât residuâl;
• pai centris di podê spagnûi une autonomie vere de Catalogne e sarès pôc mancul disastrose che la lôr indipendence: il sisteme di coruzion e ineficience al à masse bisugne dai bêçs dai catalans.

Alore invezit de sole soluzion pussibile e democratiche, si pues previodi* che e sarà la soluzion plui conveniente pai partîts: vâl a dî, lâ indevant come cumò, cence nissune soluzion e cence nissun dialic.

(*) Dopo si sa ben che lis previsions no tegnin mai cont di dut...

La dimension nazionâl de cuistion catalane

La propagande anticatalaniste e pant il so discors plui di dut su chescj ponts:

1. la cuistion catalane si fonde su rivendicazion nazionalistichis/etnichis anacronistichis tun moment storic dulà che si à di unîsi e no di dividisi
2. (version pal forest) i indipendentiscj a son egoiscj di diestre, che no vuelin condividi lis lôr risorsis cui spagnûi plui puars e che a metin in pericul la Europe, come chei altris moviments sovraniscj di diestre in Europe
3. (version pe Spagne) i indipendentiscj a son radicâi di çampe, che a metin in pericul l'ordin costituzionâl

Ducj i tre chescj ponts a son fals: chei plui facii di dimostrâ a son il 2 e il 3, stant che si escludin un cun chel altri.

Il fat che l'indipendentisim catalan al sedi un sovranisim di diestre si dinee ancje dome cul fat che i siei nemîs plui estrems a son propit i sovraniscj di diestre spagnûi, vâl a dî i neofranchiscj di VOX (amîs de Lega di Salvini...)

Invezit il fat che l'indipendentisim al sedi un moviment radicâl di çampe al ven dineât dai risultâts eletorâi: tra i partîts che si declarin indipendentiscj chel maioritari al è di çampe moderade (Esquerra Repubilcana, 22,56% dai vôts tes ultimis elezions) il secont al è di centridiestre (Junts per Catalunya, 13,68%) e dome il tierç al è di çampe plene (CUP, 6,35%). Par altri al è di notâ che une buine fete dal eletorât catalanist al à facilitât di cambiâ orientament jenfri Esquerra Republicana e Junts per Catalunya, daûr di episodis o situazions contingjentis.

La realtât alore e je che il moviment catalanist/indipendentist al è trasversâl, di çampe a diestre e des fassis sociâls puaris fin a chês de grande imprenditorie: chest element al è une vore impuartant e al da une fuarce e un valôr straordenari a chest fenomen, ma cemût che si pues viodi, par esempli, te stampe taliane, al da une complessitât dificile di capî par cui che al è usât a pinsîrs e informazions semplificadis. Par altri se il mont informatîf talian in gjenar nol rive a capî e a interpretâ nancje la realtât taliane, no si pues pretindi che al sedi bon di capî lis situazions complessis di altris bandis dal mont...

Il fat che la cuistion catalane e sedi nazionaliste-etniche al è ancjemò plui complès, e ancjemò plui interessant, par vie che al oblee a tornâ a frontâ e a capî il concet di nazion.

Cualsisei che al vedi vivût in Catalogne o che le vedi ancje dome visitade cui voi vierts, al sa benon che il concet di “etnie” catalane nol esist: la catalanitât e je la partignince a un teritori e a une culture, l'amôr par une lenghe cence esclusion di chês altris. La catalanitât e je vierte a ducj chei che a vegnin a stâ in Catalogne, cence nissune discriminazion di “sanc”, “colôr”, “religjon”, e in fin dai fats nancje di lenghe. Al è clâr che la lenghe catalane e je un fatôr di coesion sociâl impuartant, ma tes protestis dai ultins agns a van ancje personis che il catalan, magari lu san come seconde lenghe, ma no lu doprin mai e a fevelin simpri par spagnûl.

Un altri element al è la mancjance totâl di conotazion razistichis: frasis o pinsîrs come “i spagnûi che a tornin a cjase lôr” a son alc di impussibil di imagjinâ in Catalogne. Tal moment stes che un imigrât, de Spagne o dal rest dal mont, al va a vivi in Catalogne, al devente part de comunitât teritoriâl catalane, cui stes dirits e cui stes dovês di chei altris e cence barieris identitariis: po al è libar di sielzi lui il so nivel di integrazion e identificazion.

Al è di notâ ancje che tes protestis dai ultins agns il fatôr linguistic e identitari a son presints a doi nivei:

1. a son presints parcè che a son naturâi in cualsisei fenomen de societât catalane
2. a puedin jessi sprocs di difese de lenghe catalane, ma dome in rispueste aes tantis menacis dai partîts nazionaliscj spagnûi di gjavâle de scuele e de uficialitât

Alore la lenghe e la identitât catalanis a son un ingredient dal fenomen, a son un fatôr di coesion sociâl a priori, ma no son par nuie il vêr pont di confront.

Il confront vêr e il nivel di concezion di nazion a son suntun altri plan, che al è chel di comunitât politiche. La nazion catalane e je la comunitât di personis che a vivin in Catalogne e che a vuelin jessi sogjet politic, titolârs di dirits e podês coletîfs, no dome a nivel individuâl e nancje dome a nivel di citadinance spagnole o europeane.

Dome une minorance dai catalans e je indipendentiste, ma almancul un 75% dai Catalans al à cussience che i catalans a formin une nazion distinte dentri dal stât spagnûl e che a àn il dirit di decidi dal lôr destin (autodeterminazion) e ancje dal rapuart politic e economic di vê dentri dal stât spagnûl (autonomie).

Alore la cuistion nazionâl catalane, tal so confront di vuê, no à nuie di anacronistic, no je une cuistion etniche o linguistiche o egoiste o sovraniste: e je la cuistion di une comunitât teritoriâl che e rivendiche il dirit di jessi sogjet politic autonom, rispiet a un podê centrâl dal stât che i dinee chest dirit, e che al à tindincis autoritariis a dineâ une vore di dirits democratics.

E je une cuistion pardabon atuâl: chê dai dirits politics individuâi e coletîfs e chê des fondis de democrazie.

Il fatôr che al da dongje lis protestis, sostignudis ancje di grande part no indipendentiste, al è la incapacitât politiche spagnole, la sô struture corote, la sô reazion autoritarie: lis protestis a son indreçadis cuintri dal sisteme feudâl spagnûl, no cuintri de identitât o de nazion spagnole.

La nazion Catalogne e da une prospetive di democrazie vere, di eficience che e permeti mancul coruzion e plui prosperitât.

In fin dai fats a son lis promessis di progrès e libertât che a dan dutis lis nazions ancjemò no istituzionalizadis (ancje chê furlane), e che cualchidune e manten ancje dopo istituzionalizade.

Fintremai i inteletuâi talians a varessin di rivâ a capî une dinamiche dal gjenar, se a pensassin a ce che al è sucedût tal risorziment talian: il fatôr nazionalistic talian si messedave, te plui part dai idealiscj dal risorziments, cui valôrs liberâi, di modernitât rispiet al assolutisim.

Po par disgracie la Italie unide si è formade sot de monarchie Savoie, cuntun sisteme ancjemò plui incentradôr e assolutist di chel asburgjic o di chei altris presints te Italie preunitarie...

L'auguri e je che ai catalans, se mai a varan la indipendence, ur ledi un pôc miôr che ai talians.

Spagne: (scuasi) dut come prime...

Lis elezions spagnolis a presentin cualchi mudament che al pues someà scjassôs, ma che in realtât nol cambie nuie: la “çampe” e la “diestre” spagnole a restin come dôs taulis dividudis, li che chei che a mangjin (i partîts) a restin simpri su la stesse taule e si gjavin la robe dal plat cun chei che a àn dongje, ma no rivin a cjapâ ce che al è ta chê altre taule. I numars dai macroecuilibris politics a restin scuasi compagns: se i numars a restin compagns, ce che al varès di cambiâ e varès di jessi la disponibilitât al dialic...

In detai

PSOE (socialiscj): al piert pôc, al passe di 123 a 120 deputâts, al reste prin partît in Spagne ma Pedro Sanchez, responsabil dal faliment des tratativis di guvier e di chestis ultimis elezions, si slontane de pussibilitât di guviernâ.

PPE (popolârs, in realtât no di centri ma di diestre): dopo de disfate des elezions di Avrîl si ripie, passant di 66 a 88 deputâts, in part al è un recupar fisiologjic, in part il risultât di fuarcis conservadoris che si son motis pa evitâ che il partît al sparìs.

VOX (diestre neofranchiste): al passe di 20 a 52. Al somee che al stravinci, ma cence efiets concrets: in struc, une grande part dai vôts di diestre che prime a levin a Ciutadans, cumò a son lâts a VOX. Chest risultât al è stât pilotât des fuarcis conservadoris spagnolis, cuntune campagne di stampe che e à favorît i neofranchiscj, dome par ripristinâ ecuilibris plui favorevui al PPE.

UP (unidas podemos, çampe): al passe di 42 a 35 deputâts. Al paie il fat di vê mantignût la posizion moderade su la crisi de Catalogne, che in sostance al è stât il sôl argoment de campagne eletorâl. Cundut di cheste pierdite al manten e forsit al cres la sô fuarce, determinante se il PSOE (salacor cence Pedro Sanchez) si decidarà a fâ un guvier progressist.

CIUTADANS (liberâi populiscj): a passin di 57 a 10 deputâts. E je la disfate plui grande di chestis elezions. Ciutadans, che al veve la funzion storiche di meti in crisi i partîts catalaniscj, al veve falît in Catalogne, ma al cresseve in Spagne rivant contindi il primât de diestre al PPE: lis fuarcis conservadoris a àn regjît neutralizant chest pericul, a favôr dal PPE e, pal moment, di une diestre ancjemò plui radicâl, chê di VOX.

INDIPENDENTISCJ catalans: jenfri ERC (çampe republicane, 13) JxCat (catalaniscj di centridiestre, 8) e CUP (çampe catalaniste plui radicâl, 2) a cressin e a rivin a 23 deputâts: al reste di viodi se a rivaran a fâ une cierte pression o se a Madrid a cjataran, come fin cumò, un mûr che nol permet nancje il dialic. Al reste di notâ che i partîts che si declarin indipendentiscj in Catalogne a son passâts di une sume pôc sot dal 40% al 42%. Une cifre in sostance stabile, une vore impuartante, ma ancje une vore lontane di ce che al coventarès par une prospetive concrete di indipendence.

Metisi de bande de Spagne: une cuistion lessicâl

Par capî chei altris, pôc ce dî, si à di cirî di metisi tal lôr puest.

Par capî la Spagne, al somearès di no, ma cualchi volte si scuen propit jessi linguiscj.

Trops no àno dite che une lenghe e je la espression di dut un mût di viodi il mont?

E di fat e je vere, e si viôt ancje tal spagnûl (o castilian): alore cirìn di metisi tal puest dai spagnûi, di doprâ lis lôr peraulis par viodi il mont cui lôr voi.

O fâs doi esemplis: un al è chel dal "odio" (par furlan "odi"). Ben, pai furlans l'odi al è un sintiment, magari brut; par chei che a crodin al è ancje un pecjât; ma pai spagnûi al è ancje un delit, e magari a àn reson. Di fat il delit di odi ("delito de odio") al è stât introdusût tal codiç penâl par difindi i membris di grups vulnerabii. Tal sît dal ministeri dal interni spagnûl si lei a clâr che il delit di odi al è un cualsisei delit che si fâs cuintri di une persone sielzude di un precîs par vie che e fâs part di un grup caraterizât di “raze, origjin nazionâl o etniche, lengaç, colôr de piel, religjon, gjenar sessuâl, etât, minorazion mentâl o fisiche, orientazion sessuâl o altri fatôr simil”.

Ve che alore ducj i grups a puedin fâsi difindi de leç spagnole, ancje i puars poliziots che tantis voltis, cuissà parcè, a sintin che la int no ur vûl ben, e alore al vûl dî che ju odee!

Ma une imagjin e vâl mil peraulis e alore ca sot al è l'esempli di un episodi di “odi”, che la polizie spagnole e à denunziât tal 2017.

Al è di ridi, ma nol è un scherç: par metisi un nâs ros, Jordi Pesarrodona (che di mistîr al fâs propit il paiasso) al è stât denunziât de polizie par delit di odi.

Un altri esempli linguistic: il manganel (in foto)

Tal spagnûl (e ancje tal catalan) popolâr al manganel i disin “porra”, par vie de forme che si somee cuntun puar (lat. porrum, lat.sient. Allium ampeloprasum). Ma chest nol è il tiermin tacnic.

Il tiermin tecnic spagnûl (e ancje catalan), doprât dai poliziots, par dî manganel al è: “defensa”, ven a stâi “difese”.

Alore ca si capìs dute une vision dal mont: in Friûl, no sai, i laçs a coventin par laçâ lis scarpis, i botons par botonâsi, lis protezions (par esempli un scût) par protezisi, e sì, il manganel al covente par manganelâ.

Ca sot invezit e je une foto dulà che si viôt benon un poliziot spagnûl che al è daûr a doprâ la “defensa” (duncje al è daûr a difindisi): chel altri alore (che al à intor une tessare che e podarès jessi di gjornalist...), tal concet spagnûl, al è un agressôr.

La maniere spagnole di interpretâ l'autoritarisim

Par capî ce che al sucêt in Catalogne, si scuen capî la Spagne: no je une robe tant facile par vie che lis contradizions jenfri moderni e antîc, viert e sierât, zentîl e ruspi si messedin inte Spagne e tai spagnûi (e ancje in Catalogne e tai catalans) in manieris une vore diviersis di ce che un citadin european al è usât a viodi in cualsisei bande de Europe.

Un esempli al pues jessi chel de interpretazion spagnole dal autoritarisim, partint de prime metât dal secul XX.

In paîs come Italie e Gjermanie il nazisim e il fassisim a vevin alc di moderni, di rivoluzionari: semplificant une vore, a jerin la version strassomeade dal socialisim, sielzude e sostignude dai “parons” par metisi al sigûr rispiet al comunisim rivoluzionari, che al jere rivât a eliminâ e a cjapâ il puest dai “parons” in Russie. Il sisteme fassist e chel nazist (e ancje chel comunist) si fondavin sul control capilâr de societât: su la sô costruzion fin tai detais plui piçui, tune rêt une vore strete (ancje se no simpri eficiente) di spiis e di repression. A jerin sistemis dulà che cui che al pensave in maniere divierse al jere pericolôs, al veve di jessi isolât, eliminât, si veve di evitâ che si gjeneràs. Al jere un sfuarç straordenari, cussì grant che al veve bisugne ancje di energjiis profondis, di mût che il sisteme stes al deventave une gnove religjon.

In chest sens, e in altris, il Franchisim nol è mai rivât a jessi pardabon fassist e pardabon totalitari: masse fadie. Il Franchisim al jere in sostance la continuitât dal feudalisim spagnûl, sostignût e sostignidôr des struturis clericâls, cence i elements di novitât e di capilaritât tipics dai totalitarisims.

In Spagne si podeve pensâ pressepôc ce che si voleve, si podeve fintremai dîlu, dentri di cierts limits, tant nol cambiave nuie. Ce che no si podeve fâ al jere lâ a tocjâ pardabon i interès dai parons, chel no.

Ma il sisteme nol jere capilâr e intensîf; al jere invezit propit come la agriculture feudâl, estensive, pôc impegnative, mieze pustote. Il podê dal feudatari si viodeve tal so paternalisim, tune violence asistematiche e arbitrarie, te inutilitât e incapacitât stessis dai parons: dome un podê straordenari al pues mantignî ad alt parons cussì bogns di nuie.

Cheste interpretazion spagnole dal autoritarisim e jere une vore prime di Franco, vecje di secui, e e je restade ancje dopo Franco: e je ancje vuê, e no dome tai siei erêts di diestre.

La fonde dal autoritarisim spagnûl, vâl a dî la difese di posizion dai “parons” cuintri di cualsisei riforme, e je ancje la fonde dal Partît Socialist Spagnûl (PSOE), che al dopre la repression tipiche spagnole, in belance tra il crudêl e l'imbranât, cuintri des rivendicazions catalanis, che a àn une colpe grande: chê di lâ a tocjâ i interès dai parons, di riscjâ di fâ mancjâ i bêçs des tassis catalanis al sisteme di coruzion e clientele dai partîts e dai grups economics spagnûi.

Di là de violence de polizie, cualchi esempli de repression imbranade:

• lis autoritâts spagnolis  a àn imponût a radio e television publiche catalane di no doprâ i tiermins “presonîrs politics” o “esili”: come risultât chês radios e televisions a mandin par ogni notiziari un avîs regjistrât dulà che a disin che ur àn proibît di dî “presonîrs politics” e “esili” (disint a clâr chescj tiermins tal avîs!) e che lôr no son dacuardi e che le calcolin censure...
• la justizie spagnole e à blocât il sît www.tsunamidemocratic.cat (sît di organizazion di proteste NO VIOLENTE) cu la acuse di terorisim!!! Il bloc al funzione dome in Spagne, alore salacor dal Friûl si pues viodilu, e viodi trop che al è terorist. Ma tant tsunami democratic al funzione plui cui telefonins, cu la app telegram, che no cu la rêt web...

• cjapât de paranoie o de bisugne di mostrâ che al fâs alc, il Guvier Spagnûl al à mandât fûr un decret li che si autorize di bessôl a controlâ internet e sierâ cualsisei web o servidôr cence bisugne dal ordin judiziâl (nancje di un judiç spagnûl!)
• Pedro Sanchez, president dal guvier, in campagne eletorâl si è a pene svantât di controlâ i judiçs par otignî la estradizion in Spagne dai politics catalans scjampâts tal forest (in particolâr Puigdemont in Belgjiche): i judiçs subite si son sustâts, par vie che se al dîs cussì, in Belgjiche a savaran che no je division di podês e duncje a calcolaran Puigdemont un perseguitât politic e magari no daran la estradizion!!!

Catalogne: la percezion de memorie storiche e de identitât presinte

Tai prins agns dal 2000, cuant che o ai stât pe prime volte a Barcelone, une des robis che mi vevin interessât e jere la presince vive di fats storics, che tai agns a someavin scuasi lontans: in particolâr si fevelave dai fats de vuere civîl spagnole (finide a pene prime che e tacàs la seconde vuere mondiâl) cuntune vore di plui di partecipazion che no lis nestris storiis di partigjans, todescs, fassiscj e cosacs. Par nô chei fats, ancje vivûts in famee, a son une memorie impuartante, ma in Catalogne a son ancjemò une robe presinte, sedi a nivel di int, che a nivel di stampe e di politiche.

Baste viodi che ogni altre dì i gjornâi a fevelin de scuvierte di cualchi fuesse comune dai timps de vuere civîl, che i politics di vuê a fasin inmò riferiment ai presidents de Catalogne dai agns 30, e fintremai, a nivel spagnûl, il partît socialist si è impegnât intune bataie une vore dure par esumâ i rescj di Franco, gjavâju de tombe monumentâl dal Valle de los Caídos, par metiju intun cualsisei cimitieri, a sielte dai siei erêts. Cheste esumazion, che po si è trasformade intune cerimonie franchiste, deventant un altri episodi di autolesionisim dal partît socialist spagnûl, e je robe di cumò!

In Italie il fassisim al à pierdût la seconde vuere mondiâl, Mussolini al è stât justiziât, cundut de impunitât di tancj fats de vuere e di prime de vuere, al è stât un cambi di classe dirigjente, in pratiche ducj i partîts dal postfassisim a vevin partecipât in cualchi câs ae resistence.

In Spagne invezit Franco al è muart tal so jet, e al à fintremai decidût il so sucessôr, il re Juan Carlos (pari dal re Felipe di cumò); une buine fete di franchiscj “riformadôrs” a àn fondât il Partît Popolâr Spagnûl, che fin cumò si è alternât tal guvier di Spagne cui socialiscj: in struc pe Catalogne (e par dute la Spagne) il risultât de vitorie franchiste te vuere civîl nol è tune fase storiche passade e finide, ma al à i siei efiets inmò vuê.

In Catalogne il mont de informazion e de divulgazion storiche a son responsabii di une rielaborazionon une vore particolâr: la vuere civîl, te cussience coletive dai catalans di vuê, e je stade plui di dut une vuere de Catalogne liberâl, democratiche, socialiste, comuniste e anarchiche, cuintri de Spagne fassiste! No si ten cont che ancje in Catalogne a jerin partidants de ditature e che, par esempli, ancje a Madrid e je stade une lungje  e tragjiche resistence antifranchiste, cun tant di citât assediade.

La percezion rielaborade e “comedade” dal passât dispès e puarte a no viodi la complessitât politiche tal presint, o a sintîle dome in forme di tension o frustrazion: i catalans che, cun dutis lis resons, a rivendichin il lôr dirit di autodeterminazion (e altris dirits civîi fondamentâi) a sintin che la lôr cause e je cussì juste e inlidrisade te lôr storie e identitât, che a fasin une pression straordenarie sui partîts “indipendentiscj” e no tegnin cont di un detai impuartant: scuasi metât dai catalans a son invisibii tes placis, ma a van a votâ e a sielzin partîts spagnûi o filospagnûi...

Chest fenomen par gno cont al è une des resons de pierdite di control dai partîts su la societât: di fat no rivin a conciliâ doi nivei, chel dai eletôrs indipendentiscj, che a son simpri plui convints ma che no son avonde di numar, e chel de societât catalane, che e je di guviernâ e di "progjetâ" tal so complès.

Dirit di informazion

Un dai dirits fondamentâi tai stâts civilizâts, al è il dirit ae informazion.

Daûr di chest postulât o podìn judicâ a ce nivel di civilizazion che si cjatisi in Spagne, tal câs de crisi catalane.

Tai scuintris dai dîs passâts al è stât l'impegn di tancj gjornaliscj, massime catalans e spagnûi, ma ancje internazionâi: par fâsi cognossi e no jessi atacâts son metûts un gjilè speciâl colôr naranç e un polset dal stes colôr cu la lôr increditazion. Par prudence, dopo un pôc, a àn tacât a metisi ancje casc e ocjâi di protezion... no si sa mai.

Cussì i gjornaliscj a jerin une vore facii di individuâ e cun di plui, un pôc par dâsi sigurece, un pôc parcè che si cjatavin in cunvigne su cuâi che a jerin i ponts di osservazion miôr, si devin dongje in piçui trops colôr naranç.

Te setemane passade a son stadis fintremai 65 agressions a gjornaliscj: si podarès pensâ che i catalans, rabiâts dopo agns di campagnis di disinformazion cuintri de Catalogne, a vedin atacât i gjornaliscj dai mieçs di comunicazion dal rest de Spagne... ma cheste e je la spiegazion dome di 5 câs.

In 2 câs a son stâts i manifestants di ultradiestre, sostignidôrs de unitât di Spagne, a atacâ i gjornaliscj: “dome” 2 câs a son pôcs su 65, ma calcolant che i “fassiscj” si son viodûts dome une volete e che a jerin cuatri gjats (200 di lôr) rispiet aes desenis o centenârs di miârs di catalaniscj, a mostrin dal sigûr un alt nivel di agressivitât (che di fat po si è sbrocade ancje su fantats antifassiscj).

Ma il dât che al lasse plui impressionâts al è che di 65 agressions a gjornaliscj, 47, vâl a dî plui dal 70%, a son stadis fatis de polizie! E i poliziots, no àn fat diferencis, a àn pestât i gjornaliscj di dutis lis testadis.

Te prime dì, te ocupazion dal aeropuart, al jere za stât un brut episodi: i poliziots a vevin bersaiât di proietii di gome (che in chescj dîs a àn svuarbât di un voli cuatri di lôr) smicjant dret un grup di gjornaliscj, ducj insiemi e impussibii di sconfondi cui manifestants.

Po, vinars stât, te gnot plui “vivarose”, a son rivâts fintremai a arestâ cun violence un fotograf di “El País”, un cuotidian spagnûl e spagnolist!!! La sô colpe e je di vê protestât par vie che i vevin impedît di fotografâ un arest: un poliziot spagnûl al à pierdût la pazience, al à dite ai siei coleghis che il fotograf al jere violent e i son saltâts intor in trop, lu àn malmenât e strissinât vie che al zigave dal mâl che i fasevin, sot dai voi dai siei coleghis...

E cussì vuê la Spagne, “une des plui consolidadis democraziis dal mont” (peraulis dal so ministri dal forest) si cjape un riclam uficiâl de OSCE, la Organizazion pe Sigurece e Cooperazion in Europe, par vie che no garantìs la sigurece dai gjornaliscj: al sarès plui coret dî che la polizie spagnole si impegne propit par menaçâle, la lôr sigurece.

Tal mieç di dute la crisi catalane, un piçul tribût al va ancje ai gjornaliscj, che vuê a àn manifestât in Plaça Catalunya par che si rispieti il lôr dirit di lavorâ e informâ (o ancje disinformâ) cence jessi pestâts (tal 72% dai câs, dai poliziots).

Pedro Sanchez e il PSOE a cjapin a diestre, a pierdin il control e a finissin tal fossâl...

La storie politiche di Pedro Sanchez e je fate plui di pazience che di vitoriis.

La sô sielte plui famose, e di sucès, e je stade la mozion di sfiducie cuintri dal guvier di diestre di Mariano Rajoy, te Vierte dal 2018, cuant che il Partît Popolâr al jere aromai subissât dai scandui de coruzion.

Vinte la mozion di sfiducie al à cjapât il podê e al à puartât la Spagne a gnovis elezions, là che il PSOE al è vignût fûr prin partît, ma cun masse pôcs parlamentârs par podê guviernâ di bessôl.

Al jere dal sigûr un moment di sieltis impuartantis: fâ un guvier cu la çampe di Podemos, magari sostignût di partîts catalans e bascs che a vevin poiât la mozion di sfiducie a Rajoy? O fâ un guvier cui populiscj messedemierde (scusait la espression masse tecniche, ma e je la uniche precise) di Ciutadans, che a son aromai di diestre? O fâ un grant guvier di unitât nazionâl anticatalane insiemi cu la diestre spagnole (il Partît Popolâr a pene distronât e Ciutadans)?

Un partît progressist nol varès vût dubis: aleance cun Podemos, bascs e catalans, sbassament de acuse di stât (che al jere part in cause) ai presonîrs politics catalans di ribelion/sedizion a disubidience (che e jere ancje vere e che ju varès condanâts a multis e inabilitazion des incarghis publchis), tratative cu la Catalogne, cun concession di une autonomie plui grande rispiet a chê di cumò.

Une sielte dificile di justificâ cui eletôrs spagnûi, aromai incjocâts di agns di campagne disinformative anticatalane, ma une sielte juste e soredut conveniente par ducj: pe Spagne, pe Catalogne, pal PSOE.

I partîts di diestre a varessin sberlât “traditôr” cun dute la vôs che a vevin: ma parcè un partît progressist varessial di vê pôre des acusis zigadis dai fassiscj? I eletôrs di diestre in ogni câs no votaran PSOE...

Par altri ancje la concession di plui autonomie ae Catalogne e sarès stade une conveniente “caritât pelose”: e je vere che cence i bêçs de Catalogne, la Spagne e siere buteghe, ma i vûl timp. Intant l'indipendentisim che al jere za in crisi, si sarès disglonfât, dividût e disarticolât: i socialiscj a saressin stât la part “umane” de Spagne, il partît socialist catalan, che al è gregari assolût dal partît spagnûl, al varès cjapât un grum di vôts cul merit di puartâ un risultât concret, la Catalogne e varès vût un guvier di çampe socialiscj+catalaniscj di çampe, che i varès tornât al PSOE il favôr, cun bielis clientelis. Di là des concessions di principi i socialiscj a varessin concedût avonde pôc e a varessin vuadagnât il control di une regjon impuartantone.

Man il fat al è che il PSOE di Pedro Sanchez nol è plui un partît progressist, al à zirât a diestre, si è metût a cori daûr dal PPE e di Ciutadans intal nazionalisim spagnûl, al è coresponsabil di une condane vergognose destinade a jessi scancelade de justizie europeane, al è responsabil di cheste ultime repression violente de polizie, che e je un faliment storic che aromai al varà efiets internazionâi.

E cussì, zirant a diestre, al à cjapât un brut sens unic e al è finît tal fossâl: par vie dal grant mâl de politiche spagnole, la incapacitât di dialic, Sanchez nol à podût formâ un guvier cun nissun e ai 10 di Novembar la Spagne e tornarà a votâ, pe cuarte volte in 4 agns.

I eletôrs spagnoliscj no lu votaran vulintîr parcè che al è “masse tenar” cui catalans (lôr a domandin la imposizion de leç marziâl in Catalogne), chei di çampe i daran la colpe di no jessi bon di fâ un guvier nancje se al vinç, i democratics no lu votaran pal scandul de repression in Catalogne, e i Catalans in bloc (1/6 dai citadins spagnûi) no lu votaran plui, cualsisei posizion che a vedin, par vie che invezit di risolvi la lôr cuistion, al à butât sâl su lis feridis...

Un biel spieli par ducj i partîts progressiscj che a zirin a diestre: a finissin tal fossâl.

Contradizions catalanis

Societât mobile - Istituzions imobilis

Lis manifestazions dai ultins dîs a mostrin une capacitât evolutive une vore svelte de societât catalane, o almancul di chê part che e va in strade a sostignî lis sôs ideis. Dopo agns di manifestazions pacifichis, in pôcs dîs si à vût une evoluzion une vore minoritarie, ma ancje une vore ative e incisive, in azions violentis, e po tal zîr di pôcs dîs un adatament dai no violents che a son tornâts protagoniscj in maniere straordenarie: cordons di manifestants no violents, a pericul di vê dams fisics no di pôc, si son metûts tal mieç jenfri polizie e manifestants agressîfs, cirint di tignîju indaûr e di isolâju.

A chest pont fintremai la polizie e à inzornât la sô tatiche, che tai prins dîs e jere stade falimentâr/criminâl: jenfri sabide e domenie la violence, invezit di cressi, e je calade (no si sa par trop).

Di chê altre bande lis istituzions no mostrin chê stesse capacitât di adatament: a Madrid si refudin di fevelâ cu lis istituzions catalanis, che par lôr cont a son a slas, cun responsabii che a disin ognidun ce che i conven e che no rivin a fâ propit nuie di bon.

Salacor la situazion e cambiarà dopo des elezions spagnolis dai 10 di Novembar, prime la campagne eletorâl e je plui impuartante pai politics: nol covente dî altri par capî il lôr nivel.

Catalans di centridiestre: libertaris a Madrid (e nancje simpri), repressîfs a Barcelone

Une buine metât dal moviment catalanist al è di centridiestre e cundut che cumò al è vitime dal sisteme repressîf spagnûl, in part a 'nd è ancje responsabil. Par agns i conservadôrs catalans a àn sostignût ben dispès i guviers dal Partît Popolâr spagnûl a Madrid, e in particolâr a àn votât a pro di chê che in Spagne a clamin “Ley Mordaza” (leç bavai) dal 2015, che e limite in maniere antidemocratiche, tra chês altris robis, i dirits di riunion e manifestazions.

Cun di plui i conservadôrs catalans a son stâts contents di doprâ ducj i imprescj repressîfs esagjerâts e arbitraris, ancje cuintri di personis acusadis a câs, cuant che a son stâts contestâts cun fuarce pes leçs sui prestits des bancjis o tes dinamichis di escomi des fameis che no pain il fit.

Par altri al è di visâsi il guvier regjonâl catalan, tignût sù di partîts indipendentiscj, al è responsabil diret de polizie regjonâl catalane, che te setemane passade e je stade responsabile di azions brutâls tant che la polizie spagnole e che, almancul in teorie, e dirêç lis operazions.

Une schizofrenie pardabon grande jenfri ce che si dîs e ce che si fâs cuant che si è tai puescj di podê e cuant che si è tai puescj di critiche al podê.

I catalans che a manifestin e i catalans che a votin

La ultime manifestazion catalaniste, imbastide in pôcs dîs, e à dât dongje plui di mieç milion di personis: lis manifestazions organizadis un an par chel altri, come chê de fieste nazionâl dai 11 di Setembar, a son rivadis a dâ dongje fintremai doi milions di lôr. A son numars che a fasin impression.

Ma di là de impression al è di calcolâ che i citadins catalans a son passe 7 milions e che ancje chei che no si viodin in place a àn un grant pês politic. Tes ultimis elezions regjonâls, dopo de agression indegne de polizie spagnole tal referendum dal 1 di Otubar, i partîts catalaniscj, dividûts scuasi a pâr jenfri catalaniscj progressiscj e catalaniscj conservadôrs, a son rivâts a vê une maiorance une vore scjarse tal parlament regjonâl e il prin partît in assolût, ancje se di pôc e obleât a stâ in oposizion, al è un impresentabil partît populist anticatalan.

Alore il fat che si viodin in strade milions di catalans antiautoritaris e indipendentiscj, nol à di imbroiâ: a son altris milions di catalans che a stan avonde comuts tal stât spagnûl, cun dutis lis sôs vergognis, di votâ partîts spagnoliscj.

Par sperâ ben...

Lis prospetivis pe Catalogne a son ancjemò disordenadis: i partîts catalaniscj a àn pierdût la muse, e l'istès al vâl par chei anticatalaniscj o ecuilibriscj.

Un element positîf, e o disarès plui impuartant di ogni contradizion, al è che in ogni câs i trê cuarts dai catalans, indipendentiscj o no, a son dacuardi che si vedi di fâ un referendum su la indipendence par decidi l'avignî dal paîs, daûr dal dirit di autodeterminazion.

Un altri element pesant al varès di rivâ de demografie: lis gjenerazion plui vecjis a son, in cierts setôrs sociâi, chês plui leadis ae Spagne e chês plui usadis aes sôs anomaliis: par esempli i zovins a àn aderît pal 90% al siopar gjenerâl di vinars stât.

In cualchi an e sarà une sostituzion gjenerazionâl tal eletorât che e favorirà dal sigûr la rivendicazion dai dirits e forsit la indipendence: al coventarà che i zovins, in plui che in place, a ledin ancje a votâ e che a cjatin, o a metin sùr lô, cualchi partît bon di rapresentâju.

“Dami une reson par no fâlu”

Profîl dai manifestants violents di Barcelone (1 par 1.000 dai manifestants):

- 17-30 agns di etât

- nivel di istruzion vari, ancje une vore alt

- posizion ideologjiche varie, simpri antiautoritarie

- a àn viodût i lôr gjenitôrs e parincj pestâts de polizie spagnole dome par volê votâ l'1 Otubar 2017

- a àn viodût lis azions violentis de polizie catalane cuintri di fameis puaris che no podevin paiâ il fit e cuintri di grups alternatîfs

- a àn viodût che cambiâ il sisteme autoritari spagnûl cui sistemis democratics e pacifics al è impussibil: i politics catalans responsabii dal referendum dal 1/10/2017 a son in preson

- a àn viodût che i politics catalans in cjarie a son dividûts e no son bogns di cjatâ soluzions

- a sintin la frustrazion te impussibilitât di costruî il lôr avignî

- rabie, mancjance di pôre e rispiet pe autoritât e pe polizie, viodude dome come fuarce di opression

- alte componente irazionâl e umorâl

Reson de lôr azion violente intune frase: “Dami une reson par no fâ cussì”

La insurezion tai timps dal Samsung S10

La zornade di îr e mostre lûs e ombris de situazion catalane.

Di une bande un siopar gjenerâl, in realtât sostignût di une minorance di sindicâts, ma cjapât sù in misure massive di students e lavoradôrs: lu àn organizât in mancul di une setemane, cun marcjis di desenis di chilometris in plui dîs che a àn puartât a Barcelone passe mieç milion di personis, rivadis a pît di dut il paîs, a domandâ libertât e justizie.

In plui di mieç milion di lôr no àn dât nancje mieç probleme di ordin public, nancje une fuee crevade.

Di chê altre bande, in contemporanie e in maniere indipendente, pôcs centenârs di personis (si calcole 400 a Barcelone, la metât o mancul in chês altris citâts principâls) a àn assediât i poliziots tor di edificis simbolics, bombardantju di clapadadis par oris, prime di lassâ il puest ae violence de autoritât, aromai dibant, par vie che pe plui part a jerin za lâts vie di bessôi.

Il guvier spagnûl e chel catalan e lis lôr poliziis, di là dal fat che a àn interès che e resti une cierte clime di instabilitât, a àn falât lis lôr previsions, no àn idee di cemût fâ a tornâ a cjapâ il control. Lis intervistis dai responsabii politics de sigurece a mostrin une incompetence e impotence di fâ vignî i sgrisui.

In particolâr i guviers, statâl e regjonâl, a fevelin di pôcs grups une vore ben organizâts e a prometin che a cjataran i fantomatics organizadôrs.

La polizie antisomosse e va daûr dai siei solits schemis: pestâ e ferî in male maniere tancj di lôr, a câs, arestâ pôcs di lôr, ancjemò plui a câs. La forme psicologjiche e je chê tradizionâl di meti pôre tai manifestants e dimostrâ, cu la impunitât arbitrarie, cui che al comande.

Invezit e je propit la impunitât arbitrarie che e tire dongje i manifestants violents, che a son une vore zovins e rabiôs: dulà che a son violencis de polizie, no je plui invisibilitât, no je plui la ilusion borghese che la polizie e je li par difindinus e par protezi l'ordin public. A son simpri pardut desenis di telefonuts cuntune videocjamare di alte definizion che a regjistrin dutis lis carognadis e lis metin in condivision daurman, a ripetizion.

A chel pont i puescj plui cjalts a riclamin in automatic i cjâfs plui cjalts, che magari prime no si jerin nancje mai viodûts tra di lôr.

Daûr dai grups di manifestants violents no je nissune organizazion, no covente plui: e baste la injustizie dal sisteme autoritari e la tecnologjie che le met in condivision.

Si pues previodi che i politics spagnûi a laran indevant a cirî i grancj responsabii platâts, ogni tant a rivaran ancje a inventâ cualchidun e a metilu in galere.

La polizie antisomosse invezit e cambiarà tecniche: po stâi che e cirarà di isolâ cualchi grup di pocjis desenis di lôr par rivâ a arestâju in bloc. E sarà une fature no di pôc, e al sarà ancje dibant. La gnot dopo si cjataran altris zovenuts, ancjemò plui rabiôs, pronts a clapadâju.

Forsit infin a capiran che la soluzion par no jessi bombardâts di claps, balis di açâl, bombis molotov e butiliis di acit, e je chê di compuartâsi ben e vuadagnâsi la fiducie de int.
Masse fature: miôr jessi bombardâts.

O forsit al sarès miôr, tornâ ae prime foto, chê di plui di mieç milion di personis: se i politics a fasessin il lôr mistîr tignintle ben in cont, ancje chei 400 des baricadis a finiressin par cuietâsi.

Spagne, une cjase par ducj

Se cualchidun al veve ancjemò la inocence di pensâ che la Spagne e sedi une democrazie, ca al è un video dal guvier spagnûl, publicât la setemane passade, juste prime dai disordins di Barcelone, che al dîs propit il contrari.
No lu dîs cu lis peraulis, ma lu dîs propit cui fats: vêso mai viodût une grande democrazie che e spint bêçs in publicitât par dî al rest dal mont "cjalait, o sin pardabon une grande democrazie"?
A disevin ben i latins: excusatio non petita, accusatio manifesta.

Intant la Spagne e je cussì tant une cjase par ducj, ma propit ducj, che la polizie e lasse che i fassiscj a ledin ator par Barcelone armâts di bastons a pestâ i manifestants. Video di usgnot passade.

E je come a Hong Kong. dulà che la polizie e lasse che lis bandis criminâls a ledin a pestâ i manifestants: ma almancul in Cine no si svantin di jessi chê grande democrazie che e je la Spagne.

E infin sì, ancje la violence dai catalans

Dopo desenis di agns li che l'indipendentisim catalan al veve mantignût dome une linie pacifiche in dutis lis situazions, ancje cuintri di agressions une vore violentis de polizie spagnole, tes ultimis gnots a son stadis ancje azions violentis jenfri des protestis cuintri de sentence di condane dai politics indipendentiscj. Un grant merit de societât catalane al è che ancjemò vuê e je buine di reagjî cun grandis manifestazions pacifichis, ma no son plui dome chês.

No puedin jessi justificazions a azions violentis, che par altri a vuastin la imagjin internazionâl dal indipendentisim catalan, ma spiegazions sì:

• la violence impunide de polizie: no dome la polizie spagnole, ma ancje la polizie regjonâl catalane a agjissin di simpri cuntune violence ilegâl e contrarie ai protocoi (dâ manganeladis tal cjâf o tai gjenitâi, cjapâ sot cui furgons a alte velocitât, incagnîsi cuintri dai manifestants plui cuiets invezit che cuintri di chei plui violents, atacâ cence visâ e cence reson, strenzi grups di int pacifiche in cjantons cence vie di jessude, pestâ gjornaliscj cu la tessare visibile, jentrâ in azions di fuarce cence numar di identificazion in mostre), cence che i responsabii politics de sigurece si dimetin e che i agjents a vegnin punîts; cun di plui tai ultins doi agns la polizie regjonâl catalane e je stade acusade (cence fonde) di Madrid di jessi dutun cui indipendentiscj e chest al à fat pôre che si vueli sierâle: par no sparî, la polizie catalane cumò e fâs a gare cun chê spagnole par cui che si compuarte piês cuintri dai manifestants e duncje miôr te fedeltât ai sorestants;
• la injustizie sociâl di lungje durade: a son agns che in plui di une injustizie di stât cuintri dai indipendentiscj e je une injustizie sociâl profonde in Catalogne, che si viôt soredut te speculazion imobiliâr, te cressite di presits dai fits des cjasis che a deventin fûr de puartade di tantis fameis, che a vegnin butadis fûr cun intervents ancje violents de polizie e che a vegnin invezit difindudis cun resistence passive o ancje cun resistence violente dai vicins di cjase;
• la mancjance di strategjie indipendentiste: i partîts indipendentiscj catalans pardabon a son partîts autonomiscj storics, che a son deventâts indipendentiscj par câs o par convenience, ma che no àn nissune strategjie par rivâ a obietîfs declarâts. La strategjie imprin e jere chê di domandâ 100 (la indipendence) par vê 10 (une buine autonomie) e di fâ un referendum no par declarâ la indipendence, ma par contâsi e par meti Madrid devant di numars concrets che a obleassin la Spagne a concedi di plui. Chest mecanisim, soredut par colpe di Madrid, si è rot: il referendum invezit di inviâ une fase di tratative al à causât une reazion spagnole antidemocratiche e anticatalane. Te mancjance di strategjie, la int no viôt obietîfs e no rive a canalizâ lis tensions e frustrazions in azions costrutivis, e pues finî par sbrocâlis in ats di violence;
• la mancjance di politics di alt nivel: lis figuris di prin nivel dal indipendentisim catalan, che in ogni câs a vevin dimostrât di no jessi buinis di frontâ ben lis cuistions, fasint erôrs e iregolaritâts no di pôc, a son o in preson o in esili tal forest. Cumò lis figuris di riferiment, par esempli il president de Generalitat e i siei assessôrs, no àn ni il carisme ni lis capacitâts par tignî controlade la int e par prevignî la violence, cemût che a vevin savût fâ simpri; cun di plui i partîts e i politics indipendentiscj a son ancje in concorence e dispès in barufe tra di lôr;
• la crisi de politiche spagnole: la situazion politiche spagnole e je in crisi, tai ultins cuatri agns a son stadis cuatri elezions dal parlament spagnûl. I partîts principâi a son il Partît Popolâr (di diestre) che al à pierdût il guvier par pratichis sistematichis di coruzions, il Partît Socialist, che par cjapâ vôts si è mot di posizions storichis di çampe a posizions di centri o fintremai di diestre, jentrant in barufe cun partîts progressiscj plui piçui e pierdint la pussibilitât di formâ coalizions di guvier, Ciutadans (populist che al voleve someâ progressist in principi, ma che si è stabilizât su posizions di diestre plene) che al zuie a creâ une clime di instabilitât e violence par cjapâ plui vôts di proteste. In chestis cundizions ae Catalogne i mancje un interlocutôr che al cjati soluzions politichis;
• la dibisugne spagnole di un nemì interni: il malfunzionament storic dal sisteme di podê spagnûl, che si è simpri fondât su coruzion e clientelis e suntune injustizie sociâl che e à ancjemò vuê caratars ereditâts dal feudalisim, al fâs in mût che par mantignî la coesion al coventi un nemì interni. Par desenis di agns chest nemì a son stâts i indipendentiscj bascs, cul terorisim di ETA (origjinât e saborât ben e no mâl dal terorisim di stât spagnûl), ma ETA tal 2009 e à molât di fâ atentâts, tal 2011 e à declarât une cessazion unilaterâl e definitive des azions armadis, tal 2018 e à comunicât il so disfasiment. Te mancjance si un nemì interni basc, la Spagne e à cirût in dutis lis manieris e cun ogni provocazion di creâ un nemì interni catalan. Cheste dinamiche ur convignive a ducj: i politics spagnûi a podevin fâ fente di difindi la Spagne, i politics catalans a vevin ocasion di fâ viodi che a difindevin la Catalogne;
• la clime preeletorâl: a Novembar a saran lis cuartis elezions spagnolis intai ultins cuatri agns. L'interès a fâsi viodi i salvadôrs intune situazion di violence e di disordin public, lu àn ducj, ancje parcè che di soluzions pai problemis profonts de Spagne e de Catalogne, no 'nd àn.

Sedizion

1 di Otubar 2017: i  eletôrs catalans a van a votâ pal referndum (proibît) su la ipotesi di indipendence de Catalogne, cence nissune iniziative violente.

La polizie spagnole e atache in maniere aleatorie e arbitrarie tancj sîts di votazion, cence tratative cu la citadinance, cence dâ ordins di slontanâsi: e da jù manganeladis e botis, fasint passe 1000 ferîts e cence arestâ nissun.

Tes setemanis dopo, dirigjents politics e culturâi catalans responsabii dal referendum a vegnin arestâts: dal sigûr a àn fat il reât di disobedience, che al pues puartâ a multis e ae inabilitazion des incarghis publichis e a son pronts a rispuindi di ce che a àn fat. Tal procès però a son imputâts di ribelion (= rivolte armade cuntune organizazion militâr), tignûts par doi agns in preson preventive in mût incostituzionâl e cumò condanâts par sedizion (= rivolte violente, ancje se mancul grave de ribelion) a penis jenfri 9 e 13 agns di preson.

Ogni citadin de Europe al pues viodi in chestis fotos, e in centenârs di imagjins e videos dal 2017, citadins che a manifestin in maniere pacifiche e che a fasin resistence passive a une autoritât violente e agressive.

I judiçs spagnûi a calcolin che la polizie si è compuartade cun proporzion e che la resistence passive di citadins pacifics, pal fat che a son in numar superiôr ai poliziots, e compuarte sedizion violente, ancje se la uniche violence dai citadins e je chê di jessi pestâts.

Chest al sucêt in Spagne vuê: e je Europe, e je cjase tô.

Il stât al à cirût svindic e cjastì

Letare dai presonîrs politics catalans condanâts de Cort Supreme spagnole cuntune condane par sedizion(1) a penis jenfri 9 e 13 agns di preson:

No si à fate justizie. La sentence e je il miserabil risultât culminant di une istruzion che no à rispietât lis garanziis processuâls propriis dal stât democratic e di dirit. Un procès judiziâl che nol à cirût la justizie. Il stât al à cirût svindic e cjastì. L'ûs e l'abûs de custodie cautelâr, i scrits acusatoris dal public ministeri, i rapuarts creatîfs de Vuardie Civîl(2) e lis declarazions dai dirigjents politics spagnûi che a anticipavin lis decisions de cort che e jere daûr a processânus a son lis provis che a dimostrin dutis lis mancjancis processuâls di cheste cause cuintri dal indipendentisim. Midiant di noaltris si vûl dâi un avertiment di pôre a milions di personis che a àn difindût in pâs l'esercizi dal dirit di autodeterminazion e che si son motis a pro de indipendence.

La imputazion di ribelion si à dimostrât che e jere premeditade, cul sôl obietîf di secuestrâ la volontât dai citadins pandude tes urnis(3). Il fat che si vedi gjavât la vôs a milions di catalans cu la sospension dai siei rapresentants elets tes urnis al è di une gravitât assolude in tiermins di democrazie.

O vin braùre di vê inmaneât e sburtât il referendum pe autodeterminazion. E o invidìn dute la citadinance de Catalogne a vê braùre pal so compuartament dal 1 di Otubar(4) e pe dignitât mostrade in chê dì e tai dîs dopo.

O mantignìn intat in convinciment che la decision sul nestri futûr coletîf i tocje dome ae citadinance di chest paîs. La nestre volontât di promovi une Catalogne juste e libare no si pues disleâ de nestre convinzion democratiche e pacifiche. Par un tant, des presons di Lledoners, Puig de les Basses e Mas d'Enric, o tornìn a dî in public il nestri impegn pe democrazie, par difindi cun plene convinzion e determinazion il futûr dal nestri paîs. La nestre scomesse e je che la Catalogne e deventi un stât indipendent in forme di republiche. Ma prime che indipendentiscj o sin democratics e duncje no rinunziarìn mai al fat che a sedin lis feminis e i oms de Catalogne chei che si esprimin in libertât tes urnis par decidi il futûr politic dal paîs.

Il contenziôs politic che o vivìn nol è gnûf par nuie, al ven di lontan e o sin cussients che noaltris o sin un scjalìn in plui te lungje strade pe libertât dal nestri paîs. O volìn dâ onôr a tancj oms e tantis feminis che in cundizions une vore piês des nestris a àn dât ce che a vevin di miôr par difindi chê stesse cause che vuê noaltris o rapresentìn, une cause che e je dome chê de libertât de Catalogne. In mût speciâl o ricuardìn il president Lluís Companys, judicât e condanât par ribelion l'an 1934 dal ecuivalent de Cort Supreme di in chê volte e sassinât(5) ai 15 di Otubar dal 1940, come doman 79 agns indaûr, par decision di un altri tribunâl spagnûl.

La sentence che cence justizie nus condane a cent agns di preson par difindi in maniere pacifiche il dirit ae autodeterminazion no je un ostacul, ma dut il contrari, par che o pandìn in nestri impegn pal dialic e par tornâ a provâ a cjatâ par viis democratichis une soluzion al conflit.

I disìn ae citadinance di vê cûr fuart par lâ indevant cu la dignitât mostrade in chescj ultins agns, par no pierdi la capacitât di indignâsi e rivoltâsi cuintri des decisions injustis e soredut par mantignî la sperance di concuistâ un futûr di justizie e di libertât, cul esercizi efetîf dal dirit di autodeterminazion.

Us clamìn a lâ fûr in strade par che la nestre vôs si sinti ator, in maniere ferme, cun dut il cûr che o sin bogns di mostrâ intune adesion incorutibile e incondizionade ai principis e ae pratiche de no violence. O scjampìn des provocazions e o gjavìn fonde cui fats a chei che a vuelin sconfondinus e messedânus cu lis pratichis di une violence che no vin mai justificât e che no justificarìn mai.

De fuarce che nus da il supuart vût di tantis personis e cul agrât par dute la buine int che e brame un futûr plui prospar e une societât plui juste e libare, e cuntun ricuart speciâl pes nestris fameis e amîs e amiis par tante stime e complicitât, us disìn che le puartarìn fûr!

Dolors Bassa

Jordi Cuixart

Carme Forcadell

Joaquim Forn

Oriol Junqueres

Raül Romeva

Josep Rull

Jordi Sánchez

Jordi Turull 

Notis dal tradutôr.

1. La sedizion e presupon che si programi e si pratichi l'ûs de violence par une finalitât eversive: tai fats dal 1 di Otubar e des setemanis prime e dopo, la uniche violence e je stade chê organizade de polizie spagnole, che e à causât un miâr di ferîts tra personis che a manifestavin in forme pacjifiche. Par valutâ la pericolositât di chescj manifestants e la proporzion di ûs de fuarce si pues notâ che a ben che a son stâts ferîts a manganeladis, pidadis e cun proietii di gome in plui di mil, nancje un nol è stât arestât.

2. Cuarp di polizie spagnole ecuivalente plui o mancul ai carabinîrs. Intant dal procès agjents e uficiâi de Vuardie Civîl e de Polizie Nazionâl a àn testemoneât di episodis violents inventâts, intant che i documents videos a mostravin dome, e cuntune vore di bondance, la violence de polizie stesse te repression dal referendum.

3. La acuse di ribelion, che e presuponeve une rivolte militâr, e jere la uniche che e podeve justificâ une custodie cautelâr di scuasi doi agns prime de sentence e la sospension de imunitât parlamentâr.

4. Al è il prin di Otubar dal 2017, cuant al è stât celebrât il referendum, improibît des autoritâts spagnolis, su la pussibile indipendence de Catalogne.

5. Lluís Companys, president de Catalogne tai agns de vuere civîl spagnole, al jere scjampât in esili in France tal 1939; tal 1940 la Gestapo lu à cjapât a Parîs e lu à estradât a Madrid, di li la “justizie” franchiste lu à mandât a Barcelone par fusilâlu.