Niari

Intant che si viaze, se si stufisi dal fat che nol è plui un viaç, ma dome un teletraspuartâsi mecanic e tornât a fâ mil voltis, un biel libri gnûf e je la salvece.
Une leture che o consei alore e je Niari di Fulvio Romanin, che tal mont dal hip hop lu cognossin ancje par Redd Kaa, publicât di pôc di Kappa Vu (al pâr dal impussibil, ma se si à di cjatâ robis bielis par furlan, scuasi dut al passe pes mans de Kersevan...).
Niari al volarès dî "neri" tal furlan di For di Avoltri e di fat lis dôs contis a son neris, pulp, cemût che al dîs il sottitul.
La prime conte Gjeologjicamentri impussibil si disglagne in Cjargne, intun paîs inventât (Valstuarto, par fuarce cu lis dôs frazions di Valstuarto disore e disot, dulà che naturlamentri si fevele par -o, e i abitants si clamin i stuarts!), ma une vore reâl, massime par cui che al cognòs pardabon la Cjargne: no vuei spiâ masse robis, par no gjavâ il gust di lei, o pues dî dome che ancje se tes primis dôs pagjinutis si fâs un pocjo di fadio a lei la lengo di là sù, po dopo pardabon no si rivo âti a gjavâ i vuoi das rios e si lei dut tun flât.
Un bon telâr naratîf, e un gust cinematografic di contâ e di fâ viodi lis senis, intune biele architeture di personaçs che a cirin di gjavâse tra cantins di famee, parons bastarts di mieç paîs, multinazionâls, terorisim, poçs di petroli e bombardîrs stealth: in sumis dut ce che si pues cjatâ in Cjargne, se si tegnin i voi vierts!
La seconde conte e je par talian, Cornetto e caffè, ambientade intune gnot di Istât a Udin: ca si va sul sofisticât, cun doi amîs che a passin une gnot di chês che no si dismentein, tra l'umorisim grotesc ma une vore fin e disorientadôr di Fulvio e riferiments leteraris, cinematografics e musicâi pardabon par intindidôrs usâts ben. Jo invezit o soi un ignorant e o ai capît dome un riferiment ogni dîs, ma us garantìs che se l'oniric e il sanc no us displasin masse, cheste conte e je dute di gjoldi.

L'ûf che al bale!

A Barcelone, per fieste dal Corpus Domini, e je une tradizion biele e curiose.
In diviersis fontanis de citât, prime di dutis chê de cjase dal arcidiacun, si met un ûf di gjaline disvuedât (par une busute che a stropin cu la cere) e al somee dal impussibil ma al bale cul spissul di aghe.
Chest an a son ancje dôs novitâts ecologjistis che mi àn fat propit plasê: la aghe no je dal acuedot, ma freatiche, par sparagnâle stant che in Catalogne chest an al è un grum sut; i ûfs a son di gjalinis tignudis a tiere e no in scjaipule: une biele maniere par fâ publicitât a cheste maniere di tignî lis bestiis, spietant che si improibissi di tignî lis bestiis sieradis tra mil soferencis.

Scusait: se cualchidun mi dîs cemût fâ o dreci il video...

A Triest

A Triest, joibe ai 15 di Mai, a 18.30 li dal KNULP, par presentâ "Venezia Giulia La Regione Inventata": un libri une vore impuartant, curât di Roberta Michieli e Giuliano Zelco e publicât de KappaVu, che o soi une vore content di vê metût une piçule part ancje jo.
Par altri la presentazion a Triest e je une des pocjis ocasions par par sintîmi a fevelâ par talian in public (ma almancul lis primis peraulis, magari mâl, ma lis disarai par sloven!)

E ca il rimant ae recension e ai coments tal blog triestin bora.la: une polemicone che no finìs plui, anzit che a di un ciert pont e finìs cuntune male creance dal moderadôr Enrico Maria Milič, che prime al siere i coments e po dopo al torne a dâ cuintri e a ufindi un dai intervignûts, cence che chel al puedi plui replicâ!

Un zîr in bici pal Empordà

Doi dîs in bici ator pal Empordà, la zone de Catalogne dongje dal mâr, a Nord, in provincie di Gjirone.
La part plui cognossude e je propit la rive, la Costa Brava, che e je maraveose, ancje se di tantis bandis sassinade des struturis turistichis, ma ancje indentri il paisaç al è une vore biel e cuiet.
In 120 chilometris o vin cjatât cjamps, paisuts medievâi, une risierve naturalistiche ornitologjiche di palût, rivis bassis di savalon e altis di scois, isulis e, cundut che no le ai chi tes fotos, ancje il sît archeologjic di Empúries, l'antîc Emporion, prime colonie greghe e po dopo citadute romane, e ancjemò culinis, monts e cjistiei.

Sant Zorç in Catalogne

Mi scusi pal ritart ma o ai vût cualchi probleme di fîi. Alore o met un post vecjut, pai 23 di Avrîl, sant Zorç (Jordi), patron di Catalogne. E je fieste grande, massime a Barcelone e a son pardut bancuts di dôs robis: garofui e libris.
I garofui a son par vie che la liende e dîs che dal sanc dal drâc copât di sant Zorç par liberâ la principesse e jere nassude cheste rose, e alore e je la dî di regalâle ae morose. Di bande lôr lis fantatis ur regalin al morôs un libri, par vie che al è l'aniversari di Cervantes: la robe interessante e je che Cervantes nol jere catalan, ma di ce che o sai i libris, la dì di sant Zorç e di Cervantes, si regalin dome in Catalogne e no in Castilie o tal rest de Spagne.