Chihuahuas
La Conference Regjonâl su la lenghe furlane di îr e je stade un esempli di cemût che une istituzion (la Regjon) e un ent regjonâl (la ARLeF) a puedin montâ cui bêçs publics une architeture di bausiis e di miezis veretâts cence che nissun al disi cic.
Nus contin che a son stadis fatis robis straordenariis (che però nissun viôt e che no funzionin, par esempli il tradutôr automatic e il program di sintesi vocaliche), si cjapin merits di lavôrs fats di altris (par esempli il tradutôr automatic di Google), a disin che o sin plens di dâts par fâ valutazions (però no àn mostrât nissun dât ni fat nissune valutazion fondade sui dâts), o vin il 70% di fameis che a domandin furlan a scuele pai fruts, ma che dopo in nissune scuele i fruts no lu imparin nol è impuartant.
Elena D'Orlando nus à regalât une perle di alte concezion dal furlan: e à dite che e varès fevelât par talian parcè che il furlan nol à i regjistris par jessi doprât intune ocasion cussì formâl e sientifiche (par altri intant che le scoltavin ancje membris de Societât Sientifiche e Tecnologjiche Furlane). Nol è il furlan a no vê i regjistris, e je la professoresse D'Orlando che no sa doprâ il furlan. E nissun al pretint che lu dopri, ma almancul che no vegni a sputanâlu, tant par doprâ un regjistri che che jê e calcole just pe nestre lenghe...
Altris a àn dimostrât la dignitât morâl di un chihuahua: ur àn dite di saltâ sul scagnut, e lôr a àn saltât, dopo stant che a son piçui piçui, a àn saltât propit pôc. Di chê altre bande ce si aial di spietâsi di une raze che e je stade selezionade par jessi piçule?
Ur àn comandât ancje di cori a cjapâ il baston e a puartâlu indaûr al paron: e lôr vie di corse e indaûr di corse a puartâlu, cence tignî cont che il baston ur al dan pal cjâf ogni dì.
E dut il public a cisicâ parsot, a dîsi un cun chel altri che lis robis no son cemût che lis contin, ma dopo, a viert, nissune critiche.
Scuasi nissune: Gabriele Zanello, inmò prime dai intervents dai relatôrs, al à criticât campagnis comunicativis de ARLeF stesse che a mortifichin il furlan: a àn fat fente di no capîlu. Marc Stolf e Carli Pup a àn vût cûr di tirâ fûr cualchi sclese di veretât.
Il rest cuços.
