Fin dal an: timp di belançs. Il faliment de politiche linguistiche dai ultins agns.

De fin dai agns dal ’90, vâl a dî di cuant che e je tacade une politiche linguistiche uficiâl in pro de lenghe furlane, si si è rindûts cont che par fâ diviersis azions no si podeve fondâsi sul associazionisim o sul volontaritât, si veve di formâ professionalitâts precisis par permeti di lavorâ cun serietât su la lenghe furlane. Cussì a son stadis spindudis un pocjis di desenis di miârs di euros par formâ chestis professionalitâts: par iniziative dal OLF e cu lis competencis individuadis de Universitât dal Friûl. Po dopo a son stâts fats ancje altris cors par iniziative di altris ents public. E a son personis che a àn invistît lis lôr energjiis par svilupâ lis propriis competencis e cirî di fâ deventâ la lenghe furlane la lôr profession. Cuâl isal il belanç?

Cussì a memorie mi soi fat une liste di un 50 personis che a àn frecuentât cors di cheste sorte: cors par lessicografs, par tradutôrs, par sporteliscj...

Vuê la situazion e je falimentâr: il 70% nol lavore su la lenghe furlane, dal 30% che al lavore su la lenghe furlane dome une piçule part, il 10%, e à un contrat stabil, il 20% invezit a son precaris (e in chest moment dal an al è facil che a sedin in scjadince). Di chescj ocupâts dome il 2% (une persone sole su 50!) al à pardabon funzions operativis, il rest a àn pal plui funzions organizativis e burocratichis. Ma ce organizino? Cui fasial il lavôr a nivel operatîf?

Te plui part dai câs il lavôr di produzion lu fasin diletants autodidats, dispès nancje paiâts, al massim rimborsâts, ma la realtât in efiets e je che il lavôr a nivel operatîf nol è, duncje nol covente che a sedin professioniscj a fâlu.

Cui che al veve invistît di plui su la professionalitât al è ancje cui che al à patît di plui: ae fin dal 2009 lis oris setemanâls di lavôr dipendent te Serling a jerin 255, ae fin dal 2012 a son 62,5.

Chestis a son ancje lis consecuencis de politiche de Zonte di Renzo Tondo, cun in prime linie i assessôrs Molinaro e De Anna, e de gjestion de ARLEF di Lorenzo Zanon: professionalitâts straçadis dopo che un invistiment public al veve permetût di formâlis, precariât, disocupazion... dutis robis che naturalmentri no metin mai in evidence tai lôr biei discors publics.

Juste par che no mi disin che o feveli sul fum, o fâs la liste dai cognons dai professioniscj mancjâts (e dai pôcs ocupâts) su la lenghe furlane.

F.	Angeli	precariât - mansions burocratichis
B.	Antonutti	no ocupât/ade te lenghe furlane
M.	Barnaba	no ocupât/ade te lenghe furlane
G.	Battistella	no ocupât/ade te lenghe furlane
P.	Beltrame	no ocupât/ade te lenghe furlane
A.	Bogaro	no ocupât/ade te lenghe furlane
C.	Campagnolo	no ocupât/ade te lenghe furlane
A.	Carrozzo	no ocupât/ade te lenghe furlane
M.	Cendou	contrat fis - mansions burocratichis
M. C.	Cescutti	no ocupât/ade te lenghe furlane
A.	Chittaro	no ocupât/ade te lenghe furlane
W.	Cisilino	contrat fis - mansions burocratichis
D.	Concina	no ocupât/ade te lenghe furlane
R.	Cortella	no ocupât/ade te lenghe furlane
P.	De Agostini	precariât - mansions burocratichis
T.	De Caneva	contrat fis - mansions burocratichis
F.	Del Pin	contrat fis - mansions burocratichis
R.	Della Pietra	no ocupât/ade te lenghe furlane
K.	Di Lazzaro	no ocupât/ade te lenghe furlane
B.	Dominici	no ocupât/ade te lenghe furlane
V.	Dominici	no ocupât/ade te lenghe furlane
I.	Dorigo	contrat fis - mansions burocratichis
M.	Duca	no ocupât/ade te lenghe furlane
S.	Fantin	no ocupât/ade te lenghe furlane
F.	Finco	no ocupât/ade te lenghe furlane
M.	Fogale	no ocupât/ade te lenghe furlane
S.	Garlatti Costa	no ocupât/ade te lenghe furlane
L. G.	Lazzara	no ocupât/ade te lenghe furlane
S.	Lenna	no ocupât/ade te lenghe furlane
R.	Malisan	no ocupât/ade te lenghe furlane
M.	Mauro	no ocupât/ade te lenghe furlane
F.	Mecchia	no ocupât/ade te lenghe furlane
R.	Melchior	no ocupât/ade te lenghe furlane
E.	Molinari	no ocupât/ade te lenghe furlane
A.	Montico	precariât - mansions burocratichis
S.	Moratto	no ocupât/ade te lenghe furlane
L.	Nazzi	no ocupât/ade te lenghe furlane
E.	Pecile	precariât - mansions burocratichis
C.	Petris	precariât - mansions burocratichis
R.	Picco	no ocupât/ade te lenghe furlane
L.	Picco	precariât - mansions burocratichis
P.	Pierucci	no ocupât/ade te lenghe furlane
C.	Puppo	contrat fis - mansions operativis
A.	Riccato	no ocupât/ade te lenghe furlane
C.	Romanin	precariât - mansions burocratichis
M.	Sermonico	no ocupât/ade te lenghe furlane
P.	Taviano	no ocupât/ade te lenghe furlane
D.	Toffoli	no ocupât/ade te lenghe furlane
A.	Travain	no ocupât/ade te lenghe furlane
E.	Zanussi	precariât - mansions burocratichis

PS: e podarès jessi cualchi imprecision puntuâl, cence che e influenci però il cuadri gjenerâl.
PPS: Bon Nadâl!!!

Un Friûl diferent

Tai ultins 15 e passe agns o ai pensât che si podeve cambiâ in miôr il Friûl impegnantsi cul lavôr, cu la cualitât e la professionalitât di ce che si faseve. La situazion politiche dai ultins 4 agns mi à dimostrât fûr di cualsisei dubi che o vevi tuart.
Dutis lis professionalitâts che a son stadis disvilupadis a pro de lenghe furlane a son stadis menaçadis, tantis, scuasi dutis, a son pierdudis.
Il stes discors al vâl par tancj altris cjamps dulà che no ai podût impegnâmi in prime persone, o dulà che o ai podût impegnâmi mancul di ce che o varès volût, ma che a àn dute la mê solidarietât: tal mont de culture, dal ambient, de art, de scuele, de cooperazion, des gnovis tecnologjiis, de economie reâl...
Chel che al cîr di jessi un Friûl diferent nol pues plui fâ di mancul di une rapresentance politiche, nol pues plui impegnâsi dome tal lavôr, tal volontariât, tai comitâts... al à di concuistâ une rapresentance politiche.
http://unfriuldiferent.blogspot.it/
http://www.facebook.com/FriuliDifferente

Karakia al Visionario!

Doman di sere (martars ai 18 di Dicembar) aes vot, li dal Visionario e sarà la proiezion dal program catalan Karakia sul Friûl (cui sottitui par furlan!), e tantis altris robis interessantis te premiazion dal Concors par tescj cinematografics organizât dal CEC.

Emigrant in patrie

Emigrazion: une des peraulis che si lein plui dispès al Friûl, ai furlans.

Une esperience che nus à segnât fin insot: tai ultins agns o ai let su chest argoment, o ai cjalât cun interès e comozion i documentaris di Farcadice, e compagn o ai scoltât lis trasmissions dal Sgarfefurlans. O ai ancje vût la fortune di viazâ fin a Colonia Caroya, santuari de furlanetât argjentine.

Intune maniere pardabon anormâl o soi un emigrant ancje jo, maridât cuntune foreste o fâs sù e jù tra Catalogne e Friûl, e ancje se intune cundizion privilegjade o sai ce che a vuelin dî la nostalgjie, i problemis di integrazion, il bon acet.

Mi sint emigrant in Catalogne; mi sint forest cuant che o torni intun Friûl che dispès nol è cemût che mi plasarès.

E cumò o sai ancje ce che al vûl dî vê la femine e la frute lontanis: o soi un emigrant furlan paradossâl che al lasse la famee tal forest par cjatâ un gnûf lavôr in Friûl, un lavôr che dopo mi permeti di tornâ a emigrâ lontan, par stâ dongje de famee. Cumò o soi un emigrant in Patrie.

E cussì di emigrant o fâs la mê critiche, la mê acuse: o soi solidari cui emigrants, ma no justifichi la emigrazion, no sopuarti la retoriche, il jemplâsi la bocje di valôrs che a son colpis, e o sai di ce che o feveli ancje su la mê piel.

Lis epopeis de emigrazion contadis dai politics a son une bausie perfete, une ipocrisie sublimade: lis vitimis che a deventin braùre e erois. 

Cetancj erois furlans che a son lâts ator pal mont a fâi onôr ae lôr Patrie...: e no si dîs nuie dal parcè che a son lâts vie, no si fevele dal parcè de injustizie, no si fevele di chei che ur àn gjavât ogni sperance di cjatâ un futûr degn te lôr tiere. Sì, i emigrants a son lis vitimis dai Stâts che no son bogns di meti sù une economie degne, che a lassin che pôcs prepotents a robin ce che al è di ducj. Tra dutis lis vitimis, i emigrants a son chei che a reagjissin cuntun pocje di iniziative, almancul la iniziative di scjampâ o di cirî di creâ inaltrò: par chel a puedin deventâ erois, ma no puedin deventâ il svant di cui che al à la colpe de injustizie sociâl.

Invezit di celebrâ tant i nestris erois scjampâts o vin di liberâsi dai colpevui che nus guviernin e di cognossi e di fâsi judâ dai erois che a vegnin in Friûl de Europe dal Est, de Afriche, de Americhe... cui nus contial la lôr epopee? Le vin sot dai voi ogni dì, e no le viodìn.

Magjie de fumatele a Fusinis

Une foto cjapade joibe stade a Fusinis de amie Muntsa: dute une magjie.

Pseudoliberalisim linguistic

Dopo di vê analizât il “pseudopragmatisim” linguistic, che al volarès gjavâi al furlan cualsisei ricognossiment di utilitât concrete, cuant che invezit a ‘nd à un grum, si pues analizâ une altre categorie di argoments che a somein logjics, ma che in realtât a vegnin doprâts cuntune incoerence partesane par fâur cuintri aes pocjis normis di tutele su la lenghe furlane: chescj argoments si fondin sul principi democratic de libertât di sielte e si cumbinin in gjenerâl cuntun dinei de dibisugne di normis su la lenghe furlane. Duncje si podarès dî che si insuazin intun pinsîr che o podaressin definî “liberalisim”, ma stant che, invezit di garantî la libertât, il lôr efiet al sarà propit il contrari, o varìn di definîlu “pseudoliberalisim”.

I ponts fondamentâi di cheste linie politiche su la lenghe furlane a son:

• no si pues imponi l’insegnament de lenghe furlane a di nissun e in nissune situazion;
• no si pues imponi normis di scriture de lenghe furlane;
• no si pues imponi liniis di insegnament;
• in gjenerâl no si à di aplicâ nissune leç su la lenghe furlane.

Al è interessant notâ che chescj argoments si fondin su principis di libertât, democrazie e libare sielte, ma a vegnin aplicâts dome ae lenghe furlane e dentri di un sisteme, chel politic e scolastic, dulà che invezit ducj chei altris aspiets a son regolâts une vore in detai: la lenghe furlane, duncje, e sarès l’unic câs là che e covente aplicade la libertât e la democrazie.

Il fat di ribati sul prin pont, cemût che al è sucedût tai ultins timps, par altri al è paradossâl: la leç za cumò no impon l’insegnament dal furlan a di nissun, duncje se si torne a fâ polemiche su chest teme al è dome par fâ someâ vêr ce che al è fals e par fâ crodi che al sedi menaçât il dirit di libertât di cui che nol vûl l’insegnament dal furlan pai siei fîs. Ma la robe plui paradossâl e je che inte realtât concrete al sucêt dut il contrari: ce che al è menaçât al è il rispiet de volontât dai gjenitôrs che a àn sielzût pai lôr fîs l’insegnament dal furlan! Di fat a mancjin dotazions finanziariis, ma soredut materiâl didatic e personâl cun competencis certificadis: in pratiche nissune scuele dal Friûl no je stade metude in cundizion di rispietâ la leç 482/99 e la LR 29/2007. I finanziaments a son stâts ridots simpri plui, no je mai stade vierte une categorie professionâl di insegnants cun competencis in lenghe furlane, nol è stât fat bon il regolament su la certificazion linguistiche (par leç al varès vût di jessi fat bon tal 2008, ma la Zonte Regjonâl Tondo e je colpevule di omission e no à dât nissune justificazion). E in cheste situazion si à cûr di saborâ la polemiche, tirade sù ancje di mieçs di stampe tant che il Messaggero Veneto, fasint someâ che il furlan a scuele al sedi une imposizion!

Pal secont pont si torne su la vecje strategjie di fâ cuintri de norme ortografiche e de lenghe scrite standard: chestis a son tra i risultâts plui positîfs de politiche linguistiche furlane dai ultins 15 agns. A permetin di vê struments di grande difusion, di stampâ libris in grande tiradure, di vignî fûr de piçule realtât di progjetuts sperimentâi: al è propit parè che si cîr di scancelâ chescj efiets positîfs che declare che su la lenghe furlane, sole in dut il mont, si à di fâ stât dome su la lenghe fevelade e no su chê scrite, e che se si à propit di scrivile si à di lassâ libertât, par che ognidun le scrivi te maniere che i pâr. Ma parcè alore no si aial di scrivi ognidun cemût che i pâr ancje par talian, par inglês, par todesc o par francês?

Pal tierç pont si à di dî che a son aromai agns che in nissune materie no si pues imponi il metodi di insegnament e che ogni istitût e ogni insegnant a àn autonomie: ce che invezit al ven imponût a nivel ministeriâl par dutis lis materiis a son i obietîfs didatics, che no son ogjet di autonomie. L’insegnant di matematiche al pues doprâ il libri di test che al vûl e i esercizis o i sistemis che al vûl, ma a àn di jessi di indreçâts a otignî obietîfs che a son compagns par dutis lis scuelis di Italie. Su la lenghe furlane, viodût l’implant antifurlan dai ministeris talians, no son mai stâts fissâts obietîfs didatics, ma la leç 482/99 e fevele clâr, e dîs che lis istituzions scolastichis a àn di garantî l’aprendiment (che si lei ben, l’aprendiment, no m’insegnament, art. 4, come 2) des lenghis tuteladis, come il furlan. In chest câs alore, e je di gnûf paradossâl une proteste che e acuse la regjon di imponi almancul 30 oris di presince de lenghe furlane intun an scolastic: pardabon no si capìs cemût che cun mancul di 30 oris ad an i fruts a podaressin imparâ un minim di furlan; e sarès invezit ogjet di proteste e di denunzie la mancjance di ubidience ae leç di dutis lis scuelis che in chescj agns a àn garantît al massim une presince limitade, sperimentâl e cence un vêr efiet sul aprendiment de bande dai fruts.

In struc, lis posizions che si viodin za di agns cuintri de lenghe furlane in gjenerâl, e in particolâr te scuele, a doprin in maniere demagogjiche i principis di libertât, democrazie, libare sielte, ma tal aplicâ chescj principis dome ae lenghe furlane e no ancje a chê taliane o a altris lenghis, a mostrin che ce che a vuelin al è il lôr tradiment: no pues jessi libertât, libare sielte e democrazie se no je une cundizion di paritât.

La sospension o la mancjance di regulis e di misuris a pro dal furlan e lassarès in vore (e in buine part e lasse in vore) lis dinamichis di sostituzion linguistiche e di conflit invisibil che a son cumò: si lassarès cence nissune norme la lenghe furlane, intune situazion reâl di regulis che a favorissin in maniere detaiade e capilâr la lenghe taliane e che a son stadis studiadis di pueste par fâ sparî chês altris lenghis de Italie.

Al sarès come pretindi di recuperâ un ambient naturâl, declarant une tutele teoriche dopo 150 agns che al vignive contaminât, cence definî però nissune limitazion al incuinament e nissune norme di protezion: e chest invocant la libertât de nature di ripiâsi bessole e la inoportunitât dal intervent uman, intant che dutis lis fuarcis che le àn menaçade fin in chel moment a son libaris di lâ indevant cu la lôr azion di distruzion e intant che i incuinants ingrumâts tai agns a son ancjemò daûr a intosseâ chel ambient.

Elezions Catalogne Friûl

Ve ca la regjistrazion de interviste di vuê a Radio Onde Furlane, là che cun Pauli Cantarut o fevelìn dai risultâts eletorâi e des propsetivis politichis in Catalogne, e forsit ancje in Friûl...

Vonde difindi la autonomie cu la scuse de lenghe furlane!

“La fonde de nestre autonomie speciâl e je la presince di minorancis linguistichis”

“La lenghe furlane e je un element essenziâl par difindi la nestre autonomie”

Chestis frasis aromai si sintin in bocje di cuasi ducj i politics furlans: une vore dispès chei mancul preparâts, mancul atîfs, mancul leâts al Friûl... al è il segnâl che a àn pierdût dut il lôr significât.

Argoments cussì si son sintûts a ripetizion te conference penose di sabide stade, e dal sigûr no son rivâts a tirâ sù il nivel dai contignûts: la profonditât di riflession e jere chê di pampagai che a vevin imparât un ritornel.

Cun dut achel a somein frasis logjichis, in linie cui valôrs de lote autonomiste... sì, ma aromai a son dal dut disvuedadis, parcè che in cheste situazion di crisi la autonomie speciâl e ven doprade tant che paradane par protezi poltronis; la lenghe furlane e ven doprade come scuse par garantî situazions privilegjadis (par esempli diretôrs scolastics che no àn introdot l'insegnament dal furlan tes scuelis!), ma pe lenghe furlane no si fâs nuie!

Vino di butâ tai baraçs la autonomie e la lenghe furlane?

No, o vin di capî che la autonomie e je un strument par tutelâ e promovi la lenghe furlane, e no il contrari!

E cussì e je un strument par valorizâ e aministrâ miôr dute la nestre realtât.

E lant indevant si podarès resonâ sul fat che nancje la lenghe furlane no je un fin, ma che e je un imprest par rivâ a un model sociâl plui just.

Rivarano i pampagai che nus aministrin a imparâ un resonament dal gjenar? 

Dificil, o varìn di impegnâsi par jessi aministrâts di personis e no di pampagai. 

La cunvigne plui penose che o vedi viodût

La sale vueide e je stade il simbul plui clâr dal faliment de politiche linguistiche dai ultins 4 agns.
Il vueli sant sul cadavar lu à metût l'assessôr De Anna che al à declarât di jessi l'assessôr de culture linguistiche e no de politiche linguistiche: ma si cjapìno pal cûl?
Doi o trê sindics presints, cuasi nissun sportelist (ecezion Marta, sporteliste a Aquilee), doi o trê conseîrs regjonâi: nome Menis e Franz a àn assistût a dute la cunvigne.
Biei i intervents tecnics de matine che però a piturin un cuadri penôs de politiche linguistiche.
La plui part di chei altris intervents fûr teme, cun int che e tirave fûr scusis, e fevelave di cualsisei robe che i vignìs pal cjâf o che e reclamave bêçs pe sô clape.
Biei ancje i intervents di Pauli Cantarut (che al à dite "Ma di ce fevelìno ca?"), Carli Pup pal Comitât 482 e ancje chel di Silvana Fachin Schiavi.
I responsabii de politiche linguistiche assents o presints dome in cuarp: i sintiments no si sa ben dulà che ju vedin pierdûts, si suspiete cualchi azion dai aliens o cualchi rituâl woodoo.
La pinelade di colôr le à dade un dai massims rapresentants politics, cuntun discors fûr dai semenâts, ma soredut cu la sô segretarie vistude in perfet stîl putane di cort de decadence romane...
Compliments a cui che al à organizât cheste paiaçade, ma soredut a cui che nus à puartât a cheste situazion!

“SONO I FATTI A PARLARE CHIARO”

Cussì al veve dite Renzo Tondo, il nestri President, ai 22 di Avost dal 2012, ripuartât tes pagjinis dal Messaggero Veneto.

E viodìn alore i fats, cemût che a vegnin fûr di une analisi dal Comitât 482:

Leç regjonâl 29/2007 pe tutele, pe promozion e pe valorizazion de lenghe furlane

Azions di programazion, di control e di svilup de politiche linguistiche

Art. 25  (Plan Gjenerâl di Politiche Linguistiche par cinc agns – Regjon) > NO FAT

Art. 26.1  (Plans anuâi pes prioritâts di intervent – Regjon) > NO FATS

Art. 27.1  (Plans Speciâi di P. L. par cinc agns – Regjon, Ents Locâi, Concessionaris di servizis publics) > NO FATS

Art. 29.1 e 29.4  (Relazions publichis anuâls sui progrès inte metude in vore de leç – Regjon) > NO FATIS

Art. 29.3 e 29.4  (Rapuart public cuincuenâl sui risultâts inte metude in vore de leç – Regjon) > NO FAT

Art. 28.3 e 29.4  (Comission pal ûs sociâl de lenghe furlane – Regjon) > NO FATE

Art. 7.3  (Regolament pe certificazion linguistiche – Regjon) > NO FAT

Art. 28  (ARLeF, organisim competent par fissâ i indreçaments di politiche linguistiche)

- Il personâl al va dilunc a jessi pôc e precari

- Il Comitât Tecnic Sientific al è stât stramudât intun sempliç organisim a clamade

Cun di plui il coordenament des azions al è stât penalizât de division des competencis su la lenghe furlane tra doi Assessorâts regjonâi (Culture e Istruzion)

Scuele e insegnament

Art. 12-18  (Intervents pal insegnament dal furlan intes scuelis – Regjon, Ufici Scolastic Regjonâl)

Aprovazion de leç regjonâl > Dicembar dal 2007

Sentence de Cort Costituzionâl > Mai dal 2009

Partence de metude in vore (dome intes scuelis primariis) de leç > An scolastic 2012-2013

Art. 19  (Regjistri dai volontaris pal insegnament de lenghe furlane - ARLeF) > NO FAT

Mieçs di comunicazion

Art. 23  (Regolament pai intervents intal setôr dai media – Regjon) > FAT dome sul finî dal 2011

Fonts pai programs radiotelevisîfs par furlan: prime azerâts, po sbassâts e ritardâts di mês

-  Finanziariis regjonâls fin al 2009 > 200 mil euros

-  Finanziarie regjonâl pal 2010 > 0 euros

-  Finanziarie regjonâl pal 2011 > 0 euros

-  Variazions di belanç pal 2011 > 150 mil euros (paiament dal salt: Novembar 2012)

-  Finanziarie regjonâl pal 2012 > 150 mil euros (ripart comunicât dopo dai 20 di Novembar 2012)

Realtâts associativis

Art. 24  (Poie finanziarie, proporzionade ae lôr ativitât, pai sogjets indotâts di une organizazion e di une struture stabile che a davuelzin une ativitât cualificade e continuative a pro dal furlan – Regjon)

- Finanziariis regjonâls par 2010 (-20%) e 2012 (-17%) > riduzion des risorsis cun tais orizontâi che no tegnin in nissun cont la proporzion, la cualitât e la continuitât des ativitâts davueltis, e nancje de organizazion e de struture dai diviers sogjets

- Finanziarie regjonâl pal 2013 > si fevele di un tai orizontâl dal 50% des risorsis

GRACIIS SIÔR PRESIDENT, E SALÛT!

Note: Tal câs di Tondo no son dome i fats a fevelâ clâr, ma ancje lis peraulis e i pinsîrs, al baste cjalâ ce che al diseve in campagne eletorâl tal 2008

http://ricerca.gelocal.it/messaggeroveneto/archivio/messaggeroveneto/2008/04/01/NZ_10_REGB1.html

Però si scuen dî che, almancul cuant che al fâs mâl, Tondo al è coerent!

Conference su la tutele de lenghe furlane

Sabide e sarà la Conference su la tutele de lenghe furlane.
Al sarès stât interessant, in plui di sintî ce che si à fat a nivel public (e al è stât fat pardabon pôc o nuie!), savê ce che si è mot a nivel di privâts, di associazions, di editôrs e v.i.: il spazi dât al "associazionisim" invezit al sarà une vore une vore piçul.
Cun di plui a son ancje realtâts che no si puedin meti tal grum dal associazionisim, e che a fasin de lenghe furlane une ativitât lavorative: la Serling par esempli, no je stade nancje invidade ae conference. E no je la prime volte: viodût che no à mai fat domande di finanziament, al è come se no fos.
Cui che al à permetût la realizazion di dizionaris, struments didatics, struments informatics tra i plui impuartants pe lenghe furlane, par chei che a direzin cumò la politiche linguistiche furlane al è come se nol fos.
Ma la aplicazion o la mancjade aplicazion di une leç di tutele no si le viôt dome di ce che a disin i esperts di legjislazion e di burocrazie; si le viôt soredut tai efiets che e prodûs su la societât, su lis porfessionalitâts, su la ocupazion.
Par ce che al è stât fat tai ultins agns, i responsabii politics e aministratîfs de politiche linguistiche pal furlan a varessin dome di domandâ scuse: invezit o scomet che in cheste conference a tiraran dome fûr scusis.

Plurilinguisim, Catalogne e Friûl

Ve ca une interviste cul Guardianut (Michele Calligaris) che i dîs graciis a lui e a Telemare di Gurize.

Vote il Tiliment!

Vote il Tiliment tant che lûc dal cûr! Nol è dome un concors, al è un mût par difindi un flum che al è un patrimoni par ducj i furlans!

(foto di Ivan Marin, cjolte dal sît dal Comitât ARCA)

Par votâlu frache ca!

De politiche furlaniste ae politiche furlane

Il superament dal partît autonomist di racuelte,

tra diestre e çampe

Tal mês di Avrîl o publicavi la idee, che no je nancje dome mê, che a coventaressin doi partîts furlans, un disìn di “diestre” e un disìn di “çampe”. Al è naturâl che i concets di “çampe” e “diestre” a van tignûts cun dutis lis risiervis che e impliche la societât di vuê.

Tal mês di Lui il periodic di Identitât e Inovazion, “Gnovis pai autonomiscj”, in part in relazion a chê idee, al publicave un articul li che al declarave che la impostazion di çampe e je par sô nature contrarie aes particolaritâts locâls e duncje al autonomisim: in struc si pues citâ chescj doi passaçs, ancje se si racomande di lei dut l’articul.

“... è necessario rendersi conto che il pensiero di sinistra è quanto più lontano da una coerente posizione autonomista”

“Pur non negando la esistenza di movimenti etnici dai connotati radicali e rivoluzionari, dobbiamo osservare che in ogni regione dove vi sono forti spinte all’autonomia i movimenti autonomisti maggioritari si ispirano ai principi dell’autonomismo popolare. In Trentino, in Sudtirolo, in Baviera, in Val d’Aosta, in Catalogna, nei Paesi Baschi le forze politiche autonomiste maggioritarie si ispirano ad un coerente sistema di pensiero che trova le sue ispirazioni nei principi dell’autonomismo popolare: la sussidiarietà, l’autogoverno, la difesa dei valori e delle particolarità locali.”

In struc par Identitât e Inovazion al è interessant il concet che a sedin doi partîts furlans (“autonomiscj”, ma no je une definizion mê): dome che chel di çampe al sarès minoritari e incoerent, chel popolâr al sarès maioritari e coerent. No pensi di interpretâ in maniere falade se o cjapi il “popolâr”, intal scrit di Identitât e Inovazion, tant che sinonim di “conservadôr moderât”.

Adrian Cescje, tal sît web dal Moviment Friûl, al è a pene tornât su la cuistion. In chest câs il scrit al è ancjemò plui lunc, si racomande di leilu, ma chi si cite dome cualchi passaç.

Su la esistence di doi partîts furlans (che ancje Cescje al definìs “autonomiscj”) al dîs:

“La presince di doi partîts autonomiscj di cheste fate e inviarès une dialetiche produtive pe cause furlane. Za, ma chest al reste un scheme teoric, che par deventâ realtât al varès di disponi di une realtât furlane ben diferente di chê atuâl.”

“La consistence numeriche dai Furlans e podarès ancje esprimi un partît autonomist di diestre e un di çampe, ma la storie di 50 agns di politiche regjonâl e dimostre che la adesion eletorâl a un program autonomist ben definît tant che tâl e je rivade massime intor dal 5% in Friûl.”        

“Fin che la culture autonomiste no devente egjemoniche in Friûl (e o stenti a crodi che lu deventi in timps curts), la division dal autonomisim intune formazion di diestre e intune di çampe  ben struturadis e je un lus che no podìn permetisal.”

Duncje par Cescje e sarès une pussibilitât teoriche di vê doi partîts autonomiscj, ma te pratiche al è impussibil e la uniche oportunitât politiche e je dade dal Moviment Friûl.

La mê riflession e je cheste: la valutazion che in Friûl dome il 5% de popolazion e je sensibile a un partît autonomist (risultâts dal MF) e je confuartade di dâts sperimentâi.

In dut câs o ai la percezion che in realtât la “culture autonomiste” e sedi za egjemoniche in Friûl, e di passe sessante agns. Tal 1947 pre Josef Marchet al scriveve:

“...i furlans a son, sì, autonomiscj, almancul il novante par cent, ma no metin man al tacuin nancje par bati un telegram”

E, telegrams o no telegrams, vôts al Moviment Friûl o no vôts al Moviment Friûl, a son stadis tantis vitoriis parziâls:

• la emigrazion, cundut che e je ancjemò (e no si fevele di jê cemût che al coventarès), no à plui l’impat traumatic di une volte;
• lis sclavitûts militârs e in gjenerâl la presince des fuarcis armadis in Friûl si son sbassadis une vore;
• la Universitât dal Friûl e je stade istituide, in complès e je une buine universitât, in cualchi câs ecelente, ancje se in maniere paradossâl i cjamps dulà che e funzione piês a son propit chei leâts ae lenghe e ae identitât furlane;
• il Friûl al è dentri intune regjon autonome cun statût speciâl, ancje se cun capitâl Triest;
• la lenghe furlane e je tutelade a nivel regjonâl e statâl, ancje se lis leçs di tutele in pratiche no vegnin lassadis funzionâ.

Chescj a son ponts fondamentâi dal “autonomisim storic” e a son scuasi dutis vitoriis: parziâls, si sa. Il nazionalisim talian o l’antifurlanisim no àn pierdût dal dut, anzit a restin simpri un grum pericolôs. Ma ancje se a son vitoriis dome parziâls, al sarès stât impussibil otignîlis se il supuart de popolazion al fos stât dome chel dal 5% cjapât dal Moviment Friûl. O calcoli plui juste la stime di Marchet, di un supuart dal 90% de popolazion, ancje se cuntun impegn avonde bas.

Il probleme al è: parcè il partît autonomist che al à vût plui sucès te storie politiche furlane al è rivât dome tor dal 5% dai vôts, se l’amôr dai citadins furlans pe lôr tiere e pe lôr identitât al è clâr e sintût e se la poie (almancul ideâl) aes bataiis pe difese dai valôrs e dai dirits dai furlans e je dal 90%?

La fuarce di pression dai partîts e dai centris di podê talians e je dome une part de rispueste.

O pensi che par vignî fûr di cheste situazion a coventin doi partîts furlans, un clamìnlu “conservadôr” e un clamìnlu “progressist”.

O pensi ancje che si vedi di vignî fûr de logjiche “autonomiste” o “furlaniste” par passâ a une logjiche “furlane”: invezit di formulâ principis teorics, magari ancje juscj e coerents, par che la int ur ledi daûr, i partîts furlans a àn di partî de societât furlane di vuê, par rapresentâle.

O crôt che al coventi un partît furlan “conservadôr moderât”: al podarès vê un sucès eletorâl, ancje maioritari, cemût che e argomente Identitât e Inovazion e cemût che al à za nasât ancje il president de Regjon Renzo Tondo (che però fin cumò pal Friûl e pe lenghe furlane al à fat dome dams). Di là dal sucès eletorâl, però, al sarès un partît che al cambiarès une vore pôc la realtât di vuê, propit pal fat di jessi “conservadôr” e “moderât”.

O crôt che ce che al covente di plui al sedi un partît furlan “di çampe” che al sedi espression de part plui vive e proietade al futûr de comunitât furlane: che al puarti a nivel politic chel Friûl diferent che al è za a nivel sociâl. Nol impuarte che al vinci o che al pierdi lis elezions: dome il fat che al esisti un partît dal gjenar al sarà la clâf che e permetarà di rompi i ecuilibris e che e oblearà dute la classe politiche a confrontâsi pardabon cui furlans.