Autonomisim “di diestre”: mâl e piês.



Agns indaûr o scrivevi ce che plui di cualchidun al veve pensât: l'obietîf dal autonomisim furlan al veve di jessi chel di cjapâ il puest dai partîts talians in Friûl e di ridusiju a no esisti o a restâ sierâts tun cjantonut.
In cheste prospetive a saressin coventâts no un partît autonomist, ma doi: un di çampe/centriçampe e un di diestre/centridiestre.
Par semplicitât lassaitmi che o scrivi çampe e diestre.
Cuintri di cheste teorie e restave la impostazion classiche dal autonomisim furlan: chê dal partît di racuelte.
Tes ultimis elezions si à vût une cumbinazion particolâr di autonomisim “di çampe” e “di racuelte”, dâts adun tal Pat pe Autonomie.
Si pues fevelâ di autonomisim di çampe dal “Pat pe Autonomie”, par vie che un dai ponts strategjics individuâts di Sergio Cecot al jere chel di inviâ “la sostituzion dal PD in Friûl” e parcè che in sostance ducj i autonomiscj di çampe a àn poiât a fuart il PAT.
Di chê altre bande si pues fevelâ di partît di racuelte par vie che ancje une grande part autonomiscj di centridiestre a àn poiât il PAT e si son canidâts tes sôs listis, ancje cun posizions di grant rilêf. La lôr convinzion e jere che in chest moment dome un partît di racuelte al pues rivâ a vê une rapresentance in Regjon e che lis divisions jenfri çampe e diestre a son une vore mancul impuartantis dal obietîf centrâl de autonomie.
Di chê altre bande e je restade fûr di cheste dinamiche une cierte part dal autonomisim di diestre: in particolâr il grup de Acuile dal Friûl e chel di Identitât e inovazion (IeI).
Rispiet ae capacitât di dialic e ae coesion che si son viodudis tal Pat, chel che o podìn definî come autonomisim di diestre al è restât presonîr di dinamichis une vore negativis:
  • division (mancjance di acuardi jenfri Acuile e IeI e altris)
  • setarisim su temis che a àn pôc o nuie a ce fâ cu la autonomie (percezions une vore conflituâls su imigrâts, minorance slovene, spirt religjôs, abort...)
  • ambizion personâl plui grande dal impegn autonomist.
Chestis dinamichis a àn puartât a risultâts falimentârs:
  • incapacitât operative di cjapâ sù lis firmis (imprese no di pôc)
  • impussibilitât di presentâsi e duncje rassegnazion a votâ o un partît di çampe/racuelte, il Pat, o partîts di diestre taliane, tant che la Leghe, cuntun alt potenziâl antiautonomist (pe sô sotanance a Milan/Rome/Vignesie)
  • candidature di singui esponents autonomiscj in partîts di diestre no autonomiscj.
Sot chest ultin pont la crisi inteletuâl che e je stade cu la pierdite di Marzi di Strassolt e à puartât a paradòs vergognôs e ridicui: Valeria Grillo si è candidade cun “Fratelli d'Italia”, partît nazionalist incompatibil cun cualsisei impostazion autonomiste e furlaniste, Gabriella Lodolo si è candidade cun “Autonomia Responsabile”, liste di Renzo Tondo, responsabil in grande part de situazion critiche de nestre Regjon, contrari ae tutele de lenghe furlane, dal dut sotan a Forza Italia. Chestis candidaturis a àn vût la benedizion di Raimont di Strassolt.
In struc, l'autonomisim di diestre che al è restât fûr dal Pat pe Autonomie, al à di fâ un esam di cussience e cjapâ at di un faliment che nol è casuâl, ma struturâl.
A coventaran un ricambi gjenerazionâl, personis buinis di mantignî la posizion autonomiste ancje a diestre e no prontis a vendile par ambizion personâl, e ancje une rielaborazion ideologjiche profonde, intune suaze coerente.



O sin il Tiliment




O sin il Tiliment.

Il Tiliment nus travierse cence dividinus, nus insegne la aghe, la vite, nus insegne la pôre de sô fuarce, de nestre fuarce.

Il Tiliment nus fâs di spieli. Nome nô si cognossìn dentri di lui, e cui che al à pazience di cognossinus.

Il forest, a prin colp, no lu viôt, no nus viôt: par lui la grave e je dome une striche blancje di claps, come vues infinîts, di muarts dismenteâts.

Ma ancje cuant che no je lûs di aghe, il flum al cor simpri sot de grave.

Al reste vîf, al reste salvadi, al reste libar.

Noaltris o sin il Tiliment.

Graciis



Vuê e finìs la campagne eletorâl.

O tornarai a scrivi lunis, ma vuê o vuei dî graciis a ducj chei che a àn metût il lôr impegn in cualsisei maniere: di chei che a àn dât dut ce che a vevin dentri, fin a chei che a àn spindût cinc minûts par cirî di capî la propueste dal Pat pe Autonomie. Graciis.

O ai braùre di vê vût part in cheste campagne eletorâl, parcè che o sai che nol è dome il percors di afermazion di un partît, al è prin di dut une bataie pe nestre tiere e pe nestre int.

Al jere agns che nol sucedeve a chest nivel: pes elezions aministrativis dal 2018 si à viodût finalmentri un partît che al faseve Politiche, cun P grant. Politiche par une Patrie, par un Popul, par une comunitât di plui Popui, cemût che al è il Friûl e cemût che e je la struture aministrative, par tant imperfete che e sedi, che lu ten pal plui dentri, la regjon Friûl – VJ.

Sergio Cecot al è il candidât plui preparât e plui stimât di ducj chei che a san alc di politiche, fintremai dai siei aversaris.

Lis ideis dal Pat pe Autonomie a son cussì fuartis che, cundut de debilece finanziarie e infrastruturâl a pet dai grancj partîts, a son rivadis a imponisi tal dibatiment politic. O vin obleât ducj a fevelâ dai nestris temis, o oblearìn ducj a resonâ su lis soluzions ancje cuant che la tentazion naturâl di PD, Leghe e centridiestre, M5S e sarà chê di lassâ decidi dut di Rome.

Il Friûl al è la nestre Patrie.

Chi si decît il presint e il futûr: nestri, des nestris fameis, de nestre comunitât, dal nestri Popul.

O vin il dirit, o vin il dovê di dicidilu nô.



NUIE DI NÔ, CENCE DI NÔ


Candidâts ae presidence e politiche pe lenghe furlane



Il Comitât 482 al à sometût ai candidâts presidents un document di sintesi, vignût fûr dal lavôr dai grups che a àn dât dongje la documentazion pe Conference regjonâl di cualchi mês indaûr.

Lis posizions dai candidâts, un pôc par convinzion, un pôc forsit par captatio benevolentiae prime des elezions, si somein avonde e a son in gjenerâl positivis.

A Bolzonello, che in fin dai fats al rapresente la la Zonte stade, si à di ricognossi che a son cressûts i bêçs pe tutele de lenghe furlane. Di chê altre bande si à di dî che l'assessôr Torrenti al à plui blocât che judât la Arlef: la sô linie e je stade chê di molâ cuatri francs in plui, par che po i furlaniscj no protestassin, ma cence pemeti di fâ lis robis bardabon. Cun me cheste sielte no funzione e o protesti istès: politiche linguistiche al vûl dî pensâ e fâ pal ben dal furlan, no meti un pôcs di bêçs che no cambiin la situazion de lenghe.

A Fraleoni Morgera dal M5S o fâs i compliments pe sô buine disposizion. O speri pardabon che lis sôs declarazions si trasformin, tai 5 agns che a vegnin, tun impegn dal so grup a informâsi di plui su chest teme e a sostignî sieltis positivis, magari ancje des sentis de oposizion.

Sergio Cecot, in plui di jessi l'unic che al à rispuindût par furlan, al jere stât il prin firmatari de leç regjonâl che e à cambiât la storie politiche dal furlan: la 15/96. In graciis di lui si è rivâts insom di un percors une vore lunc, che al jere tacât za tai agns Setante e Otante cul Moviment Friûl. Cun lui l'impegn sul furlan al è sigûr, cu la stesse serietât e sientificitât che e sarà su chei altris temis.


La grande brute sorprese e je la posizion di Fedriga: nol à nancje rispuindût aes domandis. Une vere vergogne pal candidât di un partît che in altris agns, e si viôt ben che cun altris personis, al veve puartât indevant ancje bataiis autonomistis e furlanistis. Si viôt che aromai la Leghe e je dome ambassade locâl di Salvini, no à plui ni la voie ni il dirit di rapresentâ il nestri teritori.

Par lei in detai lis rispuestis dai candidâts, cjalait chi

La diference e je tal cûr



A viodi lis strategjiis eletorâls dai partîts, cualchi diference si le cjate.

Al è cui che le zuie sul fâ biele mostre dai muscui, o miôr dai santui: Salvini (e Berlusconi!) par Fedriga; Di Maio pal M5S (il so candidât chi al è cussì anonim che nol covente nancje nomenâlu); Gentiloni par Bolzonello (àno migo vût il coragjo di fâsi viodi ancje Renzi e la Serracchiani?).

Il messaç al è clâr: “Votaitmi me, jo o ai un santul a Rome che nus fasarà rivâ cuatri francs”.

La mê interpretazion e je une altre, ancjemò plui clare: “Ve ca il gno paron, jo o soi dome il gastalt e o fasarai chi ce che al vûl lui, no ce che us covente a voaltris”.

Pal rest si met in vore, se si rive, la organizazion dal partît; si fâs un pocje di mostre di eficience o eficientisim, plui che altri fevelant mâl di cualchi setôr e disint che cussì no si pues lâ indevant (e dispès e je ancje vere...) e proponint soluzions plui o mancul pussibilis.

In maniere subliminâl si cîr di zuiâ su la rassegnazion: “Ma sì, a son ducj compagns, votimi me cemût che tu mi âs simpri votât/cemût che tu mi âs votât la ultime volte”.



Po al è il Pat pe Autonomie: nol à bisugne di santui, Cecot nol è un gastalt, ma il candidât president di une Regjon pardabon autonome. La sô fuarce no ven di parons lontans ma dai furlans.

La diference si sint a colp: ce sintîso in Fedriga, Bolzonello, Fraleoni Morgera? Voie di guviernâ, di comandâ, di gjestî, di messedâ.

Ce sintîso tes feminis e tai oms dal Pat pe Autonomie? Amôr pal Friûl, amôr di Patrie.

Pôc ce fâ: la diference e je tal cûr.

Passât e futûr dal Friûl: finalmentri il nestri puest te Macroregjon!




Cul 1420 il Friûl, fale la Contee di Gurize e cualchi centri ca e là, al jere invadût di Vignesie e al finive di jessi un stât libar.

Cul 1500 e finive la dinastie dai Conts di Gurize e la Contee e passave ae Austrie, ma e à mantignût simpri une grande autonomie fin ae Prime Vuere Mondiâl.

Fin a Napoleon la Patrie dal Friûl, simpri sot Vignesie, e veve une sô autonomie formâl, e mantignive il so parlament, dome che e passave di jessi une des tieris plui sioris di Europe a jessi une colonie sotsvilupade.

Dopo di Napoleon, al è finît ancje il parlament de Patrie, e simpri sot Vignesie il teritori furlan al è deventât une Provincie, par un 50 agns sot de Austrie e po sot de Italie: come Provincie nol podeve fâ cuissà ce. La Italie e à puartât in Friûl miserie, emigrazion, dôs vueris mondiâls, vincj agns di ditature... (ma no stait a dîjal, parcè che e pense di vê puartât ca la civiltât e il progrès...).

Dopo de seconde vuere mondiâl l'autonomisim furlan al à profitât une buine volte de democrazie e al à cjapât forme politiche, par dâ vôs a ce che i furlans a àn volût simpri: jessi responsabii de lôr aministrazion, jessi un popul che al pues decidi de sô economie, de sô societât, de sô maniere di vivi, parcè che al è sigûr di savê decidi pal so ben, in pâs cun chei altris.

L'autonomisim al à fat lis sôs bataiis e cul timp a 'nd à vinçudis tantis: un pôc cun moviments e partîts autonomiscj declarâts, un pôc cun politics di altris partîts sensibii ai siei temis.

Tal 1947, tant par sclarî che si jere pardabon in democrazie, i talianons i metin une bombe devant di cjase a Tiziano Tessitori, sostignidôr dal autonomisim furlan dentri de DC.

Cun dut achel, e jere nassude la Regjon Autonome a Statût Speciâl Friûl – Vignesie Julie.

Une mieze vitorie dal autonomisim, mieze par dôs resons:

  • parcè che sì si otignive la autonomie ma si sospindeve subite fin che no fos tornade sot de Italie la “Venezia Giulia” (un teritori misteriôs che al tacave a pene fûr dai confins orientâi dal Stât Talian e al finive no si sa dulà, plui a Est-Sudest che si podeve...)
  • parcè che capitâl de Regjon e baricentri ideologjic di italianitât al sarès stât Triest, che al voleve jessi indipendent ma che invezit al è stât sledrosât di un pont di viste politic e demografic: un grum di triestins a son finîts in Australie e un grum di esui e talianons a son lâts a stâ a Triest.

E cussì si cjatìn vuê cuntune Regjon autonome che dal sigûr no je perfete, e che e à i siei problemis: un di chei grues e je la tindince a scancelâ il Friûl di bande dal aparât istituzionâl e comunicatîf uficiâl.

Cualsisei robe che e sucêt in Friûl no sucêt in Friûl, ma in Friuliveneziagiulia, po se e sucêt in cualchi puest particolâr, e sucêt tal Isontino, te Destra Tagliamento e v.i.

In struc, ancje se i abitants dal Friûl a son sul 80% de popolazion regjonâl, il Friûl al rive a fâsi sintî dome spudant balins.

Ma no stin a vê pinsîr: cun Fedriga e cun Zaia lis robis a podaressin cambiâ.

Il Friûl al larès intune macroregjon dal Nordest cun capitâl Vignesie e sotcapitâl Triest, li che i furlans a saran se al va ben un 15% de popolazion.

Li sì che o podarìn fâ sintî, finalmentri, la nestre vôs.


(Te foto la Bande dai Presidents)

Cui difindaraial i tiei dirits e i tiei interès?




Provait a imagjinâ un Friûl cence rapresentance politiche: a nivel di Parlament e je za cussì.

I sistemis eletorâi a àn simpri impedît ai partîts autonomiscj di elei un deputât o un senatôr e une des clâfs di leture de debilece dai partîts autonomiscj e je ancje cheste.

La soluzion tradizionâl e jere chê di elei un parlamentâr furlanist, o almancul pardabon e prin di dut furlan, ancje se tesserât tai partîts talians. Te prime republiche alc si rivave a otignî: i partîts talians a jerin preocupâts di mantignî il consens.

Ma aromai i timps a son cambiâts i partîts talians a cirin dome di mantignî posizions privilegjadis, cence dâ nuie in cambi, nancje un guvier di sest. I parlamentârs a son soldaduts o pipinots: a àn dome di ubidî ai ordins plui alts e dimostrâ fedeltât sacrificant i lôr teritoris.

Lait a cjalâ i nons dai parlamentârs elets des nestris bandis tes ultimis elezions: si visaiso che a vedin mai fat nuie pal Friûl, pensaiso che a fasaran mai alc?

La soluzion pal moment e je chê di vê une buine rapresentance politiche in Consei Regjonâl, almancul par impedî che la nestre regjon e ledi a dissanganâsi butant ancjemò miliarts di euros a Rome o copantsi intune Macroregjon, dulà che o deventaressin une provincie cence nissune rapresentance.



La Leghe di Fedriga, e pense za ae macroregjon; e guviernarès cuntun centridiestre che al à butât a Rome 1,8 miliarts di euros che di dirit si vevin di spindi in Regjon.

Il PD di Bolzonello, vice de Serracchiani, al à distrut dal didentri il funzionament de Regjon e al à confemrât i regâi di Tondo a Rome.

Il M5S al propon candidâts sielzûts dal difûr che no cognossin il Friûl e che il Friûl nol cognòs, cence nissune credibilitât politiche e aministrative.

Il Pat pe Autonomie al presente un candidât president, Sergio Cecotti, che al veve za aministrât cence pecje la Regjon e il Comun di Udin, e come conseîrs personis che a àn esperience te aministrazion e te societât civîl, che a son la espression plui sane dal Friûl di vuê.

Cui difindaraial i tiei dirits e i tiei interès?




La politiche dal balon: tignîso pal Friûl o par cui?


Al è za di timp che o soi convint che pe plui part dai eletôrs la maniere di votâ e à plui a ce fâ cu la passion pal balon che cu la logjiche politiche e aministrative.

Trops no sono che a votin a çampe, a diestre, moderât, estremist... par vie che a cjase lôr si à simpri votât cussì? Al è come cui che al ten pal Inter, par vie che so pari al tignive pal Inter.

Cussì al sucêt che o cognòs personis che a son convintis di jessi fassistis e che a votin a diestre (o no votin parcè che no cjatin nuie avonde a diestre...), ma dopo tu fevelis e cul lôr cjâf a resonin di socialdemocratics militants: in gjenar a son lavoradôrs onescj. Ur dîs cence problemis che a votin sbaliât (intindìnsi, sbaliât rispiet a ce che a pensin lôr), ma o ai di dî che ur vuei ben. O ai facilitât di afezionâmi a compagns di lavôr onescj.

Dopo o cognòs ancje personis che a son convintis di jessi progressistis, a dan il vôt a çampe o a un cualchi partît che al dîs di jessi di çampe; a son pronts a jessi solidaris cui disperâts sudamericans o cul Tibet oprimût, parcè che a son lontans, ma ca a cjase nestre a son dai piês nazionaliscj talians, e sul Friûl, ma ancje in fat di economie e societât, a son bogns di resonâ plui a diestre dal Fassio. Chei ca, o ai di dî la veretât, no ju sopuarti: a son inteletuâi alienâts e/o disonescj, prin di dut cun lôr stes e cul lôr popul.

Bon, cambiant di gjenar di tifosarie, a son chei che a resonin cussì: “Ce vûstu votâ chei dal Pat pe Autonomie...? Impussibil che a vincin...”

Ma scusait: cuant che la vuestre scuadre e va a pericul di pierdi e e zuie cuntune altre che e somee plui fuarte o che e à comprât l'arbitri, cjantaiso ancjemò plui fuart pe vuestre scuadre, o laiso a cjantâ te curve di chei altris, parcè che o pensais che a vinçaran lôr?

Se o vivês in Friûl, la vuestre scuadre e je il Friûl.

Se a vincin PD, M5S o Leghe, e compagniis variis, voaltris o pierdês, ancje se o vês cjantât (votât) par lôr.

γνῶθι σεαυτόν


Riflession (l'origjinâl al sarès par castilian) cuntun miedi colombian, pardabon une biele persone, che o ai cognossût îr in Catalogne:

“O feveli castilian, inglês, francês: no vuei invistî lis mês fuarcis e il gno timp par imparâ il catalan, tant cun ducj i catalans si pues doprâ benon il castilian... Isal alc di mâl?”
“E je vere, se tu dopris il castilian cui catalans e lôr lu doprin cun te, tu puedis capî cence nissun probleme ce che ti disin... Ma se tu imparis catalan, in plui di capî ce che ti disin, tu puedis capîju lôr”

Il stes discors al vâl par ducj i popui e dutis lis lenghis.
E nol vâl dome par chei che a vegnin di fûr e a vuelin integrâsi, ma ancje par chei che a nassin tun popul minorizât.
Imparâ il furlan, par nô, al vûl dî imparâ a cognossi e a interpretâ il Friûl e il mont, al vûl dî prin di dut imparâ a cognossisi noaltris.
No je une robe di pôc, al è il principi di ogni savê e di ogni azion, la fonde de filosofie ocidentâl e je la detule delfiche γνῶθι σεαυτόν: “cognossiti te”.

Par rivâ a permeti ai fruts di imparâ il furlan e chês altris lenghis dal Friûl, la competence su la istruzion e scuen jessi regjonâl: tai ultins vincj agns, cundut che la leç e tutele lis lenghis minoritariis, o vin viodût che se la competence i reste al Stât, al è impussibil di fâ jentrâ il furlan a scuele intune maniere che e zovi.

O lassi a ognidun un compit: une riflession suntune scuele che invezit di partî de fonde dal savê, judânus a cognossisi par ce che o sin, par 150 agns e à volût prin di dut impedînusal.


Al jere une volte l'Autonomisim... chel dai barufants




Cualchidun si visial de clime politiche, e ancje culturâl, furlane di uns vincj agns indaûr?

Par cui che no si vise, o pues contâ che o jerin intune situazion che o disarès “pseudosarde”: di fat une tradizion false i fâs dî a Carli V che i sarts a jerin “pocos, locos y malunidos”.

E cussì noaltris furlaniscj/autonomiscj o jerin, o almancul o podevin someâ: pôcs, mats e dividûts.

Mi coventarès scuasi une tesi di lauree par dâ dongje la microstorie dai partîts e partiduts autonomiscj che a àn cirût di imparêsi tai ultins vincj agns: une storie che a cualchidun i somearès ridicule, e che, se mi permetês, ancje jo o trati cuntune ombre di ironie. Ma mal pues permeti parcè che e je ancje autoironie.

Stant che no ai il timp di fâ chê tesi di lauree, o disarai in curt che lis divisions internis a jerin la pecje principâl che cualsisei altri nus butave in muse, magari cjalcjant parsore cu la sperance che si dividessin ancjemò di plui.

Po ben: o sin tal 2018, e lis divisions jenfri autonomiscj a son un vanzum di nuie.

Va ben: Marco De Agostini, dal permafrost, al cîr di butâ un pôc di ledan di mammut intor di Cecot... pazience.

Va ben: un pôcs di furlaniscj si identifichin intune vision un tic masse di diestre par votâ il Pat e a votaran o nuie o Fedriga... nol è un probleme.

Al reste un fat storic, la prime vitorie dal Pat pe Autonomie e je che al è rivât a fâ masse critiche: al è formât di une vore di personis che 20 agns indaûr si saressin za barufadis e dividudis e invezit vuê si sopuartin e si supuartin (e ce fadie!).

O pues dî cun braùre di condividi cheste esperience cun personis che pardabon uns vincj agns indaûr o ai barufât ben e no mâl, ma ur ricognòs cumò une vore di merits.

In particolâr i ten a dî graciis a cui che magari al à za la sô esperience fate, al à za la sô pension, o ancje il so vitalizi, e che cumò nol à nissun obietîf personâl, ma al da une grande man al Pat par une reson che par me e je grande: l'amôr di Patrie (bon forsit e je ancje une altre reson, che a son un tic “locos”...)

Alore no sin plui tant pôcs, o sarìn simpri di plui, e no sin plui dividûts.

Bon, e sul fat di jessi mats... in fin dai fats un furlan normâl nol è mai normâl...


Di notâ che il simbul dal Pat al è une evoluzion grafiche dal grop di Salomon: un grop di continuitât, un grop che al ten dongje.



Autonomie: par vê une societât cussiente

La Autonomie e je un sisteme che al vûl che lis risorsis e lis competencis a sedin plui decentradis che si pues.
Al è clâr che dulà che al covente, al è miôr che i temis a sedin frontâts a di un nivel plui gjenerâl (par esempli politiche monetarie o militâr) e al è ancje clâr che lis regulis dal zûc a àn di jessi claris par ducj e rispietadis di ducj.
Un efiet dal decentrament di risorsis e competencis al è une vore impuartant, o disarès indispensabil tal mont di vuê: si responsabilize la classe politiche locâl e dute la comunitât, si le oblee a cjapâ cussience pardabon dai siei problemis e des sôs prioritâts.
Se si à lis risorsis e i mieçs aministratîfs par frontâ i problemis, no si pues passâ agns a vaî e a dâ la colpe a chei altris, al tocje movisi, cjatâ soluzions, jessi responsabii dai sucès e dai faliments.
Al è clâr ancje che cualsisei sisteme al pues jessi sledrosât e trasformât intune perversion:
  • il concet di autonomie speciâl de Regjon Sicilie al è cussì speciâl che no si pues clamâlu autonomie, ma assistenzialisim privilegjât e mafiôs;
  • il concet di autonomie “responsabile” di Renzo Tondo al jere chel di jessi dal dut sotans di Rome in prospetive di scancelâ il Friûl intune Macroregjon nordiste o nordestine;
  • il concet di autonomie di Debora Serracchiani al è stât chel di repilcâ a nivel locâl il centralisim renzian, par altri mandant simpri vagons di milions di euros furlans a Rome par interès partitic e personâl.
Insiemi cu la democrazie, ancje la autonomie, che e je une sô forme, e domande di stâ simpri in vuaite.



E jere une volte la Autonomie...



A jerin i mês e i agns dopo dal 1976.
De fin dai agns Sessante il Friûl al veve dât di ca e un pôcs di furlans a tornavin dal mont, e almancul la emigrazion no jere plui la sole strade di cjapâ. Ma ve che al jere rivât il taramot.
Cul taramot un pôcs di lôr a àn pensât che o saressin finîts par simpri, che dopo dal Invier 1976-77, passât magari a Lignan o a Grau, o saressin emigrâts ducj. Invezit la plui part dai furlans e à tirât fûr determinazion e ancje rabie.
I agns Setante a jerin agns dûr, dulà che tal confront politic, a jerin dentri ancje lis bombis e lis pistoletadis.
Pôcs le contin, ma tes tendopolis al jere un aiar prerivoluzionari, la DC e à cjapât pôre di pierdi dal dut il control. La pôre che i furlans i àn fat cjapâ ae DC e à fat la diference. Invezit di gjestî la ricostruzion come simpri in Italie (il stât al môf i siei miliarts di une sachete a chê altre, e intes sachetis dai siei amîs, e la int e reste tes barachis); la competence de ricostruzion i è lade ae Regjon Autonome, che in sostance le à zirade ai comuns: i doi protagoniscj de ricostruzion a son stâts la int e i sindics.
Ancjemò vuê la ricostruzion dal Friûl e reste un esempli, in sostance unic in Italie, di ricostruzion che e à funzionât, e il merit al è che si è rivât a imponi il sisteme de Autonomie.

Morâl de storie:
  • in situazions di grande gravitât, no je par nuie dite che a vedin di jessi i grancj a cjatâ lis soluzions, anzit, la Autonomie des piçulis comunitâts e fâs une vore miôr.
  • il Stât centrâl nol mole mai vulintîr il so podê: la politiche, plui che une dinamiche di leçs e normis, e je une relazions di fuarcis. Alore e je fondamentâl la presince di une fuarce che e rapresenti la comunitât, che i fasi pôre al Stât centrâl, che no i permeti di fâ simpri ce che al vûl.

La uniche fuarce in Friûl a podê rapresentânus e a podê difindi i nestris dirits, al è il Pat pe Autonomie.


A cui rindaraial cont Fedriga?


Une volte la Leghe, partide come Lega Lombarda, po dopo Lega Nord, fintremai pe indipendence de Padanie, e diseve di jessi federaliste o, in alternative, secessioniste: la Italie e jere une costruzion artificiâl, i talians come popul no esistevin (che e je ancje vere, pecjât che ju vevin inventâts propit i lombarts...). Miôr menaçâ di cambiâju cuntune altre costruzion artificiâl e cuntun altri popul che nol esist: la Padanie e i padans.
Dopo che la Leghe e à vinçût e e à tacât a aministrâ e a guviernâ, e je tacade une metamorfosi: di moviment scuasi rivoluzionari, si è trasformade intune gnove DC, dome mancul elegante, anzit in diviers câs fintremai maleducade.
Une volte trasformade in DC, al jere clâr, e à fat la fin de DC, cu lis condanis in tribunâl.
Par salvâle de fin sigure, ve une gnove trasformazion: intant che scuasi dute la diestre storiche taliane si jere butade tal centri parcè che li al jere il grues dai vôts, Salvini al à viodût dulà che e jere une buse par passâ e al à cjapât sù lis formis dai neofassiscj, che 20 agns indaûr a jerin i piês nemîs de Leghe... e alore ve che si è passâts di “L'Italia non esiste!” a “Prima gli italiani!”
Cumò che la Leghe e menace di tornâ a cjapâ lis sentis plui altis a Rome e a Triest, al è di spietâsi che in curt e torni a cjapâ sù la sô vieste di DC: nuie di mâl, a disaran tancj eletôrs, adatâsi al è segnâl di inteligjence.
Ma di là des formis e des posizions politichis che a son cambiadis, e je une costante che e je restade te Leghe: di simpri al è il partît plui centralist di ducj. Cui che al è dacuardi cul leader al reste, cui che al pense cul so cjâf al ven parât fûr.
Alore, di là dal fat che Fedriga al podarès trasformâsi intun bon democristian, la domande e je: a cui che al rindarà cont? Ai siei eletôrs o a Salvini? La storie e da la rispueste sigure: Fedriga al podarà jessi il tierç president de Regjon, dopo di Tondo e de Serracchiani, a sacrificâ lis cassis de nestre regjon par paiâ la sô posizion dentri dal partît.

Vote nuie: vote M5S!



E je grivie a cjatâ di dî mâl dal program eletorâl dal M5S, pes regjonâls dal Friûl - VJ: lait a leilu, a son 20 ponts dulà che si disin dome robis di bon sens. Di fat te sostance a son chês stessis robis che a disin ducj chei altris partîts. Ma ce che al mancje e je propit la sostance. La sensazion clare e je che a sedin robis copiadis e butadis li di un scuelarut che al veve pocje voie di studiâ e che dal sigûr nol à capît ce che al copiave.
Tal PD e je une origjinalitât: la arogance e l'imbroi di volê fâ pensâ che propit chei che nus àn puartât dulà che o sin, cumò nus dedin, “finalmentri!”, la oportunitât di cambiâ. Ma fin cumò dulà jerino? Te oposizion? Parcè no àno fat ben fin cumò? (rispueste: parcè che a ubidivin a Rome/Florence. E a van indevant a ubidîur)
Tal centridiestre, cu la egjemonie de Leghe, e je une origjinalitât: la barbarie oportuniste, ignorante e muse rote di Salvini, ancje se chi si presente cu la muse plui creançose di Fedriga. Al sarà ben di viodi: la Leghe e jere federaliste e secessioniste: e zigave “L'Italia non esiste! Non siamo italiani, siamo padani!”. Cumò e berghele “Prima gli italiani!”. Ma alore difindaraie la nestre autonomie? Cussì a voli, a trataran i furlans come se a fossin imigrâts: a disaran “prima gli italiani!”, cu lis lôr mafiis e lis lôr clientelis, e i furlans che a tasin e che a pain.
Tal M5S no si cjate nuie: nissune idee origjinâl, nissun pont centrâl di atenzion, nancje nuie di tant sbaliât, par caritât. Ma nol è propit nuie: nancje un candidât che al cognossi il Friûl e che il Friûl al cognossi.
Se o volês votâ il nuie o podês astignîsi, tressâ la schede o meti schede blancje... o votâ M5S, che al è chel istès.

Invezit se o vês voie di votâ cui che al cognòs e al vûl ben al Friûl, votait Pat pe Autonomie.



Bute vie il to vôt: vote PD!


Cinc agns indaûr il PD de Serracchiani al vinceve, a pêl a pêl, cuintri de coalizion di Tondo, responsabil de aministrazion di prime, che e jere stade disastrose.

Di là dal resonament che cualsisei robe e sarès stade miôr di un secont mandât di Tondo, e podeve jessi une sperance legjitime di vê une buine aministrazion.

Chê sperance e je restade tradide ad in plen: la gjestion Serracchiani, li che Bolzonello al jere vicepresident, e je rivade a lassâ scaturîts la plui part dai siei sostignidôrs, ancje cuadris dal partît e aministradôrs locâi. Un esempli al è stât la sopression des Provinciis e la istituzion des UTI, no dome pe sostance, ma soredut pe maniere. Si à aplicât a nivel locâl la arogance e il centralisim tipics de ere Renzi. Il contrari de nestre tradizionâl autonomie e dal rispiet meretât di simpri dai nestris sindics.

Di chê altre bande i rapuarts cun Rome (e cun Florence) a son stâts di servilisim: la Serracchiani e à doprât lis cassis regjonâls par paiâ la sô posizion dentri dal PD e la sô zonte, cun Bolzonello vicepresident, jal à lassât fâ.

I eletôrs no son vuarps: a àn capît e a àn punît chestis vergognis.

La riforme costituzionâl Renzi-Boschi e je stade refudade dai talians; tes ultimis elezions politichis il PD al à sdrumât il capitâl di vôts che al veve prime di Renzi; la Serracchiani e je lade in parlament par un pêl e dome in graciis di une leç eletorâl fate di pueste par blindâ ciertis candidaturis.

In struc, il PD al è un cadavar politic: Bolzonello al è coresponsabil di ce che al è sucedût fin cumò. Al è une vore probabil che in graciis de politiche dal PD la Regjon Friûl – VJ e finirà in man a Fedriga.

In ogni câs il PD nol podarà vinci.

A chest pont, cemût che si use a dî in chescj dîs, il vôt dât al PD al è un voto inutile, un vôt butât vie. Al è ancje un vôt injust e diseducatîf parcè che al da une conferme a cui che al à tradît il so eletorât e al à metût la regjon in man ae Leghe di Salvini.

Un vôt just e un vôt che al zove invezit al è chel al Pat pe Autonomie, l'unic partît che al garantìs che al rapresentarà pardabon i dirits e i interès legjitims de int di cheste regjon.




Une volte o jerin “l'isola felice” cumò o someìn “l'Isola che non c'è”

A sintî la tension dai mieçs di comunicazion su lis elezions regjonâls, ca di dôs setemanis, al somee che no saran nancje.
Il PD, puar, nol sa di ce muart che al à di murî: dopo dal faliment de Serracchiani, la strategjie des politichis e je stade chê di scuindisi e fâsi viodi mancul pussibil, par no fâ inrabiâ i eletôrs. Se tes regjonâls a varan chei stes risultâts, sarano contents? Alore Bolzonello ogni tant si fâs viodi, ma no masse, e al fâs fente di no vê tignût il sac ae Serracchiani fin îr...
Il M5S nol sa nancje dulà che al è il Friûl, il Friûl nol sa nancje cui che a son i siei candidâts: figurìnsi se al à cualchi idee coerente di meti fûr, miôr tasê e lassâ che i vôts a vegnin de inerzie di Di Maio.
Il centri diestre cun Fedriga al è sigûr di vê za vinçût, al sarès un pecjât mortâl butâ vie une vitorie za concuistade, lant a fâ brute figure cui confronts eletorâi... miôr tasê o recitâ la partute za pronte cence nissun aversari che al puedi ribati.

Al reste il Pat pe Autonomie, cun Cecot, che al à ideis e resons di vendi: al va ator dîlis e al fâs fâ la figure dai scuelaruts impreparâts a ducj chei altris, ma i mieçs di informazion a fasin di dut par no fâlu imparê.

Mi visi di agns indaûr di Monestier che, cun ipocrisie, al diseve che i sarès plasût che al fos un partît autonomist, ma che nol jere, par colpe di noaltris furlaniscj barufants.
Cumò che il Pat pe Autonomie al è, e che al à un candidât dal nivel di Cecot, si viôt ben trop che le contave juste: in chê volte i sarès plasûts fevelâ di un partît autonimist, cumò miôr fevelâ dai imigrâts o dai gjats che si rimpinin sù pai arbui e no rivin a tonâ jù. Cchei a son lis cuistions veris, chê e je la libertât di croniche e la par condicio.

Te sô maniere un pôc stranie, cheste campagne eletorâl e mostre benon ce che o podarìn jessi: une regjon vive e cussiente cul Pat pe Autonomie, o un nuie, une “Isola che non c'è” cun chei altris...






Ce che e je la Spagne

(foto vilaweb.cat)

La Spagne e je un paîs li che trê zovins de Navare (bascs), par une barufe di bar cun altris doi di lôr, (che dome dopo al è vignût fûr che a jerin poliziots), a son in preson, ancjemò cence procès, di un an e mieç: la acuse e je di terorisim e il procediment al è stât jemplât di provis falsis. Par altri trê a son dentri, un pôcs di altris, pe stesse robe, a son libars... pal moment.
In Spagne, une femine che e à vût part in manifestazions cuintri de repression anticatalaniste, manifestazions che in France a saressin a nivel di lote sindicâl flape (int che e je ferme in strade o che e bruse cualchi gome vecje di camion par blocâ il trafic) e je stade arestade: ancje par jê la acuse e je di terorisim. E à vût fortune, le àn molade... pal moment.
La Spagne e je un paîs dulà che atentadôrs franchiscj che a metin bombis cuintri di politics catalaniscj te comunitât valenziane, no vegnin nancje incuisîts: il fat al ven archiviât come “vandalisim”.
La Spagne e je un paîs dulà che un neofassist al pues copâ a scurtissadis un zovin catalanist, al confesse, al ven condanât a 16 agns di preson, a 'nd fâs 4 e dopo al pues presentâsi a elezions, e magari ancje lu votin.
La Spagne e je un paîs dulà che responsabii politics e sociâi di un procediment pacjific, il referendum catalan (magari iregolâr e cence mani legâl), a son acusât di sedizion e ribelion, delits che a implichin la violence. La lôr colpe, daûr dal public ministeri, e je chê di vê causât la violence de polizie spagnole, che e à pestât ben e no mâl oms, feminis, vecjuts e vecjutis, che a jerin fers par votâ. Un pôcs di politics catalans a son in preson preventive, un pôcs, pe stesse acuse e cu la stesse responsabilitât, a son in spiete di procès ma libars, un pôcs a son in esili.
Ce che al lasse plui maraveâts de justizie spagnole e je la sô imprevidibilitât, la sô arbitrarietât, la sô ineficience: di fat no vûl fâ justizie, e vûl dome fâ intimidazion par cont dal guvier.
No je nissune justizie europeane che e ricognossi che i politics catalans a sedin responsabii di ribelion e sedizion; Amnisty International istituzions de ONU a ribatin che la Spagne e je colpevule di une rie di lesion di dirits fondamentâi che no finìs plui.

Ma in Spagne si va indevant cussì: il probleme vêr al è che al 90% dai spagnûi e al 50% dai catalans ur va ben. Il Guvier al pues doprâ cualsisei sisteme, lâ cuintri de costituzion e de leç, i judiçs a puedin vê la stesse ande di chei de Sante Incuisizion: ae plui part de int i baste che il sisteme, cun dute la sô coruzion, al ledi indevant, che si vedi il pagnut, un pôcs di bêçs dongje, e nissun pinsîrs.

O scrîf chestis robis parcè che vuê centenârs di miârs di personis a àn manifestât, ancjemò une volte in pâs, cuintri di chest scandul e parcè che al è il pericul che ancje in Friûl si rivi te stesse situazion: al baste che la int si instupidissi, si disinteressi, ur lassi fâ ce che a vuelin a chei cuatri parons lontans.
Invezit al covente juste il contrari: informâsi, pensâ, impegnâsi, pretindi. Tacant di ce che si à dongje, tacant de autonomie. Cul Pat pe Autonomie.



Udin capitâl, a la furlane



Se si cognòs un talian e si domandii di dulà che al è, in gjenerâl al rispuint cul non di une citât: al dîs che al è di Milan, di Padue, di Rome, di Bari.., ancje se magari al è di un paîs dongje, o nancje masse dongje, de metropoli.
Il concet di identitât taliane al è, pal plui, centrât su la citât, che e slargje il so model su la “provincie”: la citât e concentre lis risorsis, i podês, e fâs propagande di se stesse, e sburte ducj a identificâsi in jê.
Se un furlan al va ator pe Italie e i domandin di dulà che al è, in gjenerâl al rispuint che al è furlan, ancje se al è di Udin: i talians che i àn fat la domande lu cjalin di strani e no capissin ben parcè che al rispuindi fasint riferiment no a une citât, ma a une regjon (robe che par altri a fasin une vore ancje sarts e sicilians...).
Il concet di identitât furlan nol è citadin, ma teritoriâl: se si cjale ben la storie, Udin nol à mai “udinesizât” il Friûl, nol à nancje mai cirût di fâlu.
La sô funzion di capitâl no je chê di slargjâ civiltât citadine, ma e je chê di dâ vôs, par vie de plui alte concentrazion demografiche e economiche, a dut un teritori.
In cheste prospetive si capissin miôr ancje ciertis dinamichis linguistichis, par fâ un pâr di esemplis:
  • la coinè furlane si fonde sul furlan centrâl, ma no dal sigûr su chel di Udin;
  • tai ultins agns, pal fat che in gjenerâl in Friûl si à dât plui dignitât ae lenghe furlane, Udin al à tornât a infurlanâsi.
Fintremai a nivel sportîf la scuadre di balon dal Udin e rapresente dut il Friûl: “fuarce Udin(ese) – fuarce Friûl” al è un sproc che si sint benon, intant che “forza Napoli - forza Campania” propit nol esist.

Se si capìs chest rapuart, si viôt che il rûl di Udin, capitâl a la furlane, al è plui democratic e ancje plui adatât a une societât caraterizade de distribuzion policentriche des ativitâts.
Dut al contrari lis promessis faraonichis che si viodin in tancj programs eletorâi a van daûr dal model de politiche taliane, e cemût che al è sucedût fin cumò, a son destinadis a jessi dome bufulis o a vê risultâts paradossâi e falimentârs.





Vive Sant Marc!



Simpri di plui o crôt te continuitât dai fenomens storics.

O crôt che i rus a varan simpri un zar, che i spagnûi a varan simpri une incuisizion, che i catalans a saran simpri masse dividûts e indisponibii al dialic, prin di dut tra di lôr, che i furlans a saran simpri autonomiscj...

Ma vuê o vuei fevelâ dai Venits: la lôr storie e pues salacor insegnânus alc sul presint e sul futûr.

In particolâr o cjali doi fats storics che a àn vût efiet ancje su di nô.

1: Sant Marc nol è mai stât a Vignesie, ni di vîf ni di muart. La Glesie fondade di Sant Marc, sul incrosâsi des viis dal Mâr Adriatic cun chês des Alps e de Europe centriorientâl, e je la Glesie di Aquilee. Ma i Venezians a vevin bisugne di autojustificazion e di autoritât, ancje religjose, cussì a àn robât cuatri vues, disint che a jerin relicuiis, e soredut a àn robât il titul di Patriarcje (di Aquilee) a Grau, e po, cui secui, a àn fat ce che al coventave par scancelâ il Patriarcjât di Aquilee chel vêr, chel furlan, sedi a nivel politic che a nivel religjôs.

2: Tal 1420 Vignesie e à invadût la Patrie dal Friûl: no le à scancelade come istituzion, le à lassade esisti ancjemò, dome che i à metût parsore un lutignint, le à disvuedade di ogni funzion concrete, le à trasformade intune colonie. Il Friûl, che te Ete di Mieç al jere une des tieris plui evoludis e sioris de Europe, sot di Vignesie al è colât inte desolazion demografiche e economiche.

* * *

2018...: Il Venit saraial bon di aneti il Friûl – VJ e di doprâlu par deventâ finalmentri titulâr di une autonomie speciâl? Trasformaraial di gnûf la nestre tiere intune colonie desolade, o cheste volte lu scancelaraial di plante fûr? Fedriga sarial president de regjon, o lutignint venit sul Friûl?

* * *

Par sierâ, un sclariment: o pensi che il Venit, come dutis lis regjons talianis, al vedi dirit ae autonomie speciâl, ma chest nol justifiche la idee di une macroregjon fûr di ogni logjiche di rispiet de realtât. Il Venit, la regjon plui taliane dal Nord Italie (par lenghe, culture, mentalitât...), al varès podê espotic sul Friûl, la regjon mancul taliane di dutis (par lenghis, culture, mentalitât...).