Une fevele sflandorose, une procedure intorgulide

 

Al è pôc che al è vignût fûr il libri “Une fevele sflandorose - Una splendida favella”, che in 120 pagjinis (test dut in dôs lenghis) al conte “la storie aventurose de lenghe furlane e de sô leterature”.

L'editôr e je la ARLeF, Agjenzie Regjonâl pe Lenghe Furlane, che e je un ent public e no un editôr comerciâl, duncje il libri no podês comprâlu in librarie, ma al ven dât fûr in regâl, par promozion de lenghe furlane e, mi somee a mi, soredut dai autôrs dal libri.

I autôrs a son William Cisilino, diretôr de ARLeF (alore il diretôr al spint i bêçs publics de ARLeF par publicâ il so libri) e il so amì e compagn di conferencis Flavio Santi.

Al è propit dai autôrs che o vuei fevelâ.

William Cisilino al è laureât in leç te universitât di Triest e nol à nissun percors di formazion specifiche in storie de lenghe furlane o in leterature furlane. No vuei dî che al sedi un ignorant, ma in storie de lenghe e de leterature furlane si scuen definîlu un diletant. Ai critics e ai esperts ur lassi di valutâ se al è un diletant bon o mancul bon.

Flavio Santi al è nassût a Alessandria e al à studiât e al lavore in Lombardie: di là des origjins di une part de famee, dal Friûl e de lenghe furlane al à plui che altri sugjestions. Nol fevele furlan, cuant che lu lei lu pronunzie mâl e in ce che al dîs e in ce che al scrîf al dimostre pocje atenzion e pocje comprension, par esempli declarant che “bielo dumlo” e je une locuzion masculine riferide a une femine (!) o falant citazions tal scrit (sedi te version taliane che in chê furlane) cun formis furlanis che in plui di jessi imprecisis a son propit impussibilis. Ancje di lui duncje si pues dî che al è un diletant, e cun competencis linguistichis bassis.

A chest pont la mê domande e je: la ARLeF (e cui di precîs dentri de ARLeF: il president Eros Cisilino? il diretôr William Cisilino? il CdA? il Comitât Tecnic Sientific?) cun ce criteris, cun ce selezion e cun ce procedure aie sielzût di spindi i bêçs publics dant la incjarie di fâ un libri a doi diletants?

E o zontarès altris domandis:

• il diretôr William Cisilino aial scrit chest libri tes oris di vore o tal timp libar?

• se lu à scrit a vore: pardabon scrivi un libri divulgatîf jentrial tes mansions di un diretôr che nus coste sui 100.000 € ad an? O magari al veve di meti il so timp a fâ lâ indenant un tic miôr la ARLeF e i tancj progjets che si strissinin cun agns di ritart?

• Flavio Santi isal stât paiât? Aial vût rimbors spesis? De ARLeF o dal Sportel Linguistic Regjonâl? Trop nus isal costât fâlu vignî in Friûl a contânus lis sôs sugjestions?

• trop sono costâts il coordenament editoriâl (William Cisilino e Adriana Cruciatti), la impagjinazion e la grafiche (Anthes) e la stampe?

• tropis copiis sono stadis fatis?

O soi usât a no vê rispuestis, ma o voi indenant a fâ domandis.