Friûl: ce isal?

Un post di informazion e formazion, par vie che devant de ignorance di tancj sorestants e comunicadôrs e de confusion che a butin tal cjâf de int no si sa cemût parâsi...

Alore o rispuint a une domande semplice: ce isal il Friûl?

Come cualsisei espression gjeografiche e à cualchi ombre malsigure: in pratiche e je incierte la Valcjanâl, che in cheste mape e je, ma che prin de prime vuere mondiâl e je simpri stade un cjanâl carinzian, ma che dopo de storie des opzions si è in part infurlanade e ancje intalianade. Dal Friûl al fâs part Maran, ma no Grau.

Di cuant che chest teritori al à a ce fâ cul nazionalisim talian la tindince e je stade chê di ridusi in frecuence e in dimension la nozion di Friûl: alore ve che si tache a fevelâ di concets gjeografics mai esistûts prime, che a fasin smamî il Friûl cence ricognossii nissune identitât o che i gjavin tocs, e a nassin il "Triveneto", lis "Tre Venezie", naturalmentri cu la "VENEZIA GIULIA", che ducj i volìn tant ben che mai e che daûr dal câs e corispuint dome al teritori de procincie di Triest, o ancje di chê di Gurize, o ancjemo magari di chês di Udin e Pordenon, e naturalmentri a Est e a Sud e rive fin dulà che e pues la fantasie nazionaliste talianone; ma anìn indevant, o vin ancje "Isontino" che ur permet ai gjornaliscj de RAI, dal Messaggero Veneto, dal Gazzettino e v.i. di fevelâ dal Friûl orientâl cence "ufindi" nissun (si viôt che a clamâ la int cul lôr non a àn pôre di ufindile e che ancjemò a àn tal cjâf chês bielis definizions tant che "fioi de' cani de' furlani" o "dime porco, dime can, no sta dirme mai furlan"...); e po naturlamentri la "Destra Tagliamento", magari il "Liventino", il mitic "(ricco) Nordest".

Mi disaran chescj grancj inventôrs di neogjeografie, che lis mês nozions a son indaûr, che i timps a son cambiâts che il Friûl nol covente plui, nol à sens, si à di vierzisi, no di sierâsi (cuissà parcè al somee che a vierzisi a son simpri lis sachetis de int o lis vissaris de int sassinade in vuere, intant che cui che al fâs lezions di modernitât si siere sui siei interès meschins e personâi...), ma come persone che e lavore cu lis peraulis, tra gramatichis, coretôrs e dizionaris, mi plâs di clamâ lis robis cul lôr non.

Friûl al è Friûl
nazionalist al è nazionalist
ignorant al è ignorant

E tra chescj trê concets chel che o sielç al è il prin.

PS: doman, joibe ai 30 di Otubar apontament a Sant Zorç dal Noiâr, in vile Dora a vot e mieze di sere, se si à voie di fevelâ un pôc dai contignûts dal libri "Venezia Giulia la regione inventata".

Odissee a Codroip

Par sant Simon a Codroip o sarai a presentâ la Odissee e a ricuardâ il gno amì e compagn di traduzion, il Pic.

L'apontament al è par vinars 24 a vot e mieze di sere li de biblioteche di Codroip.

Cerdanya e Catalunya Nord

Cumò un fin di setemane cuiet, che cussì o ai ancje il timp di meti sù lis fotos fatis dôs setemanis indaûr in Cerdanya e te Catalogne Nord, tal stât francês, ma simpri Catalogne, almancul pe storie e pai catalaniscj e pai nons des monts. De bande francese, tai paisuts di mont, la int cualchi volte e fevele ancjemò catalan, tant dispès invezit lu àn pierdût e a san dome che francês, ma pardabon, li che o sin lâts noaltris di int o 'nd vin cjatade pocje. Un altri discors diferent al sarès pes zonis plui popoladis, e ancje pe cidute di Perpinyà, dulà che la ativitât militante a pro dal catalan e je plui organizade, ma ancje la pression de lenghe uficiâl e je plui fuarte.

Vinars ai 10 di Otubar

A cinc e mieze dopomisdì, li dal auditorium de sede gnove de Regjon in vie Sabadini a Udin (devant di Onde Furlane, tant par capîsi) e sarà la presentazion de gnove version dal Grant Dizionari Bilengâl Talian-Furlan dal Centri Friûl Lenghe 2000.
Une ocasion par viodisi, par capî ben un dai plui grancj progjets di politiche linguistiche dai ultins agns e ancje par vê a gratis il cd dal dizionari, plui di dut par chei che no àn une conession tant buine e svelte e che alore no puedin tirâle jù par internet!

Pal Pedró dels Quatre Batlles

Une piçule escursion pes monts catalanis: pecjât pai nûi bas che no nus àn lassât gjoldi ad in plen il panorame.

Scuele Furlane

Cuntun pâr di mês di ritart (ma o soi stât vie un pôc!) o segnali ancje jo il blog SCUELE FURLANE, de mestre Lorele la Morete, une des plui bravis e creativis che o vin in Friûl.

Shortbread

E je vere che si pense che la cusine des isulis britanichis, gjavant salacor il salmon, no vedi masse di dî a chês altris gastronomiis plui innomenadis, ma alc di bon si cjate pardut. I biscots di spongje scozês, magari cuntun te o cualchi alc di plui fuart di bevi dongje, a son propit bogns e facii di fâ.

Ingredients:

Une part di pês di spongje (metìn 100 grams)
Mieze di zucar (50 grams)
Une e mieze di farine (150 grams; se si vûl si pues fâ ancje cuntune part di flôr e mieze di farine di rîs)
Un piç di sâl

Par fâ i biscots si impaste ben zucar e spongje, po dopo si zonte il sâl e la farine. Cuant che al è dut ben messedât si splane cul mescul la paste, che e resti avonde alte (1,5 cm). A son plui formis di shortbread, ma chê plui facile e plui comude a son i fingers, i "dêts": si taie la paste a retangui luncs plui o mancul come un dêt e si fâs parsore busutis cuntun piron o cuntun stechedincj.
Si metin in for a 180 grâts, par un 25 minûts (ma si sa, ogni for al è un tic diferent di chel altri). Si lassin disfredâ su la lastre che a son cuets.
Bogns a son bogns, ma ocjo cu lis caloriis.

Viaç di gnocis in Scozie

Un biel viaç, chel in Scozie: cul avion de Catalogne a Prestwick, di li cul tren a Glasgow e a Gourock, po dopo in barcje fin a Dunoon e di li finalmentri o vin tacât a pedalâ pardabon cu lis nestris bicicletis: plui indevant o metarai la mape dal zîr, par cumò fotos e cualchi coment.
Prin di dut, cemût che si spietavin o vin cjatât tancj nûi e avonde ploie e ogni tant ancje un aiaron incuintri: ce che no mi spietavi al jere che tantis des fotos che o ai fat a vignissin tant mâl. Ca o met une selezion di chês che plui o mancul si salvin!

Di Dunoon a Tig-na-bruaich: rivis sù che nus tain avonde lis gjambis e il flât, soredut par vie che a son lis primis, ancje e je la prime ploie.

Di Tig-na-bruaich a Kilmartin: o cjatìn lis primis vacjis scozesis pelosis!!!

Di Kilmartin, un puest plen di storie (e di preistorie) pardabon di no pierdi, a Lochawe, cul biel cjistiel di.

Di Lochawe (in tren fin a Connel) a Glen Coe, passant devant dal cjistiel di Stalker.

Di Glen Coe a Fort Williams: une scurtarole da pît de mont plui alte di Scozie, par no cjapâ un stradon une vore traficât. Ae fin une grande fadie, rivis sù che no molin, clapigne e crets, cence podê gustâ par vie dai tavans e dai trements moscjins di chenti, i midges, che se si fermin plui dal timp di meti in bocje un biscot nus rivin intor a centenârs. Ma il paisaç pardabon biel, cundut che al è un implant di culture dai boscs cun tais totâi, une vore diferents di ce che, par fortune e in graciis dai nestris forestâi, al sucêt in Friûl.

Di Fort Williams in tren e traghet fin te isule di Skye, li che o cjatìn un biel soreli.

La matine a visitâ il cjistiel di Eilean Donan e po dopo jù pe isule di Skye fin tal paisut di Elgol (cuntun piçul tribût ae rose dal sgarç, simbul di Scozie).

Une gjite in barcjie a viodi fochis (che no son tes fotos) e uciei di mâr, masse nûi e moviment par che lis fotos mi vegnin di sest.

Di Elgol di gnûf sù par mieze isule fin a Struan, passant devant di un cimitieri ossianic e dongje di monts spetacolârs.

Al passe un altri pâr di dîs, un di ploie a Skye fins a Uig e di li cul traghet fin tes Ebridis esternis. Dopo de part di mont de Isule di Lewis e Harris, incrosant dute la isule o rivìn a Callanish, cui siei cerclis di piere che par gno cont no àn nuie di mancul di Stonehenge. Pôc plui a a Nord un dai Brochs (costruzion protostoriche in forme di tor taronde) conservâts miôr e un paisut di cjasis di piere nere, cul cuviert di torbe e jerbe. Lant indevant fin a Stornoway une biele foto a un biel bo scozês!

Si torne in barcje fin in Scozie grande, a Ullapool.

Dopo doi dîs di stâ fers par cjatâ une gome di biciclete gnove e montâle o tornìn a lâ sù e jù: par recuperâ dîs, cundut des rivis sù, dal aiar e tai ultins doi dîs ploie ancje fuarte, in cuatri tapis di plui di sessante chilometris in dì o fasìn dute la cueste ocidentâl che nus reste e chê setentrionâl e o rivìn a Thurso, cun tos e mâl di cuel.

O passìn tes isulis Orcadis, li che a son monuments preistorics impuartantons: lis cjasis neolitichis di Skara Brae, li che si pues viodi ancjemò i mobii di piere, e lis pieris di Brodgar e di Stennes. Ancje un pôc di soreli, ma tant aiar che mai.

Dopo doi dîs tes orcadis o rivin a Aberdeen in nâf e a pene plui a Sud a son i rescj de fuartece di Dunnottar e une cueste maraveose.

Po dopo o sin stâts cuiets, tornant bande Edimburc e Glasgow cul tren, ma o vevin za fat pôc mancul di 900 km in bici e un disnivel cumulât in rive sù di plui di 10.000 metris.