11 di Setembar a Barcelone

In Catalogne vuê e je la fieste nazionâl: si memoree la sconfite intune vuere di sucession, li che Filip V, deventât re di Spagne tal puest di un altri pretendent, sostignût dai catalans, par svindic al veve scancelât i dirits tradizionâi de Catalogne, al veve proibît di doprâ la lenghe catalane e fintremai di fâ svolâ acuilons.

I catalans a àn une lenghe che e je tutelade, che a sintin proprie, ma ancjemò minorizade e in pericul di sparî.

La Catalogne no je un paradîs, e à tancj problemis, ancje politics, ma al pues jessi interessant cjalâ cualchi foto di cheste fieste, che par gno cont a rispuindin a di une domande: di cui ise la identitât, la bandiere, la lenghe catalane? E tal spieli: di cui ise la identitât, la badiere, la lenghe furlane?

Di cui che al fâs folclôr

Dai indipendentiscj andalûs (che a son i terons de Spagne!)

Des feministis

Di cui che al vûl difindi il teritori de speculazion edilizie

Dai sindicâts (lavôr, tiere e libertât)

Dai anarchics e dai rivoluzionaris radicâi (ancje violents, ancje se dome a peraulis e a maiutis)

De polizie normâl (che mi à percuisît 3 voltis il russac), blindade e pronte al intervent o in monture di fieste

Di cui che al da informazion su la fieste organizade (vistût di blanc ancje se nol è infermîr, e catalan ancje se nol è blanc)

De buteghe dal pan, de vecje buteghe di alimentârs, dal gnûf ristorant sirian

Dal sport, dai dissegnuts dai fruts, dai gjornâi

De musiche zovine, di une cjantante maiorchine (Maria del Mar Bonet), di une famose orchestre di cobla

Dai autobus, dai taxis, des machinis privadis, dai machinons dai politics

Des cjasis de int, dal Palaç dal parlament regjonâl

A chest pont la rispueste che mi pâr di vê capît e je: in Catalogne la identitât, la bandiere e la lenghe catalane a son un pôc di ducj, che a plasin o che no plasin lis lôr posizions, ideis e espressions, ancje contrariis tra di lôr.

Par gno cont pai furlans al è compagn, che a disin ce che a vuelin i politics e che a scrivin ce che a vuelin i gjornâi, dome par fâ i lôr interès e chei dai lôr parons.

A cui che in Friûl al pense e/o al dîs e al scrîf, che une lenghe come il furlan o come il catalan o come l’irlandês e tantis altris e covente par dividi, par discriminâ, par resurî lis fantasimis dai balcans, par jessi imponude in maniere naziste o no sai ancjemò ce, cun chestis fotos mi sint di dîi:

1) IGNORANT

2) LIMITÂT E AUTOLIMITÂT

3) NEMÌ DES DIFERENCIS

4) NEMÌ DES LIBERTÂTS

5) VENDÛT A INTERÈS CONTRARIS AE TÔ COMUNITÂT

6) MA VA IN… !

Juste une code par cualchi furlanist: in Catalogne no si fevele mai di autonomie, nancje no capissin ben ce che e vûl dî (salacor parcè che le àn za)… si fevele di indipendence o, che al è ce che mi plâs di plui a mi, di LIBERTÂT.

Pa amb tomàquet

E va indevant la mê rassegne gastronomiche: chel che us presenti al è un dai plats nazionâi catalans e al è facil che mai.

Si cjapin fetis di pan di cjase (= "pane casereccio" o par catalan, se o passais di chestis bandis, "pa de pagès"; ancje il pan puliês al va benon) e si metin a brustulâ: la robe miôr e sarès dongje des boris, ma se di no ancje suntune lastre sul spolert o ad alt tal for.
A àn di jessi bielis brustuladis: pe cusine catalane se nol à alc di neri e nol fâs vignî il cancar nol sa di nuie (chel de imagjin in bande al è un fotomontaç!!!)
Cumò si cjape un spi di ai e si sfreole parsore dal pan: al ven bon, ma al è facoltatîf.
Stesse robe cul tomât (che al sarès il pomodoro): si cjape un di chei che a vedin avonde aghe, biel ros e madûr, si taie a mieç e si sfreole parsore dal pan, ben e no mâl, che al à di lâ dut tal pan e in man us à di restâ dome la pelisine.
Par cheste operazion chel miôr al è il "tomàquet de penjar" (tomât di picjâ), une varietât che e ven ca in Catalogne e che o ai provât a semenâ: puaris plantutis, cui muredôrs che nus levin ator par cjase a àn vût une vite dure, ma ca us met une foto di ce che mi ven sù tal ort.

Naturâl che cuant che al sarà plui grues e plui madûr e sarà une altre robe: a varessin di vignî cussì (foto di repertori).

Il biel dal "tomàquet de penjar" al è che si pues picjâlu intun puest fresc e al reste bon cence lâ di mâl, cussì si pues fâ pa amb tomàquet dut l'an.

Se no vês "tomàquet de penjar", provait cun ce chei che o cjatais.

Dopo sfreolât cul pomodoro, si sale parsore, si bute un fîl di vueli di ulive di chel extravergjin e il pa amb tomàquet al è fat e bon che mai.

Si pues ancje racomandâ di no preparâlu prime, ma di puartâ in taule pan, vueli e un platut cui tomâts e cui spîs di ai e che ognidun si fasi lis sôs fetis.

Si pues mangjâlu cussì o ancjemò miôr cun formadi o, cundut che o soi vegjetarian, robe purcine o ancje cu la renghe.

Come che a disin achì: Bon porfit!



PS: par bevi dongje o consei un bon vin Abadia di Raimat, che al è ancje un dai vins catalans conseâts di Xavier Lamuela!

Tal mont de Lune

Bon, no soi lât fin su la Lune, ma tant no son lâts nancje i americans e tal mont de lune o soi une vore dispès!!!
Cheste e je une foto fate intune session astronomiche cun Teresa e so pari.
Tecniche fotografiche: cirî di no rompi masse lis citis a chei che a san fâ e a pene che a cjalin di une altre bande svicinâsi cuntune machine fotografiche digjitâl di cualitât medie basse e fotografâ dentri dal oculâr cence nissune sorte di adatadôr cirint di tignî la machine ferme e drete a man...
Il risultât nol è tant mâl.

Cuatri peraulis su la lenghe furlane

Mandi,
chest al è un blog personâl che plui di tant nol fevele di robis publichis, ma di persone o soi pardabon stuf di dutis lis declarazions vergognosis che si fasin in chescj ultins mês cuintri de tutele de lenghe furlane.
Par cui che al à voie di documentâsi e di mangjâsi il fiât il sît www.lenghe.net al à sù une biele rassegne stampe.
O viodarês che e je une grande atenzion dal cuotidian "Il Piccolo" su cheste cuistion, e alore o zonti cualchi coment.
E je une domande, che o pensi che e meretarès une rispueste publiche sintetiche e fuarte: parcè il gjornâl di Triest, citât che no sarà tocjade in nissun câs dai proviodiments sul furlan, si impegne cun tante costance intune campagne cuintri de leç su la lenghe furlane?
La domande, in maniere polemiche, le veve za fate Sergio Cecot: il Piccolo, si sa, nol à rispuindût. O pensi che al sedi il câs di tirâ fûr i interès e lis resons veris di chestis posizions: no pensi che e
sedi dome la code di un brut costum aromai interiorizât, ma ben che a sedin altris cuistions. O ai idee che par cualchidun che al volarès une regjon omogjenie e facile di aministrâ, o miôr di dominâ, une pretese di ricognossiment de diversitât e duncje de identitât e de autocussience a sedin une menace: se si da ai furlans il dirit di vê une lenghe a deventaran un popul che magari al pues pretindi ancje di decidi dulà e se a passin autostradis, liniis di alte velocitât, eletrodots e vie indevant. Un popul cussient e libar nol è comut, ancjemò di mancul se i si vûl fâ parsore une regjon inventade (il non al podarès jessi VeneziaGiulia...).
Se cualchi furlan al fevele cuintri de lenghe furlane al pues benon jessi par vie che al à une idee
di Friûl diferente de mê, o ancje, permetêtmi, par vie che al è stupit e/o ignorant e/o al à glotût e digjerît un secul e mieç di imposizion dal autolesionisim e dal autoodi, ma se lu fâs in maniere sistematiche un strument di comunicazion no furlan, al vûl dî che a son interès politics e economics avonde grues.
Ancje se dolorose, vîl e miserabile, e je une conferme che ce che o fasìn al va bande la libertât, e che al vâl la pene di lâ indevant.

Dongje di Castellar del Vallès

Aromai par chest Istât al è dificil che o fasi zîrs tant lontan, ma ancje dongje ca a son puescj biei. Ca a son un pocjis di fotos fatis tai mês passâts dilunc dai ziruts in bici a un cuart di ore di cjase e un pocjis di fotos des cjasis plui bielis dal paîs.

Kanelbullar

A lâ ator pal mont e ven fam: alore in plui des fotos al va ben meti ancje un pocjis di ricetis di robis buinis di mangjâ.

Chescj a son dolçs tipics de Svezie: ju ai cerçâts là vie e o ai provât a fâju e a son vignûts compagns cun cheste ricete.

Ingredients pe paste:
50 g. levan (o miôr di fece, di chê di fâ il pan)
150 g. spongje (daûr di cualchi version margarine)

1/2 litri di lat
1 piç di sâl
100 g. di zucar
100 g. di farine blancje

Ingredients par farsî
50 g. di spongje (o di margarine)
zucar (a voli)
canele in polvar (a nâs)

Preparazion:
Disfâ il levan in pocje aghe cuntune sedonute di zucar.
Intune terine disfâ la spongje a bagn marie, po dopo zontâ il lat clip, il zucar, la farine, il levan e un piç di sâl: impastâ par dîs minûts fin che la paste no je slisse e lustre. Lassâ che la paste e jevi par mieze ore (e à di deventâ il dopli di volum).
Tornâ a impastâ e dividi in doi tocs: cun ogni toc fâ un retangul alt 1 centimetri e larc 20-25.
Su ogni retangul passâ spongje e spolvarâle di zucar e di canele in polvar (bondante).
Fâ sù ogni retangul in forme di rodul e taiâ fetis gruessis un 2 centimetris; cjapâ ogni fete, dâi un pocje di forme di bale cu lis mans e metile tune lastre di meti tal for. Prime di metilis tal for si lassin a jevâ une altre volte une mieze ore.
Par cueilis si metin tal for a 200°C par uns 10-15 minûts.
Naturalmentri i svedês a mangjin chescj dolçuts cul cafè (a bevin almancul cinc cafês in dì!!!).
Stant che a son un dolç ipercaloric e pesantut (e baste une kanelbulle par jemplâti il stomi par cuatri dîs) si pues ancje provâ a fâlis plui piçulis: une volte lis ai fatis grandis la metât e ducj a àn preseât.