Oatcakes e creme di formadi e whisky

Cemût che o savìn ancje di Internazionalitari si è inviade la campagne pal referendum pe indipendence de Scozie: un grant risultât, che al ven dal grant lavôr fat dai indipendentiscj scozês, che cuntune evoluzion politiche durade plui di cualchi an, a àn puartât il lôr discors di un plan scuasi dome emozionâl a un plan identitari plui madûr, che al ten cont de economie, de eficience governative e v.i., dant ae int simpri plui fiducie in se stesse e tune Scozie libare.

Tornâ in Scozie in curt par me al è avonde dificil, ma si pues viazâ almancul cui savôrs. Cussì o ai metût dongje chest plat.

Pai oatcakes:

vene: 250 grams

spongje: 20 grams

aghe clipe: une tace

1 sedonute di levan chimic

sâl

Impastâ la vene (in flocs piçui se no si le cjate in farine) cu la aghe clipe (disìn ancje cjalde) e 20 grams di spongje, regolâ di sâl.

Splanâ la paste cul mescul, biele fine, e taiâ in cerclis di un 20 cm., taiâ ogni cercli cuntune crôs e cuei tal for a 170 grâts par un 25 minûts.

Pe creme:

3 balis di ûf

150 grams di formadi cheddar scozês (jo tal supermarcjât lu ai cjatât nome irlandês, ma almancul nol jere inglês ;))

100 ml di whisky scozês

pevar

Meti lis balis di ûf tun contignidôr che dopo al puedi lâ a bagn marie, sbatilis.

Gratâ il formadi e zontâlu aes balis di ûf.

Zontâ il whisky e messedâ dut cueìnt a bagn marie, simpri messedant, fin che nol devente dut come une creme. Fâ disfredâ messedant ogni pôc.

Servî cu cualchi gran di pevar neri pestât grues e spolverât parsore.

Note: i oatcakes a son galetis tipichis scozesis, la creme invezit no je une ricete tipiche (o almancul no che jo o sepi), ma mi soi ispirât a un formadi cheddar invecjât tal whisky che o vevi cerçât in Scozie.

Rosis di Frico

Une piçule rielaborazion avonde coreografiche dal frico.
Ingredients:
formadi vecjo gratât
patatis
1 cevole (plui o mancul 200 grams)
mieç miluç
sâl
pevar
zucar
spongje

Dislidi planc a planc la cevole taiade fine fine e il mieç miluç gratât cuntun pâr di sedons di zucar, cul fûc bas e messedant ogni tant, fin che no si caramelize, in câs zontant un pocje di aghe se al è pericul che si brusi: se al plâs il contrast tra dolç e salât si pues meti fin a 125 grams di zucar, in chest câs e ven une sorte di marmelade di cevole e miluç. Cuant che e je cuete tignîle in bande.

Fâ i zeuts cul frico, che aromai a son tradizionâi: tune fersorie si bute un pâr di pugnuts di formadi gratât, si cuei des dôs bandis cul fûc bas. Tal moment di tirâlu fûr poiâlu parsore di une tace metude cul cûl insù par che si plei e al cjapi la forme di zeut.

Spelâ lis patatis, che sedin di chês buinis di fridi o di fâ tal for, no masse gruessis, taiâlis a mieç e cuntun curtìs che al taie ben (o ancje cul spelepatatis stes) taiâ la patate intune curdele lungje e sutile ma avonde largje e fâle sù in forme di rose. Metile a cuei tal for (a 180° C, par un trê cuarts di ore o in ogni câs fin che a son ben cuetis) cuntun tocut di spongje parsore e, se si vûl, un tic di pevar.

Cuant che lis rosis di patate a son cuetis salâlis e metilis intun zeut di frico li che si à a pene metût une sedon di salse/marmelade di cevole e miluç. E bon gustâ!

Al coventarès un partît furlan(ist)... anzit, miôr doi

Intant che si intaie, a colps di inchieste judiziarie, un altri passaç gjenerazionâl te "democrazie" taliane e intant che si svicinin altris elezions, al valarès la pene di fâ une riflession su la situazion furlane.
Cetantis voltis di fat, tes ultimis desenis di agns, chei che i tegnin al Friûl no si sono sintûts vuarfins di un partît politic?
E ancje lant ator pe Italie e pe Europe, cun int che si intint di minorancis, tropis voltis no si cjatial cualchidun che al domande: "Ma voaltris furlans, no vêso un partît che al rapresenti i vuestris interès?"
Cuant che mi domandin a mi, mi tocje rispuindi di no, e cuant che mi domandin parcè, o dîs che e je une storie lungje, che al jere un partît che al veve vût un ciert sucès, il Moviment Friûl, ma che cumò a son tancj agns che al è "conzelât" e che, par otignî alc a nivel politic, al tocje lâ a cirî singui referents che a vedin une sensibilitât pes cuistions furlanis, ma che a son in partîts che a àn il cjâf di altris bandis.
Si pues dâ tantis resons e tantis interpretazions dal fat che il Moviment Friûl al vedi lassât di fâ, disìn cussì, "politiche ative": jo, che no soi un espert di politiche, o viôt ciertis resons tal fatôr demografic. A nâs mi somee che il Friûl al sedi masse grant par podê fâ un partît di racuelte (cemût che a puedin fâ i slovens o i sudtirolês o i valdostans...) cence che a sedin tantis barufis, che di fat a àn simpri tormentât il MF e i esperiments politics che a àn cirût di cjapâ il so puest. E lis barufis principâls a son, in gjenar, tra chei che a àn une vision di diestre e chei che a àn une vision di çampe. E je vere che a somein categoriis che no àn plui une base ideologjiche, ma a son ancjemò vivis te vite politiche di vuê... in Italie no si cirial di rivâ, un pôc a la volte, a un sisteme bipartitic?
Alore in Friûl, cumò che i partîts talians a son avonde in crisi, mi pâr che o vin chestis pussibilitâts:
1) cirî di tornâ a meti sù un sôl partît "furlanist"
2) lâ indevant come cumò, cun politics sensibii al Friûl sparniçâts un pôc ca un pôc là
3) organizâsi e vê DOI PARTÎTS pal Friûl
La pussibilitât 1) a son vincj agns che e dimostre di no podê funzionâ.
I risultâts de pussibilitât 2) ju viodìn, e je la situazion di cumò: cualchi fruçon di tutele, cualchi polemiche, ma in struc nissune evidence dal Friûl tal dibatiment politic e nissune planificazion ordenade pal autoguvier, pe lenghe (miôr, pes lenghis), pal ambient, pe societât...
E reste la tierce vie: chê di vê doi partîts furlaniscj, un di centridiestre e un di centriçampe, che si diferenziin te impostazion di ciertis problematichis, ma che a fasin sintî il lôr pês pal Friûl, ognidun cu la sô vision, sedi che in regjon e sedi une aministrazion di une bande che di chê altre. Par altri no je une grande invenzion: al baste cjalâ in Spagne, dulà che catalans, bascs e galizians no àn un sôl partît di racuelte, ma a 'nd àn simpri doi, un di centriçampe e un di centridiestre, cul risultât di cjapâ une vore plui di vôts e di rivâ a vê risultâts, in tiermins di autonomie e bilinguisim, che fin cumò in Friûl a son stâts impussibii.

Dolmen de Serra Llosa

Dopo la Pedra Gentil un altri Dolmen par fâi invidie ae Archeoninine! ;P

3 di Avrîl

Colònia Güell

Une colonie, vâl a dî un paîs fat sù gnûf tor ator di une fabriche, in chest câs tessile, su la fin dal secul XIX: une architeture fate di materiâi sempliçs, ma che in plui de funzionalitât ae industrie e rivave a fâ ancje alc di biel. Cun di plui la glesie e je opare di Gaudí.

Ossiachersee glaçât

Karakia

In Gnove Zelande e je une invocazion ai dius de tiere par cusinâ, in Catalogne e je une trasmission televisive (che si pues viodi ancje in linie), dulà che si fâs cognossi i imigrâts e la lôr cusine. Di imigrât, a 'nd è cualchidun ancje furlan.