Che nissun disponi di nô sensa di nô



A cjaval de fin dal Votcent e dai prins 15 agns dal Nûfcent, il Friûl al jere tiere puare: tal Friûl “regnicul” la sole alternative ae miserie e jere la emigrazion. La Italie unide e jere plene di debits e cence prospetivis di progrès economic e sociâl. Ancje dal Friûl “imperiâl” e jere emigrazion, ma lis viertiduris dal Imperi a ciertis riformis a lassavin sperâ tun avignî miôr: il cooperativisim, massime di fonde catoliche, si slargjave jenfri slovens e furlans, che a mantignivin ognidun la lôr identitât e une buine colaborazion.

Lis figuris di riferiment dai furlans a jerin i deputâts Luigi Faidutti e Giuseppe Bugatto che a baterin une vore pal ricognossiment uficiâl dal popul furlan tal Imperi Asburgjic.

Sul finî de vuere, cul pericul di anession violente dal Friûl austriac al Ream di Italie, Faidutti e Bugatto a rivendicarin il dirit di autodeterminazion dal popul furlan. La sieradure dal discors di Bugatto tal parlament di Viene dai 25 di Otubar dal 1918 e je stade pronunziade tal furlan di Dael: “Se ducj nus bandonin, nus judarìn di bessôi, Dio che fedi il rest, no uarìn che nissun disponi di nô sensa di nô!”.

Pôc dopo il Ream di Italie al vinceve la vuere: il Friûl al jere unît sot di un stes stât, ma distrut de vuere, cuntune economie in zenoglon, nissune indenizazion e ricostruzion; a rivavin aventurîrs e criminâi di dute Italie par profitâ di une “tiere di concuiste” e par perseguitâ slovens e furlans austriacants.

Par reazion a cheste ocupazion, si slargjave in Friûl il socialisim e po il comunisim, cu la aspirazion ae costituzion di une Republiche Furlane indipendente.

Il Fassisim talian al scancelavave lis pussibilitâts di inverâ chest progjet: Faidutti e Bugatto no àn mai plui podût tornâ a Gurize, menaçâts di muart dai fassiscj; Zuan Minut, pont di riferiment dal socialisim e comunisim furlan, al leve in esili in Uruguay.

Cun dut achest, la volontât di autonomie e autodeterminazion dai furlans e je restade une vore vive, e e je ancje vuê.