Ce eroi!

Al è za passât un an!

El Congost de Mont Rebei

Propit sul confin jenfri Catalogne e Aragon il flum Noguera al à di cjatâ la sô strade taiant pal mieç lis monts e formant une strete pardabon spetacolâr. Tes fotos la impression di grandece e je une vore plui smamide, ma par fâsi une idee des dimensions si à di cjalâ la cuinte foto dulà che e je une altre escursioniste piçule piçule.

VIVE LA REPUBLICHE TALIANE!

Cemût che si lei ancje tal blog dal Comitât 482 la Cort costituzionâl taliane e à taiât 5 dai 6 ponts che il guvier di Romano Prodi al veve impugnât te gnove leç regjonâl pe lenghe furlane. Lis reazions in pro de lenghe furlane, o speri, a saran coordenadis, jo chi mi permet une piçule riflession. Par gno cont a jerin 2 ponts une vore impuartants te leç e cumò a son stâts refudâts in maniere uficiâl: il fat che tes scuelis dal oblic l'insegnament dal furlan al fos garantît almancul par une ore par setemane e il fat che il furlan a scuele, invezit di jessi fat daûr de domande ative dai gjenitôrs, al fos fat in maniere normâl, lassant ai gjenitôrs che no volessin che i lôr fîs a imparassin il furlan (puaris creaturis!) la sielte di refudâlu.
Cumò i organisims de nestre gloriose republiche nus disin che chescj contignûts a son anticostituzionâi, autoritâts regjonâls a disin che e je vere, che la "sentence e à eliminât i ecès de leç regjonâl".
Al è clâr: une ore miserabile di furlan par setemane e un tratament di dignitât de lenghe di un popul che al somee chel de ore di religjon a son un ecès, mancul mâl che lu àn eliminât.
A chest pont si à di jessi une vore contents di vivi intune democrazie cussì madure: dopo che sot dal Ream di Italie e sot dal Fassisim la lenghe furlane e je stade escludude e discriminade, condanade a muart, finalmentri la costituzion taliane democratiche e republicane e dîs che lis minorancis linguistichis a son un valôr. Ma une Republiche e à tantis robis impuartantis di fâ, par tutelâ lis lenghis diferentis dal talian cuntune leç, dopo di une espression di principi che tant no mene di nissune bande, si pues spietâ benon 50 agns. E cuant che si rive ae leç 482/99 si le fâs in maniere che no meti nissun oblic, che no previodi nissune azion ordenade e concrete. Cun di plui, cul passâ dai agns, i finanziaments si ridusin tant che la tutele des minorancis linguistichis e je come se pardabon no fos. Infin, tal moment che la regjon Friûl - VJ e cîr di meti un fregul di ordin (cence nancje jessi masse indevant cu lis ideis), e di fissâ nivei minims, alore ben, chescj a son ecès, si à di eliminâju.
Se si va indevant a eliminâ ecès, cemût che si fâs ben e no mâl, l'unic come che al varà valôr te leç 482/99 al sarà il come 1 dal articul 1, che al dîs:

"La lingua ufficiale della Repubblica è l'italiano."

Il libri "Cors di grafie furlane"

La Serling e publiche un gnûf libri: il titul al è "Cors di grafie furlane".
Un novante pagjinis di leturis, regulis, esercizis, soluzions e ancje il CD audio cu la regjistrazion dai detâts se un al à di fâju di bessôl.
Une robe biele dal libri e je che al ven fûr di une colaborazion une vore plurâl: dentri a son i contribûts, pai tescj di esemplificazion o par chei che a coventin di esercizi, di 18 autôrs che a scrivin ognidun cul so stîl e di argoments diviers; prime de publicazion 5 insegnants diferents a àn provât e miorât il percors didatic par trê agns intune vore di cors.
Altri detai dal libri al è che, daûr de linie solite de Serling, al è publicât cence domandâ contribûts publics.
Par cui che al vûl la presentazion e je sabide ai 16 di Mai, aes 18.00 li de librarie Friuli, a Udin.

Paella vegjetâl di rîs neri

Ben, al jere un pôc di timp che no si fevelave di robis di mangjâ, alore us propon une ricete che e je une mê rielaborazion personâl de paella (che tant no à une sole version origjinâl, ma tantis tradizions personâls che a son consideradis sacris dai lôr estimadôrs, che, nancje a dîlu, a dispresein chês altris versions come empietâts).
Prin di dut al covente vê une padiele di "paella" (definizion pleonastiche che e vûl dî une padiele di fier une vore fin): par cusinâ cun cheste padiele si à di doprâ o lis boris bielis slargjadis, o un difusôr, di maniere che la flame no sedi masse alte e e sedi une vore ben distribuide. A son imprescj che si cjatin in cualsisei feramente o buteghe di cusine de penisule iberiche, ma tal rest dal mont no sai.

Ingredients par 6 di lôr.
600 grams di rîs neri (al è une cualitât di rîs particolâr, cul gran scûr, che cuant che si cuei al fâs la aghe nere), ve ca la foto

1 pevaron
1 melanzane avonde piçule
1 coçut
1 cevole
1 puar
2 mans di cesarons
1 man di fave
12 sparcs verts
2 spîs di ai
Vueli di ulive extravergjin

Preparazion:
Si met la padiele sul fûc e si met a scjaldâ il vueli par dislidi la cevole e cualchi toc di pevaron e l'ai a tocuts.
Si bute ancje il rîs e si lu lasse a dislidi ancje chel cualchi minût.
Si bute parsore aghe bulinte, di maniere che a 'nd vedi avonde (la misure tipiche e je di doi volums di aghe par un di rîs, ma par dî la veretât o voi un pôc a voli) e che si cuei a planchin, cun fûc medi: il rîs neri al sta di plui a fâsi di chel normâl, disìn uns 35 minûts (ma al è miôr cerçâ ogni tant par jessi sigûrs), pai puriscj de paella il rîs no si à di tocjâlu plui, ma une mieze messedade ogni tant i fâs ben, massime a chel ca che cemût che o vin dite che al è plui durut.
Intant o vin il timp di fâ lis verduris: fatis in fersorie o su la lastre a cjapin un alc di brusinât che in Catalogne al è essenziâl.
Si pues fâ il coçut taiât fin par lunc, la melanzane a fetis tarondis e cussì ancje il pevaron taiât di maniere che a restin cerclis intîrs, il puar taiât grues un dêt, cemût che si viôt te foto sot e v.i..
A man a man che la ortaie e je pronte si sale e si le met in bande. Ocjo cul sâl, di stâ misurâts, par vie che il rîs neri, almancul chel che o dopri jo, al cjape subite di salât.
Tai ultins cinc minûts che si fâs il rîs si zonte i cesarons e lis favis, che si puedin messedâ insiemi, e si met parsore il rest, di mût che al pari bon.
I ultins minûts che si cuei la "paella" si pues taponâle cuntun sfuei di gjornâl.
Par servîle si le puarte in taule te padiele, a mi mi è vignude cussì:

Par une cumbinazion cuntun bon vin o spieti une propueste de Sommelier furlane.

Un altri zirut pal Empordà

Un altri zirut pal Empordà, tal Nordest de Catalogne, che si conferme une des zonis che mi plasin di plui: i scois e lis splazutis sul mâr (che o vevi za metût fotos altris voltis e cheste volte no torni a metiju); i paisuts cu lis cjasis di piere, la campagne verde e tancj monuments storics, fintremai preistorics, cemût che si viôt tes ultimis dôs fotos che a son di une tombe megalitiche di un 4.000 agns indaûr.

Mandi Cadorna

In chei dîs ca a Udin si fevele di gjavâi al gjenerâl Cadorna il titul di une place di Udin (che par altri la plui part de int no sa nancje là che e je). Cualchidun fintremai al difint il puar gjenerâl, altris a disin che invezit che a lui si varès di titulâle ai muarts in vuere.
A mi no mi displasarès une biele place "Decimâts", o "Vitimis dal nazionalisim talian" o "Disertôrs di dutis lis vueris", ancje se i fasarès vignî i sgrisui a plui di cualchidun.
A mi mi fasin vignî plui sgrisui i monuments ai "Caduti" in ogni paîs dal Friûl, la retoriche viliache e criminâl che dopo di vê mandât a murî e a copâ te piês maniere milions di personis ju fâs deventâ erois par preparâ la prossime butade di martars pronts a sbudielâ e a fâsi sbudielâ par cuatri parons che ur mangjin parsore.
Un puest di visitâ par pensâ e par fâsi vignî frêt te schene al è il "Cimitiero degli Eroi" daûr de basiliche di Aquilee.

Di murî di ridi!!!

Joibe passade di sere o sin stâts a teatri a viodi Garrik, l'ultin spetacul dal famôs tercet di comics catalans Tricicle: se cualchidun al passe par Barcelone o intune citât là che a laran, no si pues pierdilu (e nol è nissun probleme di lenghe, la lôr comicitât e je mimiche e internazionâl). Il biliet al è un tic cjâr ma al vâl la pene! Di murî di ridi, ancje di chei timps che a son cumò.

27 di Fevrârt: Zornade Furlane dai Dirits

Simpri cun pôc timp e corint ator, ma o ai podût scoltâ almancul un pocje de programazion une vore interessante di Radio Onde Furlane pe Zornade Furlane dai Dirits: cjapant la ocasion di une des plui grandis rivoltis popolârs de storie europeane, la joibe grasse dal 1511, si à fevelât dai dirits in Friûl: no dome dirits identitaris e linguistics, ma ancje dirits pes feminis, dirit ae cjase e v.i.
E je une ativitât che Onde Furlane e puarte indevant simpri, ma in cheste zornade lu à fat in maniere specifiche: alore al tocje cjapâ la ocasion di dî graciis par dut chest lavôr, plui di dut a Carli Pup, puartevôs dal Comitât 482.

Cuatri pas a Gjirone

Al è un pôc di timp che o lavori un pôc masse e no viôt puescj gnûfs, alore un blog fotografic come chest al patìs avonde di staticitât, ma almancul vinars passât o soi stât a Gjirone, une citât pardabon biele: tancj a san che e je dome pal aeropuart dai svoi ryanair e po a van jù drets a Bercelone, ma e mertarès une visite no mancul de capitâl e ancje la provincie e je une vore biele.