Fedriga e il Tiliment: domandis e rispuestis

Domande 1 - Parcè la maiorance dal Consei Regjonâl dal Friûl - VJ aie votât cuintri de candidature dal Tiliment tant che patrimoni Unesco?

Parcè che ur al à dite Fedriga

Domande 2 - Parcè assessôrs come chei pal ambient (Soccimarro) o pal turisim (Bini) varessino di jessi cuintri de valorizazion internazionâl dal Tiliment?

Parcè che ur al à dite Fedriga

Domande 3 - Parcè une maiorance di consei regjonâl varessie di votâ cuintri dal sintiment di amôr de stragrande maiorance dai citadins de Regjon pal Tiliment?

Parcè che conseîrs e assessôrs a san benon che no dipendin plui dal vôt dai furlans, a dipendin dome di Fedriga.  

Domande 4 - Parcè Fedriga isal cuintri de candidature dal Tiliment tant che patrimoni Unesco?

Parcè che dal Friûl, dai Furlans, dal ambient, dal Tiliment no i free nuie: i free dome di fâ contents i siei amîs adalt. Amîs che no àn nissune vision politiche e nissun program economic: dome chel di metisi bêçs publics tes sachetis cuntune des plui grandis mangjadoriis che a son simpri stadis in Italie: ciment, ciment e ciment.

E se il Tiliment al devente patrimoni Unesco, a deventin plui dificii i crimins ambientâi, fats magari ancje rispietant lis leçs fatis propit pai amiuts.

Domande 5 - Cualchi altre reson?

A acetâ une propueste inteligjente fate de oposizion, la maiorance e à pôre di dâi reson e di fâ brute figure, parcè che di buinis iniziativis, la maiorance, no 'nd à nancje une tal cjâf.

Domande 6 - Ce fâ?

La zonte Fedriga e je il tierç disastri.

Zonte Tondo - program politic: lassaitmi durmî, cuant che mi svei anìn a bevi un tai, però paiait voaltris, che ducj i bêçs de regjon, che par altri in ogni câs a son vuestris, ju ai regalâts a Tremonti...

Zonte Serracchiani - program politic: o ai di jessi plui renziane di Renzi, cussì a fuarce di rugnâ e vuacâ in "effevuggì" e di sbassâ orelis e menâ la code a Rome, mi rive une biele poltrone... Ah, e ancje jo i regali i vuestris bêçs al guvier!

Zonte Fedriga - program politic: anìn daûr dal ministri Salvini!! (pss, Salvini si è dimetût cirint di fâ il babio e le à cjapade tal comedon... nol è plui ministri) Ostie! e cumò ce fasìno? Ah, mmm, ehh, boh. No sai l'impuartant al è ubidî, a Salvini o a cualsisei, no soi migo bon di fâ altri, e voaltris muci che se no us mandi a cjase: no mi plâs la int che e pense e ancjemò mancul chê che e fevele!

Nol baste che la Regjon e sedi Autonome, al covente che e sedi guviernade di autonomiscj!

Sostignìn il Pat pe Autonomie!

Pal ben dal Friûl, pal ben dai Furlans.

Il Friûl politic

Ve ca, infin, une mape dal Friûl.

Cualchidun i disarès “Friûl storic”, ma cheste definizion e à doi difiets: un al è che se si fevele di storie e somee une robe passade e sierade, chel altri al è che il Friûl, come la plui part des regjons e nazions de Europe, dilunc dai secui al à cambiât un tic forme e dimension, duncje di mapis a 'nd coventaressin tantis, pes diviersis etis storichis.

Alore chest al è il Friûl politic: politic par vie che al è il teritori di riferiment di chei che al Friûl i tegnin, che a vuelin che al cressi, che al deventi libar di fâ lis sieltis pal so avignî, e chest si à di fâlu, par fuarce, ancje cu la politiche.

Par cualchidun “politic” e “aministratîf” (soredut se si fevele di une mape) a son la stesse robe, ma pai grups di podê di scjale taliane il Friûl aministratîf nol à di esisti: al è il FVG, une sigle che no vûl dî nuie e che e fâs ducj plui puars di identitât; la capitâl aministrative de regjon, fate par passe 97% di teritori furlan, al è Triest; te comunicazion regjonâl e taliane si cîr in dutis lis manieris di no doprâ nancje la peraule Friûl, si inventin nons che no àn nissun sens e nissune realtât storiche (tant che Venezia Giulia, Isontino, Destra Tagliamento) par scancelâ Friûl orientâl e Friûl ocidentâl, par scancelâ il Friûl in gjenerâl; la volontât democratiche dai Comuns dal Mandament di Puart che a àn votât par tornâ cul rest dal Friûl e je scjafoiade de prepotence di Vignesie e di Rome...

Alore bon: un Friûl aministratîf no lu vin, ma il dovê di jessi responsabii pe nestre Patrie e di cirî di fâ il so ben, chel sì che lu vin, e cussì o vin un Friûl politic.

Ca si pues viodi dulà che al scomence e dulà che al finìs (e se mai cualchidun al varà la voie di gjavâsi, almancul al savarà di ce gjavâsi).

NOTE: cheste mape e je a disposizion in vetoriâl e si pues doprâle e cambiâle, zontâ nons e fenomens che si puedin mostrâ, di maniere di fâ viodi aspiets fisics, antropics o cualsisei robe interessante pe didatiche, pe comunicazion, par ce che si vûl. Fasêtle zirâ e dopraitle!