Blog di Sandri: Camino de Santiago

Rivant a León, sedi tal teritori che dopo te capitâl, si viodin segnâi continuâts di un autonomisim anticastilian: di fat la Castilie, che te Ete di Mieç e jere nassude come frontiere e perifarie di León, cumò invezit e je dominante.
La citât di Leon e à un domo une vore biel, cun cualchi leam di parintât cun chel di Burgos, cemût che a dimostrin ciertis struturis e soredut lis sculturis dal portâl in bande (la foto ca sot invezit e je dal portâl principâl, cuntune sene di Paradîs e Infier pardabon spetacolâr).

The road goes ever on

La strade e va indevant simpri indevant

Vie de puarte di dontri che e nas

Cumò la strade e je lade lontan

E jo o scuen stâi daûr se mai je fâs

Par corii daûr cun pîts imburîts

Fin che si zonte une plui largje vie

Che tancj trois e cjaveçs si son unîts.

E dopo dulà? Jo no sai a dî.

La strade e va devant simpri indevant

Difûr de puarte di dontri che e nas

Cumò la strade e je lade lontan,

Che i stedi daûr cui che je fâs!

Che al tachi un viaç par lui di gnove dade,

Invezit jo cui pîts ben stracs infin

O larai te locande iluminade

A cjatâ il gno sium e il gno padin.

Fat il cjanton o podarès cjatâ

Une strade gnove o un soiâr platât

E ben che dispès o soi lât inaltrò,

Une dì e rivarà infin cuant che jo

O cjaparai il troi ascôs che al meni

A mont de Lune, a jevât dal Soreli.

J.R.R. Tolkien

Ιθάκη

Co tu partissis par rivâ fin a Itache

tu âs di preâ che e sei lungje la strade

plene di aventure e di cognossince.

Dai Lestrigons e nancje dai Ciclops

e Poseidon rabiât no stâ a vê pôre

su la tô strade no tu ju varâs

se alt il to pinsîr e se volude

une emozion il spirt e il cuarp ti tocje.

Che tu i Lestrigons e nancje i Ciclops

e il trist Poseidon no tu cjatarâs

se no tu tai puartis dentri ta la anime,

se la tô anime no tai met devant.

Tu âs di preâ che e sei lungje la strade.

Che a sein tantis lis matinis di Istât

che cun ce plasê e cun cetant agrât

tu jentris in puarts che no tu savevis,

che tu ti fermis tai marcjâts Fenicis

e tu ur compris lis bielis marcjanziis,

mariperle e corais e ambris e eban,

e profums deliziôs di ogni sorte,

profums deliziôs tancj che tu vuelis,

che in tantis citâts egjiziis tu rivis,

par imparâ e imparâ di chei che a san.

Ten simpri dentri il pinsîr di Itache

chel di rivâi al è il to destin

Ma no stâ a sfuarçâ che il viaç al sei svelt.

Al è ben miôr che al duri cetant timp,

e vieli za tu rivis te tô isule,

siôr di dut ce che tu âs cuistât par strade,

cence spietâ che aur ti dedi Itache.

Itache bielzà ti à dât il biel viaç

Cence, no tu ti metevis par strade.

No à nuie altri che ti puedi dâ.

Se ti pâr misare, ingjanât no ti à, Itache,

Savi che tu sês vignût, cun tante vite,

tu varâs ben capît ce che a vuelin dî lis Itachis.

Kostantinos Kavafis

Blog di Sandri

Camino de Santiago - León

Cui che o soi

Ce che o fâs

Jude: traduzion automatiche in linie

Ce che o scrîf

Ce che o scrîf

Libris publicâts

Ator par cualchi blog

Poesiis par viazâ

The road goes ever on

E se a un paîs

Ιθάκη

Archivi