Blog di Sandri

A Triest

2008-05-14T15:06:00.000-07:00

A Triest, joibe ai 15 di Mai, a 18.30 li dal KNULP, par presentâ "Venezia Giulia La Regione Inventata": un libri une vore impuartant, curât di Roberta Michieli e Giuliano Zelco e publicât de KappaVu, che o soi une vore content di meti une piçule part ancje jo.
Par altri la presentazion a Triest e je une des pocjis ocasions par par sintîmi a fevelâ par talian in public (ma almancul lis primis peraulis, magari mâl, ma lis disarai par sloven!)

Un zîr in bici pal Empordà

2008-05-10T13:04:00.000-07:00

Doi dîs in bici ator pal Empordà, la zone de Catalogne dongje dal mâr, a Nord, in provincie di Gjirone.
La part plui cognossude e je propit la rive, la Costa Brava, che e je maraveose, ancje se di tantis bandis sassinade des struturis turistichis, ma ancje indentri il paisaç al è une vore biel e cuiet.
In 120 chilometris o vin cjatât cjamps, paisuts medievâi, une risierve naturalistiche ornitologjiche di palût, rivis bassis di savalon e altis di scois, isulis e, cundut che no le ai chi tes fotos, ancje il sît archeologjic di Empúries, l'antîc Emporion, prime colonie greghe e po dopo citadute romane, e ancjemò culinis, monts e cjistiei.

Sant Zorç in Catalogne

2008-05-07T13:55:00.000-07:00

Mi scusi pal ritart ma o ai vût cualchi probleme di fîi. Alore o met un post vecjut, pai 23 di Avrîl, sant Zorç (Jordi), patron di Catalogne. E je fieste grande, massime a Barcelone e a son pardut bancuts di dôs robis: garofui e libris.
I garofui a son par vie che la liende e dîs che dal sanc dal drâc copât di sant Zorç par liberâ la principesse e jere nassude cheste rose, e alore e je la dî di regalâle ae morose. Di bande lôr lis fantatis ur regalin al morôs un libri, par vie che al è l'aniversari di Cervantes: la robe interessante e je che Cervantes nol jere catalan, ma di ce che o sai i libris, la dì di sant Zorç e di Cervantes, si regalin dome in Catalogne e no in Castilie o tal rest de Spagne.

Comitât 482 in linie

2008-04-08T10:57:00.000-07:00

Grant lavôr dal Comitât 482 che si met in linie cun pagjine web e blog.
Tantis notiziis e informazions, e ancje une biele rassegne di declarazions di rapresentants antifurlans di prime rie, tant par lâ indevant su ce che o scrivevi cul decalic.
Graciis di cûr a ducj chei che i àn lavorât, in particolâr Carli, Matieu e Christian.

Il decalic dal Antifurlan: ponts 7, 8, 9, 10

2008-04-02T14:57:00.000-07:00

Argoment 7.

A vuelin meti il furlan obligatori a scuele, nol è just!

Altre bausie vignude fûr te discussion su la leç regjonâl 29/2007: scusait il cualuncuisim, ma al è biel jessi citadins e paiâ no sai trops mil euros al mês conseîrs regjonâi che a fasin fente di jessi stupits pûr di no puartâ indevant une discussion in maniere serie (e il probleme nol è dome su la lenghe furlane, che al è stât un argoment legjislatîf tragjic: us consei di cjalâ lis riunions dal Consei regjonâl FVG par rindisi cont dal nestri nivel di civiltât politiche e democratiche).

Te leç no je mai stade al propueste di obligatorietât: al è passât invezit l’assintiment cidin (silenzio assenso). In pratiche: a scuele, se i gjenitôrs no disin nuie, fâ furlan al sarà normâl, se invezit i gjenitôrs a vuelin che il fi nol fasi furlan a àn dome di meti une crôs suntun modul prestampât. Ma i antifurlans a àn tirât sù polemichis cuintri di cheste “obligatorietât”.

Par altri se al è de scuele che che si à tacât a fâ sparî il furlan des fameis (viôt Argoment 4) la scuele e je un dai puescj li che si à di comedâ la storie: e no je cuistion di ribaltâ la storie e fâ ce che a àn fat i talianons, ma cheste volte al contrari, al baste contâ la veretât e insegnâ che cualsisei lenghe e je un valôr e che il furlan al è preziôs.

Argoment 8.

In realtât no je une domande sociâl di lenghe furlane, e je une imposizion di cuatri talibans esaltâts.

Cualchi volte a son i “furlaniscj” stes che a àn cheste impression: al è ancje par cheste frustrazion che a àn di sbrocâsi e dispès si barufin tra di lôr.

Ma e je dome une impression che e derive de impermeabilitât dal sisteme di podê mediatic antifurlan: no je in Friûl avonde pussibilitât di autorapresentazion che, te comunicazion di masse, e passe prin di dut pe television, pe radio, pai gjornâi. Par fortune a son realtâts come Radio Onde Furlane, la Patrie dal Friûl, il Diari e alc altri, ma tes cjasis dai furlans e ancje dai furlaniscj a jentrin ogni dì ducj chei altris mieçs di comunicazion che a dan la idee che cui che al è pal furlan, o miôr cui che al è furlan, al è bessôl, invisibil, pe societât nol esist: cheste situazion antidemocratiche e à responsabii clârs RAI, Messaggero Veneto, Gazzettino, televisions e radios “comerciâls” (che si refudin di capî che il furlan al è ancje un fatôr economic e comerciâl par vie che in efiets no vivin di cumierç, ma di sovenzions politichis).

Ma i furlans a esistin: o sin intune democrazie, une vore imperfete cemût che o vin viodût, ma democrazie. Cemût si saressial rivât a vê une leç regjonâl pal furlan tal 1996, une altre statâl su lis lenghis minoritariis tal 1999, une altre regjonâl a pene fate tal 2007 se no fos une vere domande sociâl? Il fat al è che la domande sociâl e je, e ancje fuarte, cundut che il bloc di comunicazion di sisteme al cîr di no fâle sintî.

Argoment 9.

I problemis dal Friûl a son altris...

Sigûr che a ‘nd è ancje di altris: transizion economiche a un gnûf sisteme, integrazion in Europe, difusion de gnove tecnologjie, energjie, ambient, emigrazion dai cerviei, demografie, indebitament dai citadins e des fameis, integrazion de imigrazion, distribuzion de ricjece (prospetive di une vore pôcs siôrs che a àn dut e di ducj chei altris puars che no àn nuie). Dome par fâ cualchi esempli disordenât.

Brâf il gno politic antifurlan: se tu sês elet tu sês paiât propit par frontâ chei problemis, ma frontâ i problemis in Italie nol va di mode, alore miôr sconfondi la int, contâ bufulis e gjavâ elements di coesion sociâl come che e pues jessi la lenghe. Miôr no permeti che la int e sedi popul, cuntune identitât fuarte e une cressite di civiltât. E cheste identitât, cheste civiltât, in Friûl, si fondin su la esistence de lenghe furlane.

Se la robe no fos impuartante e chest al fos dome l’ultin dai problemis dal Friûl, parcè la gnove leç 29/2007 su la lenghe furlane, par declarazion unanime di dut il consei regjonâl e di dute la zonte regjonâl, e je stade la plui tormentade di dute la legjislature?

Argoment 10.

In ogni câs o soi favorevul ae lenghe furlane

Eh sì po, o ai viodût.

FIN

Il decalic dal Antifurlan: ponts 4, 5 e 6.

2008-04-02T12:36:00.000-07:00

Argoment 4.

Il furlan si à di fevelâlu in famee e no tignîlu sù cu lis leçs.

Il fat che une lenghe par lâ indevant e vedi di jessi fevelade in famee al è vêr: il fat che al basti e che no coventin lis leçs nol sta ni in cîl ni in tiere.

Domande: parcè lis fameis furlanis, là che fin te prime metât dal Nûfcent si fevelave dome par furlan a àn lassât (par fortune dome in part) di fâlu? Rispueste: planificazion cussiente de politiche taliane di slargjâ il talian (e chest nol sarès un probleme) e di scancelâ chês altris lenghis o dialets (e cheste rispiet ae prime robe e je distinte e une vore negative). Si veve tacât cu la scuele, li che i insegnants (in buine fede… come tancj naziscj) a predicjavin ancje cun violence la bausie che se i gjenitôrs a fevelavin par furlan ai fruts, chei no varessin imparât ben i talian e a saressin restâts mus; si è lâts indevant cun azions continuis de stampe pe disfurlanizazion sistematiche (cemût mai il gjornâl stampât in Friûl e pai furlans dopo de seconde vuere mondiâl si clame “Messaggero Veneto”?); si è finît jentrant in ogni cjase cu la television, che prime e à puartât un model di italianitât finete e culte e po dopo un comerciâl e moderni. In dut chest complès il furlan al è stât taiât fûr di pueste e cumò i antifurlans nus contin che se no si fevele plui il furlan e je colpe des fameis! (Pardabon une logjiche naziste: prime tu torturis e tu copis l’ebreu e po dopo tu disis ancje che e je colpe sô, par vie che al è ebreu).

A chest pont puedino lis leçs bessolis salvâ il furlan? No, ma no si pues fâ di mancul di lôr: dome il fat che a sedin al da une dimostrazion publiche che si ricognòs al popul la sô identitât e i siei dirits, si libere finalmentri la sô fuarce vitâl e creative. No soi tant vecjo, ma o ai a clâr trop che al è cambiât il status dal furlan tai ultins 15 agns, in miôr e in graciis ancje de leç 15/96 e de 482/99. Po dopo, fatis lis leçs, e je une cuistion di impegn di dute la societât, ma intant vê il furlan tes scritis publichis, tai puescj associâts a valôrs impuartants o dominants (e je une robe brute, ma il cjâf de int al funzione cussì) al è fondamentâl.

Argoment 5.

Il furlan si à di tignîlu vîf cu la poesie e no cu lis leçs e ancjemò di mancul imponint une grafie: e je une vergogne che a tancj poetis no son stâts dâts finanziament par vie che no scrivevin te grafie uficiâl/te coinè

Par fuarce: poesiis no leçs! E je la evoluzions di “il friulano è un dialettaccio da stalla e da osteria” a “il friulano è una lingua così bella che si deve usare solo per la poesia”. Cjalait che pardabon lis firmis sot afermazions dal gjenar de prime e dal gjenar de seconde a son chês istessis, dome che al è passât cualchi an, ma la linie e il risultât che a vuelin al è compagn: trasformâ il furlan intune lenghe muarte. Dome che prime le volevin muarte tal ledan: no son rivâts e cumò le vuelin muarte te mufe.

Sul fat che si è dineât bêçs ai poetis no je une fantasie umoristiche che mi inventi cumò: si è sintût conseîrs regjonâi a dî cussì tal plen de lôr funzion aministrative, te discussion de ultime leç (lait a scoltâ lis regjistrazions): un ancje al à dite che lis leçs di prime (la LR 15/96) a vevin dineât finanziaments al poete Domenico Menis (sic! e sig!), che al jere fintremai stât candidât al Nobel: une vergogne dal OLF e dai “furlaniscj”!

Prin di dut i antifurlans, se a citin leterâts furlans, che a studiin un tic di plui, il poete al sarès Domenico Zannier (magari cuntune altre contradizion si podarès scusâju pal fat che ancjemò a scuele nol è l’insegnament dal furlan!); po dopo, someial pussibil che un poete par publicâ lis sôs poesiis al domandi un finanziament e che si dedi a lui in persone i bêçs? I politics antifurlans a vuelin fânus bevi ancje cheste mostrosetât: Montale o Quasimodo, tant par citâ un pâr di Nobel talians, àno fat domande di finanziament pes lôr poesiis a Rome in cualchi ministeri e chest ur aial dât i bêçs in man?

Ma tant ae leç 15/96 si pues dâi cualsisei colpe. Par altri la confusion tra grafie e coinè e je totâl: la grafie e je la maniere di doprâ i simbui grafics, lis letaris; la coinè e je la varietât furlane standard che e pues jessi scrite ancje in altris grafiis: par esempli il vocabolari di Faggin al à dentri dome la coinè, ma intune grafie diferente di chê uficiâl. Par altri cu la grafie uficiâl si pues ancje scrivi in varietâts diferentis (dimostrazion: la cjase, par coinè, la cjasa, te varietât di… Tumieç)

In ogni câs la leç 15/96 e previodeve di finanziâ (e si fevele simpri scuelis, ents, associazions, editôrs, mai personis) cu la cundizion che, se si tratave di materiâl didatic, si dopràs la grafie uficiâl, invezit la coinè no je mai stade une cundizion par nuie: al è plen di scuelis che a àn vût i bêçs regjonâi par fâ lavôrs te lôr variante, cjargnele, de Basse, de Contee o di là da la Aghe o di là che al fos. A documentâsi si pues lei lis racomandazions dal Olf (acusât di autoritarisim cuintri dai creatîfs e di crimins cuintri des varietâts) che lis zonis periferichis a vevin di vê la prioritât!

Par altri ancje su la coretece di doprâ la grafie uficiâl e je simpri stade manie largje e nol è nissun câs di un finanziament che al sedi stât dineât par vie che un test intune varietât furlane locâl o te coinè a fossin masse erôrs.

Argoment 6.

La grafie uficiâl/coinè e cope lis varietâts.

E torne la confusion grafie/coinè (viôt Argoment 5): in ogni câs no je vere nissune des dôs robis.

Une maniere di scrivi e un model di lenghe scrite, insegnât come che Diu comende e no imponût come il talian, che Diu nus vuardi, e da plui fuarce a dut un sisteme linguistic, e in realtât i darès plui fuarce ancje ae competence de lenghe taliane e di chês altris lenghis in Friûl.

Ma lis varietâts a son daûr a pierdi lis lôr carateristichis distintivis e a son feveladis simpri di mancul, duncje la int e je preocupade i displâs: ce fasial l’antifurlan? Al dîs che e je colpe de graficoinè (a chest pont mi permet ancje un neologjisim). Par fuarce: la grafie e la coinè no son insegnadis tes scuelis, a son un element dome scrit e la plui part dai furlans a lein dome par talian, ma e je colpe de grafie e de coinè se lis varietâts a son daûr a sparî.

E je dome une robe che no mi torne: o sai di une vore di fameis li che in pocjis gjenerazions no si fevele plui la variante locâl di furlan, si è pierdude, alore e à di jessi colpe la graficoinè, ma, no sai cemût che al è pussibil, cumò in chês fameis no si scrîf te grafie furlane uficiâl e no si fevele te coinè: a scrivin e a fevelin dome par talian. O spieti che cualchi sociolinguist o academic antifurlan mi sclarissi chest misteri.

(Cun chest no vuei saborâ nissune oposizion tra talian e furlan come lenghis: dutis dôs a son bielis e a puedin stâ insiemi in pâs come che al sucêt tal gno cjâf e in chel di tancj furlans, dongje ancje cun altris. La oposizion no je mai tra lenghis, e je tra modei politics).

... (al va ancjemò indevant)

Campagne eletorâl: l'Antifurlan

2008-04-02T07:45:00.000-07:00

O fermi par un moment di meti fotos di Colonia Caroya, a son robis che a tornin a puartâmi in Friûl.

In “Friuli Venezia Giulia” a son elezions, a viodi e a sintî ciertis robis mi ven gust ancje a mi di fâ campagne eletorâl.

Lu fâs te mê maniere, analizant, cemût che o vevi anticipât timp indaûr, lis posizions dai antifurlans: cun di plui lu pues fâ cence pôre di rompi la par condicio, che tant di antifurlans a ‘nd è di dutis lis bandis.

Naturalmentri nissun no si lasse definî antifurlan: a dî a clâr che si è cuintri dal Friûl e cuintri de lenghe furlane in Friûl al è sigûr che si pierdin lis elezions. Parcè? Par vie che i furlans a son ancjemò un popul e il furlan al è une lenghe.

Alore i candidâts a son ducj pal Friûl e pal furlan e i antifurlans si platin e a doprin argoments plui fins dal vecjo “il friulano è un dialettaccio da stalla e da osteria”. A son argoments che o vin sintût te discussion de leç sul furlan e che si tornin a sintî cumò in campagne eletorâl.

E alore velu ca il Decalic dal Antifurlan (in chest post dome i prins 3 ponts).

Argoment 1.

L’antifurlan al è a pro de lenghe furlane (clâr, se di no al piert lis elezions), ma al è cuintri di une leç sul furlan.

Al è compagn di un ambientalist che al è a pro dal ambient, ma cuintri des leçs di tutele dal ambient. Informazion: o sin intune societât organizade cun struturis politichis che a controlin o a indrecin i fenomens sociâi impuartants, e la lenghe e je un fenomen sociâl impuartant. Jessi cuintri di une regolamentazion al vûl dî jessi a pro de situazion cemût che e je, li che e je une schirie di leçs e di proviodiments in pro di une varietât privilegjade, sielzude come talian uficiâl, e cuintri di dutis chês altris varietâts che a àn di sparî. Duncje se si è cuintri di une leç sul furlan si è a pro che al sparissi.

Argoment 2.

Lis leçs sul furlan a compuartin une grande cuantitât di bêçs che a van in nuie e che a podaressin lâ in ospedâi, scuelis e v.i.

La spese medie tai prins agns e je di plui o mancul 2 milions di Euros ad an: in Gales a spindin 20 milions ad an, cence nancje contâ lis spesis de scuele che a van par un altri cont. Il numar di chei che a fevelin par galês e par furlan al è plui o mancul compagn.

E je vere che a son bêçs che a podaressin lâ in ospedâi, ma ancje chei dai armaments o de culture par talian a podaressin lâ in ospedâi. Il discors al è che 2 milions di euros o ancje 20 pal belanç di une regjon a son un nuie e che invistîju ben, cun controi seris sui risultâts, te lenghe furlane al volarès dî invistîju te cressite civîl di un popul (ma a un politic antifurlan un popul civîl e cussient no i va ben, parcè che sigûr che no lu vote!)

Argoment 3.

Di cuant che a son lis leçs sul furlan e je dute une bulidure di produzions e e a son nassudis associazions che a vivin su la lenghe furlane, pal plui cun clientelis e mafiis.

Vive la ignorance e la imprecision, che a coventin a sconfondi la int.

Ca si à di lâ pas a pas: se al è vêr che di cuant che a son lis leçs di tutele a son produzions e associazions gnovis al vûl dî che chestis leçs a funzionin e no che i bêçs a van in nuie (alore l’antifurlan al va in contradizion cul so argoment 2). Ma in realtât no je vere: iniziativis e associazions a jerin za prime dal 1996. Juste cualchi esempli, cence pretindi la completece e nancje la imparzialitât: dizionari Nuovo Pirona (1936), gramatiche di Josef Marchet (1952), riviste Patrie dal Friûl (1946-agns 50 e di gnûf cun altre gjestion dai agns 80 incà), dizionari Faggin 1985, Gnovis Pagjinis Furlanis (1982-fin vuê), Radio Onde Furlane (1980-fin vuê).

Alore l’antifurlan mi disarà “viodistu alore che si faseve za tant e che lis leçs no coventin a nuie”: invezit lis leçs a coventin (v. argoment 1), se tantis iniziativis si puedin fâ in maniere spontanie une planificazion ordenade e domande une regolamentazion.

Ultin pas: clientelis e mafiis. E je vere che a son, ma compagn e o disarès di mancul che in cualsisei cjamp di finanziament public (agriculture, industrie, edilizie e v.i.): se si è cuintri des mafiis e des clientelis si aial di eliminâ i lavôrs publics e lassâ che lis stradis a ledin a remengon?

No! Si à di controlâ che i finanziaments a sedin onescj e pretindi un risultât dai bêçs publics: dal 1996 tancj a àn tacât i finanziaments sul furlan, nissun politic antifurlan no si è preocupât di controlâ ce che si faseve pardabon cun chei bêçs (di fat no lu sa e no i interesse).

Cun di plui e je une biele falope che e mostre ignorance legjislative: par vê finanziaments publics cu lis leçs sul furlan (di precîs LR 15/96, ma soredut la 482/99) une associazion e à di dimostrâ di jessi ative di almancul 3 agns: di associazions o societâts che a “vivin” sul furlan e je dome une nassude dopo che a tachin a zirâ i finanziaments publics, la SERLING soc. coop. (o soi il president) che in realtât e vîf sul so lavôr e e ven paiade par ce che e prodûs (traduzions, cors e v.i.) e cence nissun finanziament (e se cualchidun al declare che la SERLING e vîf su mafiis o che e robe bêçs publics al pues za cirîsi un avocat).

... (al va indevant)

Macadam... UN LUJO!

2008-03-27T12:22:00.000-07:00

Sul vialon di Colonia Caroya, Avenida S. Martín, al è un ristorant che pardabon no si pues fâ di mancul di visitâ: il Macadam.
E je une cjase viere tornade a meti a puest cuntune vore di bon gust e la cusine e je straordenarie: il miôr de gastronomie furlane e argjentine e creazions origjinâls. Mangjâ e murî.
Un graciis di cûr a Ana Lia e a dute la famee Uanino-Prosdocimo.

A fâ modons

2008-03-26T12:40:00.000-07:00

Une fabriche di modons a Colonia Caroya: i lavoradôrs no son plui furlans, ma la maniere di lavorâ e je propit compagne di chê dai nestris emigrants che a levin une volte sù pes Gjermaniis, cemût che si lei tes pagjinis di Pieri Menis o che si sint tes vilotis.
Dut compagn, ancje se par fortune ca no son i fruts che a lavorin.

Dut compagn... o scuasi.

Sierras Chicas

2008-03-23T06:13:00.000-07:00

Aromai o soi tornât cjase, ma mi mancjin ancjemò tantis fotos de Argjentine di meti sù tal blog.
Chel ca al è un biel zîr che nus à fat fâ Federico Uanino, ator pes culinis de provincie di Cordoba: las Sierras Chicas.

Modei di esportazion 2

2008-03-20T17:32:00.000-07:00

Ve ca la rispueste a "Modei di esportazion 1": a pene la dì dopo, domenie ai 16, pe fieste de ue, simpri a Colonia Caroya. Chei che a cjantin a son un grup di zovins argjentins: i ... Rompe Coions!
Graciis di cûr ai Arbe Garbe e a cui che ju à fats vignî in Argjentine cualchi an indaûr (tra chei altris Marc Stolf, Mauro Sabbadini, Radio Onde Furlane...). E graciis a Canal 2 di Colonia Caroya pe concession dal video (la mê machine fotografiche e veve finide la batarie!).

Puesto Viejo

2008-03-20T14:27:00.000-07:00

Un viaç indaûr tal timp: agns cincuante, cuatri cjasis pierdudis tune crosere di stardis blancjis te Basse furlane, dôs des cjasis a fasin di ostarie, une devant di chê altre. Dentri oms che a zuin di cjartis, a bevin tais e a fevelin dut par furlan. Te ostarie no dan fûr dome robe di bevi, si pues cjatâ di comprâ cualsisei robe: scovis, imprescj, vernîs, savon, scarpis.
A jentrin dentri trê forescj, Sandri, Luche e Pauli: no je la Basse e no son i agns cincuante, ma al è dut compagn.
Graciis di cûr e mandi a Diego, a Marcos e a Copetut, che nus àn fat scuvierzi Puesto Viejo.

Estancia di Caroya

2008-03-20T13:17:00.000-07:00

A pene fûr di Colonia Caroya e je la vecje Estancia Jesuitiche, un claustri che al dominave une grande tignude, lavorade di sclâfs.
Po dopo e jere stade lassade cuant che i jesuitis a jerin stâts bandîts e e jere deventade une fabriche di armis blancjis e infin tal 1878 e à dât acet ai prins migrants furlans, intant che si podessin organizâ e che a poddessin fâ sù lis lôr cjasis.
Ca a contin che i colons a vevin vût promessis che a jerin za cjasis e tiere buine e invezit no vevin cjatât nuie e e mancjave fintremai la aghe: dome a rivâ cul tren te stazion pierdude tal nuie a àn dite "Jesus Marie..." e cussì al è restât ancjemò il non de citadute a pene a Nord di Colonia Caroya "Jesús María".
Cumò cheste Estancia e je, dutun cun altris dongje, patrimoni culturâl de umanitât.

Modei di esportazion 1

2008-03-18T14:21:00.000-07:00

Sabide passade, fieste pai 130 agns di Colonia Caroya, une citadute fondade di fameis furlanis che a vignivin plui di dut de zone di Glemone e de Contee di Gurize (Cormons, Issic, Gurize...) che jere Austrie. Pe celebrazion autoritâts argjentinis e "talianis", cuntun sflochetâ di bandieris blancjis e celestis (e mi somee juste) e talianis, terminologjie che e dopre tiermins tant che "Friuli Venezia Giulia" riferît al secul XIX e nissune bandiere furlane (e nancje austriache, che par coerence, in câs si veve di metile). Cun di plui il biel câs che o podês sintî chi sot, cui furtins de scuele di chi che ur fasin cjantâ l'imni di Mameli (naturalmentri, come in Italie, cence savê lis peraulis!).

Di cui ise la colpe? Sigûr no de int di Colonia Caroya, ma ben dai politics, des istituzions e des associazions pai migrants che a completin il lôr antifurlanisim ca compagn che in Friûl, cuntun nazionalisim che al stomee (no ai la regjistrazion, e no le metarès nancje sù, dal discors risorzimentâl di un rapresentant dal Comites su la "nostra hermosa y gloriosa bandera italiana" che simpri e varà di jessi metude in esposizion tal museu dedicât ai fondadôrs de citadute furlane in Argjentine, e o ricuardi ancjemò che tancj di chei furlans a jerin imperiâi e no regnicui!)

Ma prime di disperâsi spietait il model di esportazion 2.

Cjase Copetti

2008-03-16T06:10:00.000-07:00

A Colonia Caroya, un pâr di "cuadris" indentri de Avenida San Martín, e je ancjemò une cjase des primis fatis dai colons furlans. Tai agns passâts e je stade restaurade e cumò e je un biel museu, che al mostre la sintesi tra tradizion architetoniche rurâl furlane e Argjentine.

Cualchi chilometri di Argjentine (o di Friûl?)

2008-03-15T14:25:00.000-07:00

Cualchi chilometri di strade di Colonia Caroya a un paîs plui piçul li che al è a stâ cualchi centenâr di furlans, Colonia Vicente Agüero che ducj i disin Sant Durì. Un paisaç cun cualchi diference, ma insot insot une vore familiâr. La diference gruesse e je chê dal concet di "paîs" (gjavât il fat che pe pression dal spagnûl aromai chi i disin "popul", come "pueblo"): par noaltris un paîs al è fat di cjasis dutis dongje, ca invezit e je une buine dispersion urbanistiche e dut al è intune disposizion che e somee disordenade, ma che invezit al va daûr de disvision in lots e in cuadris di grandis dimensions dadis ai prins emigrants.

El 9 de Julio

2008-03-14T20:05:00.000-07:00

Se tu ciris un puest par stâ biel in pâs, un amì mai viodût che ti pai un tai, bevi alc e contâse cence nancje incjocâsi, nancje al fos un Friûl che nol è mai stât, ma che se Diu al vûl, de sô glesie ca devant, une dì ben al sarà, a Colonia Caroya o sai il puest just: El 9 de Julio. Sente fûr e spiete, sigûr che in curt al rive un vieli furlan. Bêf cun lui a la salût di Guido e di Fabian.

Machinis a Colonia Caroya

2008-03-14T19:36:00.000-07:00

Lant ator pes stradis di Colonia Caroya, la plui part no asfaltadis, la robe che e fâs capî daurman che tu sês in Americhe a son lis machinis, massime i furgons: dongje des machinis gnovis a son di chês che a àn almancul 30, 40, 50 agns, tignudis tant ben che mai o miezis disfatis, ma masse bielis. Robe che tal consumisim de Europe no si viôt plui.

Parsore des Andis

2008-03-13T04:48:00.000-07:00

O soi a Comonia Caroya, in Argjentine, par une setemane, alore plui o mancul ogni dì o met sù alc di gnûf di chest viaç.
Par intant lis monts: passant cul avion parsore des Andis al è pardabon un spetacul straordenari di colôr e di rilêfs, a viodi lis grispis de tiere che a fasaressin content cualsisei gjeolic.

Fumate

2008-03-01T05:28:00.000-08:00

Si sveà Odisseu lusorôs,

che al durmive te tiere dai vons, e no le cognosseve,

che al jere lontan di tant timp: lu vuelzè cuntune fumate

Palade Atene, la fie di Zeus, par fâ in maniere

che no si podès cognossilu e di contâi ogni cjosse,

che no lu cognossessin la femine, i oms e i amîs,

prin che i pretendents no paiassin ogni lôr prepotence.

Par la cuâl al paron i someave dut strani,

i trois che a levin pardut e i puarts di bon ripâr,

lis cretis rimpinidis e i arbui vivarôs.

Onore ai difensori della Patria!

2008-02-15T14:10:00.000-08:00

Onore ai difensori della Patria: nella mattinata di ieri il Gran Consiglio dei Ministri convocato dal pur decaduto presidente Romano Prodi ha dimostrato la sua estrema fedeltà agli ideali che ardono nel petto di tutti noi ed ha impugnato un subdolo provvedimento della regione Friuli Venezia Giulia, dolorosamente ed ingiustamente detentrice di un’autonomia che rammenta ancor oggi l’incompleta redenzione delle terre per cui tanti eroici martiri versarono il loro sacro sangue. Vilmente, una minoranza di nemici del proprio nome e della propria razza, aveva indotto una corrotta schiera di amministratori regionali (ed è qui forse il caso di ripetersi sull’inutilità e sulla perniciosità insite nell’istituzione stessa della regione, che mina alle fondamenta l’unità nazionale?) a votare una norma che avrebbe avvelenato le menti dei nostri giovani con i cadaverici miasmi del vernacolo locale, nominato lingua solo dal clericalismo austriacante, da barbari meticci e da perversi sodomiti.

Ci auspichiamo che le massime autorità a cui ora si rimette la decisione su tale iniquità non abbiano esitazioni sulla sentenza che merita, ma non illudiamoci, ahinoi non sarà l’ultimo attacco alla purezza della nostra stirpe: i plutocratici organi del potere europeo, sudiciamente unti da mani giudee, partoriscono continuamente bacilli che, benché vilmente piccoli (nella fattispecie non sono essi stessi a nominare tali infimi dialetti lingue “minori”, “minoritarie” o “regionali”?), se trascurati possono portare all’infezione delle membra dello splendido e virile corpo che è la nostra Nazione, la nostra Patria, la nostra Razza.

Confortiamoci comunque, sapendo che coloro che si sono impegnati in questa piccola ma importante battaglia, sempre saranno al nostro fianco, fino alla definitiva vittoria sugli inferiori. Onoriamoli!

Viva l’Italia! Sevizie e morte al nemico e al traditore!

Sant Valantin furlan

2008-02-14T00:49:00.000-08:00

Aromai la mode americane di bombons e de fieste dai inamorâts si slargje pardut, ma in Friûl Sant Valantin al è patron dai epiletics: di fat il non no sientific de epilessie al è "mâl di Sant Valantin". Mi pâr che lis dôs manieris di viodi Sant Valantin no àn masse a ce fâ une cun chê altre, ma se i americans no si son inventâts dut dome par resons comerciâls e la fieste dai inamorâts e à alc di origjinâl, alore al podarès jessi che i furlans a calcolin l'inamorament une malatie dal sisteme gnervôs!
In ogni câs a Udin, in Borc di Praclûs, a son lis relicuiis dal sant e si fâs fieste grande, là che a son lis clavutis e il pan benedet in forme di grop (in cualchi altri paîs lu fasin in forme di S, mi pâr).
Stant che chest an o soi lontan, il pan no pues lâ a cjolilu e alore lu ai fat jo, cundut che magari nol è vignût propit compagn e che cu la morose sal mangjìn ancje cence benedizion.