Sant Valantin furlan
Aromai la mode americane di bombons e de fieste dai inamorâts si slargje pardut, ma in Friûl Sant Valantin al è patron dai epiletics: di fat il non no sientific de epilessie al è "mâl di Sant Valantin". Mi pâr che lis dôs manieris di viodi Sant Valantin no àn masse a ce fâ une cun chê altre, ma se i americans no si son inventâts dut dome par resons comerciâls e la fieste dai inamorâts e à alc di origjinâl, alore al podarès jessi che i furlans a calcolin l'inamorament une malatie dal sisteme gnervôs!
In ogni câs a Udin, in Borc di Praclûs, a son lis relicuiis dal sant e si fâs fieste grande, là che a son lis clavutis e il pan benedet in forme di grop (in cualchi altri paîs lu fasin in forme di S, mi pâr).
Stant che chest an o soi lontan, il pan no pues lâ a cjolilu e alore lu ai fat jo, cundut che magari nol è vignût propit compagn e che cu la morose sal mangjìn ancje cence benedizion.
3 coments:
Sandri mi sa che il boborosso de inavsion mediatiche foreste ti à zuiât un scherzut: la fieste di Sant Valantin no le an inventade i merecans ma e je dal 496, inmaneade di pape Gelasio I... Puarets, nancje no esistevin, inmò, eh eh.
Ma la clâf ise il simbul de epilessie?
Mah, la fieste di Sant Valantin e jere, ma i bombons in forme di curisin no. La clâf e il grop a son simbui magjics: vierzi e sierâ, leâ e disleâ a son tiermins tipics de tradizion popolâr in fat di curis cuintri dai striaments, e stant che la epilessie no si saveve dulà che e vignìs si pensave che e fos alc di sorenaturâl, di tignî sot cun sistemis magjics.
Ancje i bombons... ditu che ju vetin inventâts i merecans o i conazionâi di Peynet? ;-)
Post a Comment