Cuatri peraulis su la lenghe furlane

Mandi,
chest al è un blog personâl che plui di tant nol fevele di robis publichis, ma di persone o soi pardabon stuf di dutis lis declarazions vergognosis che si fasin in chescj ultins mês cuintri de tutele de lenghe furlane.
Par cui che al à voie di documentâsi e di mangjâsi il fiât il sît www.lenghe.net al à sù une biele rassegne stampe.
O viodarês che e je une grande atenzion dal cuotidian "Il Piccolo" su cheste cuistion, e alore o zonti cualchi coment.
E je une domande, che o pensi che e meretarès une rispueste publiche sintetiche e fuarte: parcè il gjornâl di Triest, citât che no sarà tocjade in nissun câs dai proviodiments sul furlan, si impegne cun tante costance intune campagne cuintri de leç su la lenghe furlane?
La domande, in maniere polemiche, le veve za fate Sergio Cecot: il Piccolo, si sa, nol à rispuindût. O pensi che al sedi il câs di tirâ fûr i interès e lis resons veris di chestis posizions: no pensi che e
sedi dome la code di un brut costum aromai interiorizât, ma ben che a sedin altris cuistions. O ai idee che par cualchidun che al volarès une regjon omogjenie e facile di aministrâ, o miôr di dominâ, une pretese di ricognossiment de diversitât e duncje de identitât e de autocussience a sedin une menace: se si da ai furlans il dirit di vê une lenghe a deventaran un popul che magari al pues pretindi ancje di decidi dulà e se a passin autostradis, liniis di alte velocitât, eletrodots e vie indevant. Un popul cussient e libar nol è comut, ancjemò di mancul se i si vûl fâ parsore une regjon inventade (il non al podarès jessi VeneziaGiulia...).
Se cualchi furlan al fevele cuintri de lenghe furlane al pues benon jessi par vie che al à une idee
di Friûl diferente de mê, o ancje, permetêtmi, par vie che al è stupit e/o ignorant e/o al à glotût e digjerît un secul e mieç di imposizion dal autolesionisim e dal autoodi, ma se lu fâs in maniere sistematiche un strument di comunicazion no furlan, al vûl dî che a son interès politics e economics avonde grues.
Ancje se dolorose, vîl e miserabile, e je une conferme che ce che o fasìn al va bande la libertât, e che al vâl la pene di lâ indevant.