Campagne eletorâl: l'Antifurlan
O fermi par un moment di meti fotos di Colonia Caroya, a son robis che a tornin a puartâmi in Friûl.
In “Friuli Venezia Giulia” a son elezions, a viodi e a sintî ciertis robis mi ven gust ancje a mi di fâ campagne eletorâl.
Lu fâs te mê maniere, analizant, cemût che o vevi anticipât timp indaûr, lis posizions dai antifurlans: cun di plui lu pues fâ cence pôre di rompi la par condicio, che tant di antifurlans a ‘nd è di dutis lis bandis.
Naturalmentri nissun no si lasse definî antifurlan: a dî a clâr che si è cuintri dal Friûl e cuintri de lenghe furlane in Friûl al è sigûr che si pierdin lis elezions. Parcè? Par vie che i furlans a son ancjemò un popul e il furlan al è une lenghe.
Alore i candidâts a son ducj pal Friûl e pal furlan e i antifurlans si platin e a doprin argoments plui fins dal vecjo “il friulano è un dialettaccio da stalla e da osteria”. A son argoments che o vin sintût te discussion de leç sul furlan e che si tornin a sintî cumò in campagne eletorâl.
E alore velu ca il Decalic dal Antifurlan (in chest post dome i prins 3 ponts).
Argoment 1.
L’antifurlan al è a pro de lenghe furlane (clâr, se di no al piert lis elezions), ma al è cuintri di une leç sul furlan.
Al è compagn di un ambientalist che al è a pro dal ambient, ma cuintri des leçs di tutele dal ambient. Informazion: o sin intune societât organizade cun struturis politichis che a controlin o a indrecin i fenomens sociâi impuartants, e la lenghe e je un fenomen sociâl impuartant. Jessi cuintri di une regolamentazion al vûl dî jessi a pro de situazion cemût che e je, li che e je une schirie di leçs e di proviodiments in pro di une varietât privilegjade, sielzude come talian uficiâl, e cuintri di dutis chês altris varietâts che a àn di sparî. Duncje se si è cuintri di une leç sul furlan si è a pro che al sparissi.
Argoment 2.
Lis leçs sul furlan a compuartin une grande cuantitât di bêçs che a van in nuie e che a podaressin lâ in ospedâi, scuelis e v.i.
La spese medie tai prins agns e je di plui o mancul 2 milions di Euros ad an: in Gales a spindin 20 milions ad an, cence nancje contâ lis spesis de scuele che a van par un altri cont. Il numar di chei che a fevelin par galês e par furlan al è plui o mancul compagn.
E je vere che a son bêçs che a podaressin lâ in ospedâi, ma ancje chei dai armaments o de culture par talian a podaressin lâ in ospedâi. Il discors al è che 2 milions di euros o ancje 20 pal belanç di une regjon a son un nuie e che invistîju ben, cun controi seris sui risultâts, te lenghe furlane al volarès dî invistîju te cressite civîl di un popul (ma a un politic antifurlan un popul civîl e cussient no i va ben, parcè che sigûr che no lu vote!)
Argoment 3.
Di cuant che a son lis leçs sul furlan e je dute une bulidure di produzions e e a son nassudis associazions che a vivin su la lenghe furlane, pal plui cun clientelis e mafiis.
Vive la ignorance e la imprecision, che a coventin a sconfondi la int.
Ca si à di lâ pas a pas: se al è vêr che di cuant che a son lis leçs di tutele a son produzions e associazions gnovis al vûl dî che chestis leçs a funzionin e no che i bêçs a van in nuie (alore l’antifurlan al va in contradizion cul so argoment 2). Ma in realtât no je vere: iniziativis e associazions a jerin za prime dal 1996. Juste cualchi esempli, cence pretindi la completece e nancje la imparzialitât: dizionari Nuovo Pirona (1936), gramatiche di Josef Marchet (1952), riviste Patrie dal Friûl (1946-agns 50 e di gnûf cun altre gjestion dai agns 80 incà), dizionari Faggin 1985, Gnovis Pagjinis Furlanis (1982-fin vuê), Radio Onde Furlane (1980-fin vuê).
Alore l’antifurlan mi disarà “viodistu alore che si faseve za tant e che lis leçs no coventin a nuie”: invezit lis leçs a coventin (v. argoment 1), se tantis iniziativis si puedin fâ in maniere spontanie une planificazion ordenade e domande une regolamentazion.
Ultin pas: clientelis e mafiis. E je vere che a son, ma compagn e o disarès di mancul che in cualsisei cjamp di finanziament public (agriculture, industrie, edilizie e v.i.): se si è cuintri des mafiis e des clientelis si aial di eliminâ i lavôrs publics e lassâ che lis stradis a ledin a remengon?
No! Si à di controlâ che i finanziaments a sedin onescj e pretindi un risultât dai bêçs publics: dal 1996 tancj a àn tacât i finanziaments sul furlan, nissun politic antifurlan no si è preocupât di controlâ ce che si faseve pardabon cun chei bêçs (di fat no lu sa e no i interesse).
Cun di plui e je une biele falope che e mostre ignorance legjislative: par vê finanziaments publics cu lis leçs sul furlan (di precîs LR 15/96, ma soredut la 482/99) une associazion e à di dimostrâ di jessi ative di almancul 3 agns: di associazions o societâts che a “vivin” sul furlan e je dome une nassude dopo che a tachin a zirâ i finanziaments publics,
... (al va indevant)
