Blog di Sandri

Karakia

2012-01-30T05:15:00.000-08:00

In Gnove Zelande e je une invocazion ai dius de tiere par cusinâ, in Catalogne e je une trasmission televisive (che si pues viodi ancje in linie), dulà che si fâs cognossi i imigrâts e la lôr cusine. Di imigrât, a 'nd è cualchidun ancje furlan.

Buinis fiestis!

2011-12-27T11:01:00.000-08:00

No je mai avonde cjocolate te vite, alore ancje se la tradizion nus dîs di mangjâ soredut altris dolçs o sieri l'an cuntun auguri di plui cjocolate ancjemò pal an che al ven!

Enrosadira

2011-11-30T13:35:00.001-08:00

Un zîr svelt tes Dolomitis ladinis: Val di Fasse, Fodom e Ampeçan, dal Cjadinaç ae Marmolade. Cul soreli bas dal Invier, lis monts sul lâ a mont dal soreli a deventin pardabon colôr di rose: e dure simpri la bramazion di re Laurin.

Infier par furlan

2011-11-25T01:30:00.000-08:00

La Divine Comedie e je dal sigûr un dai grancj classics de leterature mondiâl, ma ancje un dai tescj plui dificii di frontâ par un tradutôr.
Pierluigi Visintin, recuie, al veve vût il cûr e il cjâf di fâ cheste imprese, centrantsi su la traduzion dal Infier, za intant che o jerin daûr a voltâ la Odissee. Dopo di un pôc di lavôr di revision e di cure editoriâl ve che o presentìn cheste sô opare, par gno cont pardabon straordenarie.
Di no pierdi la presentazion, in palaç Antonin, sale Gusmani, joibe 1 di Dicembar, a 17.00, li che e sarà ancje la leture di cualchi pas fate di Checo Tam.

Frico!

2011-11-07T03:52:00.000-08:00

Ce bon che al è il frico!
Ma parcè si clamial cussì?
Par scuvierzilu o podês lei il gno articul tal ultin numar di Tiere Furlane

Apontaments

2011-10-28T14:18:00.000-07:00

Un pôcs di apontaments di no pierdi.
Sabide ai 28 di Otubar grande cunvigne a 9 di matine e dopo a 3 dopomisdì in Borc di Trep a Udin: protagonist il Grant Dizionari Talian-Furlan dal CFL2000, che cumò la ARLEF e à publicât ancje in cjarte.

Domenie a 6 di sere, in fiere a Torean, te suaze di GOOD, e sarà presentade ancje la mape cul librut in plui lenghis "Tipicamente Friulano - Une regjon di cerçâ - Una regione da assaporare - Eine Genussregion"

Lunis di sere a 9 tal centri civic di Tavagnà un apontament di no pierdi cu lis tradizions e lis sugjestions de gnot dai muarts (cun Carli Pup e Checo Tam)

Mostre dal Friûl di Magance a Colorêt

2011-10-13T09:45:00.000-07:00

L'Istitût Achil Telin al inmanee tal cjistien di Colorêt il festival "D'incjant l'incjant", par curtmetraçs cun teme ispirât di mîts, contis e flabis.
A fâi di suaze e sarà une mostre su lis figuris de tradizion popolâr furlane, cul materiâl de mape "Friûl di Magance" tornât a presentâ intune mostre e intun librut.
No stait a pierdisi la scree, cheste sabide di sere a 18.00, cun me e Luigino Peressini!

Scjalade a Malanyeu

2011-10-09T13:29:00.000-07:00

Dopo 15 mês, infin si torne a scjalâ.
Un cret calcari dut a sgrubulis, che a viodilu di sot al somee plen di presis, ancje masse facil, invezit a lâ sù si sint che lis busis e lis poiis no son dutis buinis e che pardabon al è un V grât, da pît fin insom, il massim che o pues permetimi par cumò.

A Friuli doc la mape dai prodots tipics furlans

2011-09-16T16:32:00.000-07:00

Ve ca la ultime produzion di Luigino Peressini, une biele mape dai prodots tipics furlans. Il librut che al va insiemi cun chê al è par furlan, todesc e talian. Domandaitle al ERSA, li dal tendon in place Sant Jacum par Friuli DOC!

Cala Roca Grossa

2011-08-28T12:32:00.001-07:00

Propit une biele splaze a 40 km a Nord di Barcelone, di racomandâ ancje il camping che al è li tacât.

Il salt di aghe de Plere

2011-08-19T04:07:00.000-07:00

In bande dal Tiliment, a pene fûr Divilin, segnalât ma pôc cognossût e visitât al è un biel puest cuiet, tra aghe, muscli e monts.

Tor de mont di Pieltinis

2011-08-16T10:47:00.000-07:00

Un zîr pes malghis jenfri Sauris e Cjanâl Pedarç, là che par câs si pues cjatâsi cuntun amì: un salût a Pauli!

Fusinis

2011-08-15T01:50:00.001-07:00

Altri zirut pal Montcau

2011-06-26T12:21:00.000-07:00

Dopo un an e mieç, un altri zîr par un cjanton des monts dal prelitorâl catalan. Sul orizont Montserrat.

10 agns!

2011-06-20T14:30:00.000-07:00

Augurons ae Serling, che juste 10 agns indaûr si costituive devant dal nodâr a Feagne.
10 agns di traduzions, cors, dizionaris, coretôrs ortografics, tradutôrs automatics, libris, colaborazions... e barufis, strussis e sodisfazions!

E pal avignî, chel che aromai al è deventât un sproc: "Sperìn ben!"

Justizie

2011-05-04T11:23:00.000-07:00

Par un che al lavore cui dizionaris lis definizions a son impuartantis. Il mont al va indevant e no si pues restâ leâts a criteris vieris e utopistics, si scuen stâ inzornâts, ancje cui dizionaris. Alore riviodìn chest leme.

Justizie, s.f., 1. omicidi ordenât a nivel extrajurisdizionâl di une autoritât publiche 2. strumentalizazion di notiziis no confermadis e no documentadis di atrocitâts par doprâ il terôr cun finalitât antiteroristiche
SIN: terorisim, sassinament
CONTR: justizie

Pal dì dai agrâts

2011-04-25T13:11:00.000-07:00

...

O dius creâts a nestre imagjin.

Us fasarìn une ancone

Tun bosc di arbui no salvadis,

e coronis di spîs e di papavars.

O vês dome dôs oris...

2011-04-21T09:07:00.000-07:00

...par lâ a Cjampfuarmit, in place, juste devant dal municipi a "La Patrie dal Friûl", par viodi la presentazion dal librut e de mape "1511 - Il Friûl de Joibe Grasse" e magari par fermâsi a bevi e a mangjâ alc di bon!
A presentâ a saran Luigino Peressini e Carli Pup, par fâ un viaç tal timp, indaûr di cinc secui.
Par bevi e mangjâ lassaitsi conseâ di chei de cjase: a 'nd è di lecâsi i lavris...

Si viodìn a Cjampfuarmit "A la Patrie dal Friûl"

2011-04-06T13:54:00.001-07:00

Ai 7 di Avrîl, aes 18.30 pe presentazion de mape "Friûl di Magance", cun Luigino Peressini. Dal sigûr une mape plene di magjie, ma mi àn dite che ancje il sauvignon de ostarie "A la Patrie dal Friûl" al è alc e ce e al podarà judâ a fâ sintî une clime di incjant!

3 di Avrîl

2011-04-03T14:55:00.000-07:00

27 di Fevrâr

2011-02-27T13:33:00.000-08:00

Juste 500 agns indaûr e je stade la plui grande rivolte popolâr dal Friûl: par celebrâ chest inovâl a son tantis iniziativis. Une di chês plui interessantis, almancul par me, e je la publicazion dal libri
"1511 Il Friûl de Joibe Grasse" cun tescj di Carli Pup (par furlan e par inglês) ilustrazions e une grande mape storiche di Luigino Peressini. Ca di cualchi dì a saran in librarie e za usgnot passade e je stade la prime presentazion a Morùs cuntun grant sucès!

La RAI che e ledi a trai

2011-02-24T06:35:00.000-08:00

La RAI, ancjemò une volte e à decidût di lâ cuintri de leç 482 e di no meti la programazion par furlan tal so contrat di servizi.
Si sint a dî che l'Assessôr regjonâl De Anna al viodarà di fâ alc cu la RAI.
Parcè?
No ise ore di finîle?
Se la RAI no vûl il furlan, si podarès obleâle daûr de leç, ma a son passe 10 agns che no si fâs: amen.
Fin cumò la Regjon e à fat in pratiche une opare di "coruzion": molâ bêçs ae RAI in cambi di pôcs programs, une vore cjârs rispiet a ce che a saressin, par esempli, i coscj di produzion di Radio Onde Furlane. Se di no la RAI no faseve nuie. No isal imorâl paiâ la RAI par fâ alc che, par leç, e scugnarès fâ jê di bessole cui siei bêçs?
Rispueste dai aministradôrs: pitost di no vê nuie!
Ma la alternative ae coruzion imorâl de RAI no je il nuie, e je Radio Onde Furlane, che e je buine di fâ ancje prograns televisîfs e no dome radiofonics!
In timps di crisi si scuen cjalâ i coscj e i risultâts tal spindi i bêçs publics: se la Regjon e vûl pardabon fâ alc pal furlan te radiotelevision, che e mandi a trai la RAI e che e ziri ducj chei finanziaments su Radio Onde Furlane! (che par altri e cree ocupazion e i àn a pene taiât un pocjis di jentradis)

Fevelant di lenghe furlane a Catalunya Ràdio

2011-01-24T07:40:00.000-08:00

Te radio publiche catalane che e à plui canâi che a trasmetin dut par catalan, a àn atenzion ancje par chês altris lenghis. Un cjantonut speciâl al è la trasmission "Do de llengües", tal canâl di Catalunya Informació, li che Oriol Munné al presente ogni setemane une lenghe diferente in pôcs minûts. Setemane passade e je stade la volte dal furlan: ca o podês scoltâ la trasmission.

Pan e vin, pan e vin, su la rive di Severin!

2011-01-07T09:39:00.001-08:00

Glace a Fusinis

2011-01-05T09:03:00.001-08:00

Ocjo al Nadâl!

2010-12-24T08:58:00.001-08:00

Une universitât americane e à a metût in vuardie i citadins de Spagne (e duncje ancje chei de Catalogne): Nadâl al è la dì plui dal an che a sucedin plui atacs di cûr.
Lis causis lis savìn ducj:
1) si mangje e si bêf masse
2) la tension di preparâ dut
e naturalmentri ...
3) lis barufis in famee!

La Pedra Gentil

2010-12-18T14:37:00.000-08:00

Gjite familiâr de setemane passade: a viodi la Pedra Gentil, un dai monuments megalitics plui famôs de Catalogne.
E di fat sì: la Catalogne e je dentri tra chês regjons de Europe là che lis popolazions antighis (si pense tor dai 4000 agns indaûr) a fasevin monuments megalitics, in particolâr dolmens.

In Friûl invezint no 'nd è, ma o podìn benon consolâsi cun tumui e cjastelîrs.

Un salût a Archeoninine: ce gole eh?

W LA RAI!

2010-12-14T05:28:00.000-08:00

Sot Nadâl ducj a deventin plui bogns, te Rai invezit a deventin plui cjastrons, cemût che e dimostre la publicitât che nus segnale Christian Romanin, che al è stât ancje cussi brâf di finî su Il Friuli e sul Corriere della Sera.
Ca parsore o viodês il biliet di auguris che ur ai mandât.
Par fâ l'istès o podês clicâ chi e tacâ chest test, o inventâ un alltri.

Vergognaitsi:

1) il furlan al è une lenghe che o vês l'oblic di tutelâ e no di cjoli vie;

2) la varietât linguistiche e je une ricjece de Italie.

Studiaitsi la Costituzion de Republiche Taliane e la leç 482/99 e rassegnaitsi: dopo 145 e dopo 93 agns i furlans a fevelin ancjemò par furlan.

EEEHHH?!?

Vergognatevi:

1) il friulano è una lingua che avete l'obbligo di tutelare e non di prendere in giro;

2) la varietà linguistica è una ricchezza d'Italia.

Studiatevi la Costituzione della Repubblica Italiana e la legge 482/99 e rassegnatevi: dopo 145 e dopo 93 anni i friulani parlano ancora friulano.

Conseis pal mus di Sante Luzie

2010-12-10T08:04:00.000-08:00

Chest an al è impussibil no savê ce domandâ a Sante Luzie...
Di fat ve ca dôs robis che se a fossin stadis cuant che o jeri frut mi varessin fat deventâ mat!

La mape dal "Friûl di Magance", fate di Luigino Peressini, e mostre dutis lis figuris mitichis de tradizion furlane, e daûr a son ancje schedis par cognossilis miôr e savê ce che a fasin. E no stait a fâsi imbroiâ de imagjinute ca parsore e je biele grande (un metri par setante)
Bon, ancje se no soi plui frut e je masse biele, le domandi a Sante Luzie!

"L'arbul Feliç" invezit al è un libri ilustrât pardabon biel par fruts picinins, cuntun CD li che si sint la conte recitade propit de autore, Lussia di Uanis. Une semençute, traviers des stagjons, e devente un biel miluçâr, cognossint besteutis e gjoldint di ce che i sucêt ator.

La uniche robe e je che a vegnin fûr de stamparie propit in chest moment, alore se il mus di Sante Lussie al à di cjatâju prin di lunis di matine al à di cori dret li di Friulibris!
Dopo par Nadâl si spere che al sedi ancje in chês altris librariis e si pues ancje simpri domandâ al editôr, la Serling ( 0432 649131, coop@serling.org ).

Medaiis di camote cun scuete fumade

2010-11-10T14:26:00.001-08:00

Ca al è dificil sta daûr di tantis robis, e il blog al reste un pôc par strade: par fâmi perdonâ (o speri) ve ca une ricete a pene fate.

Ingredients par 4 personis:
600 grams di camotis (cemût che a disin lis patatis dolcis a Colonia Caroya)
2 ûf
6 sedons di farine
sâl
pevar
pan gratât
spongje, par fridi
1 spi di ai
scuete fumade gratade

Si cuein lis camotis (bulidis o rustidis) si spelin e si frachin ben, fasint come une paste tenare, si zonte e si messede l'ûf, la farine, un pôc di sâl e pevar. Si messede dut ben e si cjape sù une sedon di chê paste e si fâs colâ tal pan gratât, formant une medaie taronde cu lis mans.
Si fâs cussì a sedonadis une biele cuantitât di medaiis e dopo si metin a fridi te spongje cjalde, li che si lasse l'ai che al dedi savôr.
Une volte fritis si metin tal plat e si grate parsore scuete fumade, che se e je buine cul dolç de coce, ancje cun chel des camotis e sta benon.
Pal vin di bevi dongje (e se al fos il câs di une bire...?), mi rimet come simpri ae sommelier furlane, se e à timp...

Viodìn se si viodìn sabide!

2010-10-06T06:13:00.000-07:00

No sai se o cumbinarai di lâ... ma pardabon e sarà une fieste di chês di no pierdi!

Cjiscjiei Vierts

2010-10-03T13:07:00.000-07:00

Dôs voltis ad an, une di Vierte e une di Sierade, i cjistielans dal Friûl a vierzin i lôr cjistiei al public: cussì il popul bas, dopo di vê paiât dut l'an in forme di tassis che a deventin contribûts par restaurs e mantigniments di chest patrimoni, al pues paiâ ancjemò une volte par viodi di dentri toratis e muraiis.
Chest an, cuntun pôcs di amîs, o ai vût il privileç di paiâ il dazi al paron dal cjistiel di Vilalte in persone, che, par dome 6,00 euros parom, nus à dât une grande lezion di storie: par vie de sô simpatie e ospitalitât o vin podût capî fûr di ogni dubi, come tun viaç tal timp, il spirt che al animave i vilans dal 1511...

* * *

Fûr dal câs di chest an: isal pussibil che un patrimoni coletîf, che ancje se al è di proprietât privade al ven sostignûts di bêçs publics, al sedi viert dome 2 voltis ad an e soredut dome paiant un biliet une vore plui cjâr di chel dai miôr museus di Udin, di Aquilee o di Cividât?

Benvignude Júnia

2010-08-08T08:43:00.000-07:00

Scjalade sul Cavall Bernat (di S. Llorenç)

2010-07-18T02:43:00.000-07:00

Tierce session di scjalade e ancje primis esperiencis tal colâ: tant par provâ che la cuarde e ten!

Il DOF Piçul!

2010-07-08T01:47:00.000-07:00

Un an e mieç dopo di vê publicât il DOF, ve che Serling e Informazion Furlane a metin fûr un altri dizionari: il DOF piçul. Edizion compate, cun 12.000 lemis (invezit di 40.000), ma plui svelte e plui economiche (dome € 14,00). Cun di plui al à sezions specifichis gramatiche, nons gjeografics e nons di persone. O podês domandâlu ca par pueste eletroniche o lâ a domandâlu in librarie o in cartolibrarie.

Scjalade a Montserrat

2010-07-02T01:27:00.000-07:00

Une biele scjalade a Montserrat, un dai puescj plui magjics de Catalogne, perfet par rimpinâsi sù pai crets o par cjaminâ tal mieç di mil cjampanii di piere. Un graciis di cûr a Alina e a Muntsa che mi insegnin a scjalâ!

Jude: traduzion automatiche in linie

2010-06-03T05:55:00.000-07:00

Al è za in linie di cualchi setemane il tradutôr automatic Jude: un program par voltâ dal talian al furlan che al cognòs plui di 55.000 lemis che si fletin in plui 3.400.000 formis. Al è dal 2003 che si lavore su la traduzion automatiche par furlan: il risultât, par ce che al tocje tescj formâi (comunicâts, articui, tescj burocratics, divulgatîfs e v.i.) al è za une vore bon, ma cul passâ dal timp Jude al sarà ancjemò perfezionât e al funzionarà simpri miôr: cui che al vûl provâlu a gratis al pues clicâ chi.

E un fin di setemane in Romanie

2010-06-01T03:01:00.000-07:00

A Iaşi, pes gnocis dai amîs Adriana e Andrei (casa de piatra!). La seconde citât plui grande de Romanie, e salacor la prime par ce che al fâs la culture e i studis academics, e je une vore interessante: dome intun pâr di dîs no si rive dal sigûr a capî dut ce che al coventarès, ma a restin lis sugjestions de atmosfere de Europe orientâl e la voie di tornâ cun plui timp.

Un fin di setemane a Elx

2010-05-31T13:20:00.000-07:00

Une gjite in provincie di Alicant, te comunitât valenziane, dulà che la speculazion edilizie e à fat disastris di no crodi, ma dulà che a restin ancjemò cjantons di paisaç une vore interessant. La citât stesse di Elx, plene di implants di palmis che a son rivâts ancjemò dai timps dai musulmans, lis salinis, lis dunis e lis boschetis dal litorâl che si è salvât di palaçs e complès turistics.
Un graciis a Jesús pe grande ospitalitât.

Sù pe Crete di Misdì

2010-05-19T09:50:00.000-07:00

Ve ca lis fotos di une cjaminade a pene fate sù pe Crete di Misdì, in bande de Crete Serniate (o Crete di Seregnò): un graciis e un mandi a Roser pe buine compagnie e pe ocasion di fâ chest zîr.

Il Lât dal Curnin

2010-04-04T02:28:00.001-07:00

Disint la buine Pasche, ve ca fotos de setemane passade: un zîr in bici fin sul Lât dal Curnin, a pene di là dal Tiliment, sot Forgjarie.

Aghe

2010-03-22T14:20:00.000-07:00

Pe zornade internazionâl de aghe us racomandi di lei cheste letare pastorâl scrite dal vescul de Patagonie cilene Luís Infanti Della Mora, e voltade par furlan dal amì Licio De Clara.
Par vê un messaç une vore in struc: difindêt la aghe publiche, ben universâl, e no stait a bevi aghe minerâl in butilie!

Sitges, cel i calitges

2010-03-21T13:56:00.000-07:00

"Sitges, cel i calitges" al dîs un madrigâl di Josep Carner, vâl a dî "Sitges, cîl e fumadicis" e chest fin di setemane al è stât propit cussì, cjaldut ma grîs cu la fumatele che e deve sù dal mâr, dant un aspiet no propit di cartuline a Sitges, cheste citadute de cueste catalane a Sud di Barcelone, amade di poetis e artiscj, cognossude pal modernisim, pal colôr perlin dai siei detais e, plui incà tai agns, pe sô modernitât tai costums: splazis nudistis e bon acet ai omosessuâi.

Un salût a Colonia Caroya

2010-03-15T15:21:00.000-07:00

Intant che si celebrin i 132 agns di Colonia Caroya, o mandi un salût di cûr a dute la int caroyense e a ducj i furlans di Argjentine e di dut il mont.

Zornade Furlane dai Dirits

2010-02-27T00:34:00.000-08:00

Dopo 499 agns de Joibe Grasse dal 1511, si celebre la Zornade Furlane dai Dirits: par savê di plui e par resonâ sul Friûl e sui furlans. Une zornade dute di scoltâ par Radio Onde Furlane.

Nêf

2010-01-30T12:31:00.001-08:00

Il mâr di Invier

2010-01-30T09:10:00.001-08:00

Viodi il mâr di Invier al à simpri la sô magjie: ca a son un pocjis di fotos dai "camins de ronda" dongje di S. Feliu de Guíxols, che di Istât si jemple di turiscj. E je vere che chi, compagn che te plui part de cueste dal Mediterani, la speculazion edilizie e à fat disastris, ma se si cjale bande il mâr si consolisi ancjemò.

Montcau

2010-01-17T11:37:00.000-08:00

Aromai o rivi a tignî chest blog dome cuntun ciert ritart: ve ca lis fotos di une escursionute di dôs setemanis indaûr tal parc naturâl di Sant Llorenç, sul çuc taront dal Montcau e dentri tai siei landris.

Munistîrs cistercens de Catalogne

2010-01-10T14:14:00.001-08:00

Ve ca lis fotos di un zîr di setemane passade pai munistîrs cistercens de Catalogne: Santes Creus, Poblet e Vallbona de les Monges. E un salût a Toni e Rosetta.

Anime nere

2010-01-06T10:08:00.000-08:00

Ancje se il titul al fâs someâ di no, o screi il 2010 in dolç: cuntune buine ricete a pene provade, une rielaborazion mê personâl dal coulant di cjocolate, che o batii "Anime nere".
Un platut just par chei che a àn decidût che sot fiestis no àn ancjemò metût dentri avonde caloriis!

Ingredients (par 6)

3 ûfs

90 grams spongje

75 grams di farine

35 grams zucar

90 grams di cjocolate nere

180 grams di cjocolate blancje

4 sedons di brandy

mieze bustute di levan di dolçs

Preparazion

La dì prime di fâ lis animis neris disfe la cjocolate nere a bagn marie, zonte dôs sedons di brandy e metile in 6 stampins di chei de glace e metiju tal conzeladôr, par che si disfredi, formant sîs cûrs di cjocolate nere.

Disfe a bagn marie la spongje e la cjocolate blancje, dopo messede il zucar, la farine e il ros dai ûfs. Zonte dôs sedons di brandy.

Bat il blanc dai ûfs a nêf e messede a planchin cul rest dal impast, ancje cul levan.

In stampins di flan, onts di spongje e spolverâts di farine, met l’impast fin a mieze altece, met tal mieç un cûr di cjocolate nere e cuvierç cul rest dal impast.

Met tal for a 150° par 30 minûts.

Di servî cjalts, magari compagnâts cun cualchi marmelade frede o cuntune balute di gjelât.

Su la mont Juanis

2009-12-13T11:31:00.000-08:00

Cualchi foto di un pâr di setemanis indaûr, suntun dai prins rilêfs des monts furlanis, avonde bas e une vore facil e svelt di rivâ, ma che al da un panorame pardabon speciâl, des alps al mâr.

JUDE: vuê la presentazion!

2009-11-30T23:48:00.001-08:00

Il prin progjet di traduzion automatiche dal talian al furlan: plui di 6 agns di lavôr, di linguistiche e di informatiche, ma cumò la SERLING e à un program che al sta a nivel dai tradutôrs automatics plui doprâts e cognossûts. La presentazion e je vuê, il 1 di Dicembar, a 18.00 li de Sale de Fondazion CRUP in vie Manin 15 a Udin.

La mê prime scjalade!

2009-11-22T23:39:00.000-08:00

A 34 agns sunâts, ve che mi àn fat il batisim dal cret: une paredute sportive di un 4 grât. Biele e un tic slissute (di fat si clame "Placa"): une esperience pardabon gnove.
La scjalade e je propit une sfide: cun se stes, cul cret, cu la ricercje de soluzion juste e soredut cul sens dal pericul, ancje se il pericul vêr al è une vore relatîf. Un graciis di cûr a Teresa, Alina e Anna!

In mancul di dôs setemanis al rive Jude...

2009-11-19T22:45:00.000-08:00

... par savê cui, o ce, che al è Jude, o varês di vignî martars 1 di Dicembar aes 18.00 a Udin, li de sale de Fondazion CRUP, in vie Manin 15 ...
Intant se o sês masse curiôs o podês lei alc achì.

Il Bosc de les Colomates

2009-11-08T11:42:00.000-08:00

Te Catalogne Nord (il toc di Catalogne che cumò al è in France), là che i Pireineus a dan sù dal Mediterani, al è un teritori pardabon biel e, almancul tai rilêfs, une vore cuiet e pôc batût dal turisim. Un dai puescj plui interessants al è il Bosc de les Colomates, là che i faiârs a cressin une vore dongje dal mâr.

Jenfri Peralbe e Cjadenis

2009-09-28T00:13:00.000-07:00

Un biel zîr tes monts jenfri Sapade e For di Avoltri.

Un fin di setemane a Donostia

2009-09-20T10:51:00.000-07:00

Cuindis dîs indaûr, un fin di setemane a Donostia, o Sant Sebastian: par fortune o sin colâts li propit cuant che e jere fieste de culture basche, semifinâl de regate di barcjis a rems, gare di tai dai troncs, bai tradizionâi, une minicoride incruente e une fiestone plene di int. La robe plui impressionante e je stade viodi la citât dulà che a van al mâr ducj i siorons e sioruts di spagne, intant de fieste grande, plene di manifestuts di solidarietât pai presonîrs acusâts di fâ part di ETA.

Camino de Santiago

2009-09-13T01:08:00.000-07:00

In fin: a Sant Jacum di Galizie!

Camino de Santiago - Sù e jù pe Galizie

2009-09-10T10:37:00.001-07:00

A son i ultins chilometris prin di rivâ, ducj sù e jù, ducj pardabon biei, passant tal mieç di boscs di cjastenârs, rôi e eucaliptus.

Boscs e paisuts plens di magjie, pardabon, ma la magjie plui grande e je il caratar misteriôs e ospitâl dai galizians e la fortune di bevi une queimada cun lôr.

Mouchos, curuxas, sapos e bruxas.

Demos, trasgos e diaños,

espíritos das neboadas veigas.

Corvos, píntegas e meigas:

feitizos das menciñeiras.

Podres cañotas furadas,

fogar dos vermes e alimañas.

Lume das Santas Compañas,

mal de ollo, negros meigallos,

cheiro dos mortos, tronos e raios.

Ouveo do can, pregón da morte;

fuciño do sátiro e pé do coello.

Pecadora lingua da mala muller

casada cun home vello.

Averno de satán e belcebú,

lume dos cadáveres ardentes,

corpos mutilados dos indecentes,

peidos dos infernais cus,

muxido da mar embravecida.

Barriga inútil da muller solteira,

falar dos gatos que andan á xaneira,

guedella porca da cabra mal parida.

Con este fol levantarei

as chamas deste lume

que asemella ao do Inferno,

e fuxirán as bruxas

a cabalo das súas vasoiras,

índose bañar na praia

das areas gordas.

¡Oíde, oíde! os ruxidos

que dan as que non poden

deixar de queimarse no augardente

quedando así purificadas.

E cando este beberaxe

baixe polas nosas gorxas,

quedaremos libres dos males

da nosa alma e de todo embruxamento.

Forzas do ar, terra, mar e lume,

a vós fago esta chamada:

se é verdade que tendes máis poder

que a humana xente,

eiquí e agora, facede que os espíritos

dos amigos que están fóra,

participen con nós desta Queimada.

Camino de Santiago - O Cebreiro

2009-09-09T11:09:00.000-07:00

Dopo che mi soi distrat par scrivi letaris a gjornâi talians che a varessin dome di vergognâsi, o torni a pensâ a robis bielis: si svicinìn ae fin dal Camino, si jentre inte tiere magjiche di Galizie. Al è clâr che par fâlu si passe chê che salacor e je la rive sù plui dure di dutis, il pas di O Cebreiro.

Camino de Santiago - di León al Bierzo

2009-08-27T13:09:00.001-07:00

Lant fûr de citât di León (une des jessudis plui brutis cuntun paisaç disfat di stradis e autostradis) si va indevant, passant Astorga e po dopo rivant tal Bierzo. A tornin a tacâ rilêfs avonde alts, cuntun pas di 1500 metris, e in forme graduâl ma svelte si passe dal sec de Spagne centrâl al vert di chê setentrionâl.

Camino de Santiago - León

2009-08-24T08:07:00.001-07:00

Rivant a León, sedi tal teritori che dopo te capitâl, si viodin segnâi continuâts di un autonomisim anticastilian: di fat la Castilie, che te Ete di Mieç e jere nassude come frontiere e perifarie di León, cumò invezit e je dominante.
La citât di Leon e à un domo une vore biel, cun cualchi leam di parintât cun chel di Burgos, cemût che a dimostrin ciertis struturis e soredut lis sculturis dal portâl in bande (la foto ca sot invezit e je dal portâl principâl, cuntune sene di Paradîs e Infier pardabon spetacolâr).

Camino de Santiago - Castilla - El Pàramo

2009-08-20T00:09:00.000-07:00

Dopo Burgos a tachin tapis tra chês che a spaurissin di plui i pelegrins: un desert di cjamps di forment e prâts secs, scuasi nissun arbul, scuasi nissun paîs. Par me, un dai paisaçs che mi son plasûts di plui, la estension infinide, il sens di jessi tal mieç dal nuie o dal dut.

Camino de Santiago - Castilla - Burgos

2009-08-14T11:16:00.001-07:00

Rivâ a Burgos fasint il Camino de Santiago, almancul in biciclete, al è un pôc come rivâ a une prime mete. Aromai a son passâts ducj i rilêfs de prime part e devant a son (o almancul si crôt che a sedin) tapis une vore planis, prin di rivâ aes monts de Galizie. In realtât si scuvierzarà che ancje la Meseta no je tant plane, ma intant si pues gjoldisi Burgos, une citât cuntune des catedrâls plui bielis dal mont.

E un pinsîr si scuen fâlu ancje pal Cid, il gno siôr Ruy Diaz, chel di Vivar; che propit bandît dal Re a Burgos al jere partît pes sôs plui grandis impresis.

-¡Albriçia, Álbar Fáñez, ca echados somos de tierra!-
[¡màs a gran hondre tornaremos a Castiella!]
Mio Çid Ruy Díaz por Burgos entrava,
en su conpaña sessaenta pendones,
exiénlo ver mugieres e varones,
burgeses e burgesas por las finiestras son,
plorando de los ojos, tanto avién el dolor,
de las sus bocas todos dizían una razón,
-¡Dios, qué buen vassallo, si oviesse buen señor!-

"Sta content Alvar Fagnez, che escomiâts de tiere o sin
ma in grant onôr in Castilie o tornarìn!"
Il gno Cid Ruy Diaz, a Burgos al jentrave
in so compagnie sessante bastons
a jessin a viodilu feminis e oms
borghês e borghesis a son tai barcons
vaìnt dai lôr voi, cun dut il lôr dolôr,
des lôr bocjis ducj a disin une sole orazion:
"Ah Diu, ce bon vassal, se al ves un bon siôr!"

Camino de Santiago - Rioja

2009-08-13T05:44:00.000-07:00

Lant indevant par rivâ a Sant Jacum di Galizie si rive te regjon sute de Rioja, buine di dâ i vins tra i plui innomenâts di Spagne. Prin di lâ fûr e di passâ in Castilie e je la citadute di Santo Domingo de la Calzada "donde la gallina cantó después asada": di fat e je une liende che e dîs che un zovin pelegrin todesc, che al leve ancje lui a Santiago cui siei gjenitôrs, al veve refudât lis propuestis amorosis de fie dal ustîr, cussì chê si veve svindicade fasintlu passâ par lari e lis autoritâts dal paîs lu vevin picjât. Ma stant che sant Domeni al saveve che al jere inocent lu veve fat tornâ vîf e cuant che i gjenitôrs dal zovin a jerin lâts a contâ il meracul al dean e a dî che lôr fi al jere vîf chel i veve rispuindût "Sì, al è vîf come il gjal e la gjaline che mi mangji cumò!" E alore il gjal e la gjaline rustîts che al veve tal plat a sonsaltâts sù a sgjarpedâ e a cjantâ. Di chê volte te glesie di Santo Domingo de la Calzada si tegnin simpri un gjal e une gjaline vîfs e in buine salût.

Camino de Santiago - Navare

2009-08-12T05:54:00.001-07:00

Jentrant te Navare e je une rive sù dal 10% che e dure un 3 chilometris par lâ a viodi il munistîr di Leyre, che al à une cripte pardabon singolâr, po dopo si va indevant par biei rilêfs e dilunc di une vecje linie di tren, che e mene par un fossôr ancjemò incontaminât.
Tra i puescj di no dismenteâ e je la glesie di Sante Marie di Eunate, cui siei trentetrê arcs che i zirin ator ator e une origjin misteriose, che cualchidun al volarès leade ai templârs. E simpri in Navare, a Sud di Pamplone si passe par Puente la Reina, une sorte di metropoli dai pelegrins, stant che si dan dongje plui tratis dal Camino.

Camino de Santiago - Aragon

2009-08-11T00:20:00.001-07:00

Lant indevant par rivâ a Sant Jacum di Galizie di dulà che o vevin lassât doi agns indaûr. Si tache in Aragon, in bielis valadis largjis dongje di Jaca e cuntune deviazion (dute di rive sù!) par viodi il munistîr di San Juan de la Peña, scune dal ream aragonês e zoie artistiche tra lis plui bielis di dut l'itinerari.

IL MONT VIODÛT DI CRETIS

2009-07-22T17:31:00.001-07:00

Ortigueira

2009-07-21T23:18:00.000-07:00

Un fin di setemane a Ortigueira, in Galizie, cul Festival Internacional do Mundo Celta (che bon, su la celticitât dai galizians e dal festival stes a saressin tantis robis di dî...), tun paisaç pardabon biel e
tal mieç di pivis e pividôrs di dutis lis bandis che no molavin di sunâ un moment.
Tra i grups no folcloristics i miôr di ducj a son stâts i Battlefield Band, scozês.
Gracionis a Alina, Muntsa, Martí, Vir, Dídac e Carlos che nus àn fat chest biel regâl!!!

Sant Zuan dal Landri

2009-07-20T15:41:00.000-07:00

Al è passât plui di un mês dal zîr fat cui amîs in Sclavanie, ma no jeri rivât a meti sù lis fotos tal blog (e je cuistion di dismenteâsi ator la machine fotografiche cence vê scjariât lis fotos tal portatil!). Alore vêlis ca.

Ce eroi!

2009-06-29T02:03:00.001-07:00

Al è za passât un an!

El Congost de Mont Rebei

2009-06-03T08:18:00.000-07:00

Propit sul confin jenfri Catalogne e Aragon il flum Noguera al à di cjatâ la sô strade taiant pal mieç lis monts e formant une strete pardabon spetacolâr. Tes fotos la impression di grandece e je une vore plui smamide, ma par fâsi une idee des dimensions si à di cjalâ la cuinte foto dulà che e je une altre escursioniste piçule piçule.

VIVE LA REPUBLICHE TALIANE!

2009-05-25T03:07:00.000-07:00

Cemût che si lei ancje tal blog dal Comitât 482 la Cort costituzionâl taliane e à taiât 5 dai 6 ponts che il guvier di Romano Prodi al veve impugnât te gnove leç regjonâl pe lenghe furlane. Lis reazions in pro de lenghe furlane, o speri, a saran coordenadis, jo chi mi permet une piçule riflession. Par gno cont a jerin 2 ponts une vore impuartants te leç e cumò a son stâts refudâts in maniere uficiâl: il fat che tes scuelis dal oblic l'insegnament dal furlan al fos garantît almancul par une ore par setemane e il fat che il furlan a scuele, invezit di jessi fat daûr de domande ative dai gjenitôrs, al fos fat in maniere normâl, lassant ai gjenitôrs che no volessin che i lôr fîs a imparassin il furlan (puaris creaturis!) la sielte di refudâlu.
Cumò i organisims de nestre gloriose republiche nus disin che chescj contignûts a son anticostituzionâi, autoritâts regjonâls a disin che e je vere, che la "sentence e à eliminât i ecès de leç regjonâl".
Al è clâr: une ore miserabile di furlan par setemane e un tratament di dignitât de lenghe di un popul che al somee chel de ore di religjon a son un ecès, mancul mâl che lu àn eliminât.
A chest pont si à di jessi une vore contents di vivi intune democrazie cussì madure: dopo che sot dal Ream di Italie e sot dal Fassisim la lenghe furlane e je stade escludude e discriminade, condanade a muart, finalmentri la costituzion taliane democratiche e republicane e dîs che lis minorancis linguistichis a son un valôr. Ma une Republiche e à tantis robis impuartantis di fâ, par tutelâ lis lenghis diferentis dal talian cuntune leç, dopo di une espression di principi che tant no mene di nissune bande, si pues spietâ benon 50 agns. E cuant che si rive ae leç 482/99 si le fâs in maniere che no meti nissun oblic, che no previodi nissune azion ordenade e concrete. Cun di plui, cul passâ dai agns, i finanziaments si ridusin tant che la tutele des minorancis linguistichis e je come se pardabon no fos. Infin, tal moment che la regjon Friûl - VJ e cîr di meti un fregul di ordin (cence nancje jessi masse indevant cu lis ideis), e di fissâ nivei minims, alore ben, chescj a son ecès, si à di eliminâju.
Se si va indevant a eliminâ ecès, cemût che si fâs ben e no mâl, l'unic come che al varà valôr te leç 482/99 al sarà il come 1 dal articul 1, che al dîs:

"La lingua ufficiale della Repubblica è l'italiano."

Il libri "Cors di grafie furlane"

2009-05-11T01:01:00.001-07:00

La Serling e publiche un gnûf libri: il titul al è "Cors di grafie furlane".
Un novante pagjinis di leturis, regulis, esercizis, soluzions e ancje il CD audio cu la regjistrazion dai detâts se un al à di fâju di bessôl.
Une robe biele dal libri e je che al ven fûr di une colaborazion une vore plurâl: dentri a son i contribûts, pai tescj di esemplificazion o par chei che a coventin di esercizi, di 18 autôrs che a scrivin ognidun cul so stîl e di argoments diviers; prime de publicazion 5 insegnants diferents a àn provât e miorât il percors didatic par trê agns intune vore di cors.
Altri detai dal libri al è che, daûr de linie solite de Serling, al è publicât cence domandâ contribûts publics.
Par cui che al vûl la presentazion e je sabide ai 16 di Mai, aes 18.00 li de librarie Friuli, a Udin.

Paella vegjetâl di rîs neri

2009-05-05T10:59:00.000-07:00

Ben, al jere un pôc di timp che no si fevelave di robis di mangjâ, alore us propon une ricete che e je une mê rielaborazion personâl de paella (che tant no à une sole version origjinâl, ma tantis tradizions personâls che a son consideradis sacris dai lôr estimadôrs, che, nancje a dîlu, a dispresein chês altris versions come empietâts).
Prin di dut al covente vê une padiele di "paella" (definizion pleonastiche che e vûl dî une padiele di fier une vore fin): par cusinâ cun cheste padiele si à di doprâ o lis boris bielis slargjadis, o un difusôr, di maniere che la flame no sedi masse alte e e sedi une vore ben distribuide. A son imprescj che si cjatin in cualsisei feramente o buteghe di cusine de penisule iberiche, ma tal rest dal mont no sai.

Ingredients par 6 di lôr.
600 grams di rîs neri (al è une cualitât di rîs particolâr, cul gran scûr, che cuant che si cuei al fâs la aghe nere), ve ca la foto

1 pevaron
1 melanzane avonde piçule
1 coçut
1 cevole
1 puar
2 mans di cesarons
1 man di fave
12 sparcs verts
2 spîs di ai
Vueli di ulive extravergjin

Preparazion:
Si met la padiele sul fûc e si met a scjaldâ il vueli par dislidi la cevole e cualchi toc di pevaron e l'ai a tocuts.
Si bute ancje il rîs e si lu lasse a dislidi ancje chel cualchi minût.
Si bute parsore aghe bulinte, di maniere che a 'nd vedi avonde (la misure tipiche e je di doi volums di aghe par un di rîs, ma par dî la veretât o voi un pôc a voli) e che si cuei a planchin, cun fûc medi: il rîs neri al sta di plui a fâsi di chel normâl, disìn uns 35 minûts (ma al è miôr cerçâ ogni tant par jessi sigûrs), pai puriscj de paella il rîs no si à di tocjâlu plui, ma une mieze messedade ogni tant i fâs ben, massime a chel ca che cemût che o vin dite che al è plui durut.
Intant o vin il timp di fâ lis verduris: fatis in fersorie o su la lastre a cjapin un alc di brusinât che in Catalogne al è essenziâl.
Si pues fâ il coçut taiât fin par lunc, la melanzane a fetis tarondis e cussì ancje il pevaron taiât di maniere che a restin cerclis intîrs, il puar taiât grues un dêt, cemût che si viôt te foto sot e v.i..
A man a man che la ortaie e je pronte si sale e si le met in bande. Ocjo cul sâl, di stâ misurâts, par vie che il rîs neri, almancul chel che o dopri jo, al cjape subite di salât.
Tai ultins cinc minûts che si fâs il rîs si zonte i cesarons e lis favis, che si puedin messedâ insiemi, e si met parsore il rest, di mût che al pari bon.
I ultins minûts che si cuei la "paella" si pues taponâle cuntun sfuei di gjornâl.
Par servîle si le puarte in taule te padiele, a mi mi è vignude cussì:

Par une cumbinazion cuntun bon vin o spieti une propueste de Sommelier furlane.

Un altri zirut pal Empordà

2009-04-30T03:59:00.000-07:00

Un altri zirut pal Empordà, tal Nordest de Catalogne, che si conferme une des zonis che mi plasin di plui: i scois e lis splazutis sul mâr (che o vevi za metût fotos altris voltis e cheste volte no torni a metiju); i paisuts cu lis cjasis di piere, la campagne verde e tancj monuments storics, fintremai preistorics, cemût che si viôt tes ultimis dôs fotos che a son di une tombe megalitiche di un 4.000 agns indaûr.

Mandi Cadorna

2009-03-25T06:29:00.000-07:00

In chei dîs ca a Udin si fevele di gjavâi al gjenerâl Cadorna il titul di une place di Udin (che par altri la plui part de int no sa nancje là che e je). Cualchidun fintremai al difint il puar gjenerâl, altris a disin che invezit che a lui si varès di titulâle ai muarts in vuere.
A mi no mi displasarès une biele place "Decimâts", o "Vitimis dal nazionalisim talian" o "Disertôrs di dutis lis vueris", ancje se i fasarès vignî i sgrisui a plui di cualchidun.
A mi mi fasin vignî plui sgrisui i monuments ai "Caduti" in ogni paîs dal Friûl, la retoriche viliache e criminâl che dopo di vê mandât a murî e a copâ te piês maniere milions di personis ju fâs deventâ erois par preparâ la prossime butade di martars pronts a sbudielâ e a fâsi sbudielâ par cuatri parons che ur mangjin parsore.
Un puest di visitâ par pensâ e par fâsi vignî frêt te schene al è il "Cimitiero degli Eroi" daûr de basiliche di Aquilee.

Di murî di ridi!!!

2009-03-17T08:47:00.001-07:00

Joibe passade di sere o sin stâts a teatri a viodi Garrik, l'ultin spetacul dal famôs tercet di comics catalans Tricicle: se cualchidun al passe par Barcelone o intune citât là che a laran, no si pues pierdilu (e nol è nissun probleme di lenghe, la lôr comicitât e je mimiche e internazionâl). Il biliet al è un tic cjâr ma al vâl la pene! Di murî di ridi, ancje di chei timps che a son cumò.

27 di Fevrârt: Zornade Furlane dai Dirits

2009-03-01T01:02:00.000-08:00

Simpri cun pôc timp e corint ator, ma o ai podût scoltâ almancul un pocje de programazion une vore interessante di Radio Onde Furlane pe Zornade Furlane dai Dirits: cjapant la ocasion di une des plui grandis rivoltis popolârs de storie europeane, la joibe grasse dal 1511, si à fevelât dai dirits in Friûl: no dome dirits identitaris e linguistics, ma ancje dirits pes feminis, dirit ae cjase e v.i.
E je une ativitât che Onde Furlane e puarte indevant simpri, ma in cheste zornade lu à fat in maniere specifiche: alore al tocje cjapâ la ocasion di dî graciis par dut chest lavôr, plui di dut a Carli Pup, puartevôs dal Comitât 482.

Cuatri pas a Gjirone

2009-02-24T10:16:00.000-08:00

Al è un pôc di timp che o lavori un pôc masse e no viôt puescj gnûfs, alore un blog fotografic come chest al patìs avonde di staticitât, ma almancul vinars passât o soi stât a Gjirone, une citât pardabon biele: tancj a san che e je dome pal aeropuart dai svoi ryanair e po a van jù drets a Bercelone, ma e mertarès une visite no mancul de capitâl e ancje la provincie e je une vore biele.

Crisi vere

2009-02-14T11:53:00.000-08:00

O cjapi ispirazion di un post di Norman, che al fevele de recession in Americhe.
Stant che o voi sù e jù de Catalogne al Friûl, par ce che al tocje la Spagne o viôt une crisi vere (e nere).
La robe piês e je che a jerin almancul 5 agns, vâl a dî di cuant che o passi di chestis bandis, che o viodevi pronts ducj i ingredients (e no soi une economist) e nissune linie politiche che prevignìs il disastri.
- industrie grande dipendente di parons o marcjâts forescj, che za di avonde timp e puartave i implants in paîs là che i lavoradôrs a costin di mancul;
- industrie medie e piçule che e fâs di satelit a chê grande;
- grande impuartance economiche dal turisim;
- in fin, ce che al fâs la crisi vere: speculazion imobiliâr esagjerade, acetade o fintremai sburtade in pratiche di dute la societât.

L'ultin pont al è chel plui grues: a Barcelone, intune zone normâl, i presits des cjasis a son sui 5.000 €/metri cuadrât, intai cuartîrs bruts no si va mai sot dai 3.000, ancje se l'apartament al è tal cuint plan cence assensôr e al cole jù a tocs. Si disarà "Barecelone e je Barcelone" ma cemût fasie une famee a tirâ fûr 300.000 euros par un apartament? E fûr de metropoli lis robis a son ancjemò plui claris.
A Gjirone, citât lontane 90 chilometris di Barcelone e un pôc plui picule di Udin, i presits des cjasis a son il dopli bondant che no a Udin.
A 30 km (che a son 45-60 minûts) di Barcelone, cjasis gnovis o di 10 agns (il presit al reste in pratiche compagn!), ancje bielis tal progjet, ma fatis di corse par speculâ e cun problemis di finiduris, infiltarzions di umiditât e v.i. a costin 3.000 euros al metri. Il panorame de terace de cjase li che o stoi, fin 2 agns indaûr al mostrave 17 gruis di costruzions e riis di cjasis gnovis no si sa par cui.
Si calcole che in Spagne a son 3 milions di cjasis vueidis, tantis ancje gnovis.

La robe e jere acetade in gjenerâl de societât, alore la int e faseve un mutui di plui di 900 euros al mês par 40 o 50 agns, pensant che il valôr de cjase al fos reâl o sperant che la speculazion e duràs par simpri.
Risultât: indebitament cu lis bancjis dai costrutôrs par fâ speculazion e dai privâts par comprâ la cjase. Lis bancjs naturalmentri a tornavin a invistî i bêçs dulà che ur conven, vâl a dî, in gjenar, te finance internazionâl e tai paîs in grant svilup. Par altri i privâts, cuntun mutui une vore alt a àn simpri mancul bêçs pes spesis di ogni dì, duncje la economie locâl e va une vore al mancul.

Cumò, infin, la crisi imobiliâr e je clare a ducj, no si rive a vendi plui nuie, ma i presits a restin alts, par vie che cui che al à comprât o costruît a 3.000 nol pues vendi a 1.000. La plui grande agjenzie imobiliâr di Spagne e je za falide, insiemi cuntune vore di altris (si pense che a restaran il 30% di chês che a jerin pôcs agns indaûr).

Cu la crisi imobiliâr e cole la plui grande industrie di Spagne, daûr di un destin che al jere clâr e za segnât, par une politiche economiche assurde che e à sassinât l'ambient e il paisaç e cumò e tache a dâ colps une vore dûrs a dut l'implant sociâl.
La disocupazion uficiâl e je dongje dal 15% (e no si ten cont di ducj i imigrâts regolârs che a son stâts judâts a tornâ tal lôr paîs e a ducj chei che a son clandestins e che no jentrin in nissune statistiche).

In cualchi mês al rivarà l'Istât e salacor e colarà la seconde industrie di Spagne, il turisim, par vie che inglês, todescs e francês che a varan i bêçs di lâ al mâr di chestis bandis a saran ne vore di mancul.

Nêf e glace

2008-12-28T23:15:00.000-08:00

A fuarce di mangjâ e bevi robis buinis, sot Nadâl si butin dentri masse caloriis.
Ce che i vûl alore al è un biel zîr cui schîs di fonts. Ve ca cualchi foto de schiade fate domenie a Tuixent, tai Pirineus catalans.

Viazut in Sicilie

2008-12-24T01:21:00.000-08:00

Un fin di setemane lunc a Catania, par gnocis di amîs.
La Sicilie e je pardabon biele: biele compagn che si viôt tai films dal comissari Montalbano. Se un al pense che a son dome robis de television o de popagande turistiche al à di lâ jù e al pues viodi che la Sicilie e à propit chel incjant alì.
Pecjât che cambiant il svol a Rome nus àn pierdût lis valîs, nus es àn dadis indaûr dome la dì che o tornavin sù in Catalogne, la mê ancje dute rote che al somee che i vedin dât cuintri cu la machine, e cussì, invezit di viodi lis bielecis de Sicilie, o vin ancje scugnût pierdi timp a lotâ tra la sdrume di int che e jemple lis buteghis sot Nadâl e comprâsi gnûfs ducj i vistîts par lâ a gnocis.

Un libri di fonetiche furlane!

2008-12-11T03:33:00.000-08:00

Sabide, ai 13 di Dicembar, a 17.30 li de sale Pasolini dal Palaç gnûf de Regjon a Udin, jenfri vie Sabbadini e vie Volturno, e sarà la presentazion dal libri Gramatiche Fonetiche Furlane, un repertori resonât dai fenomens fonetics che si cjatin tal complès dal sisteme linguistic furlan, par orientâsi tra varietâts e lenghe standard.
Passe 130 pagjinis che a derivin dal lavôr puartât indevant tai ultins agns te normazion de lenghe furlane.
Ae presentazion al vignarà ancje Xavier Lamuela, che za tai agns dal Otante al veve metût une fonde impuartantone te elaborazion de norme ortografiche e linguistiche dal furlan.

PS: par chei che si son stufâts di viodimi ator a presentâ i libris che mi publichin o promet che par chest an al è l'ultin!

Mi racomandi vuê dopomisdì!

2008-12-10T00:47:00.000-08:00

Li de Sale cunvignis de Fondazion Crup, aes sîs di sere. Si presente il Dizionari: se o sês bogns sigûr che sante Luzie us al puarte (jo o soi stât avonde trist chest an, e o scugnarai comprâlu!)
Par prenotâlu: coop@serling.org o tel./fax 0432649131

Un gnûf dizionari!

2008-12-02T23:45:00.000-08:00

Miercus che al ven ai 10 di Dicembar, a sîs di sere, li de Sale Cunvignis de Fondazion CRUP, in vie Manin 15, si presentarà il gnûf dizionari talian-furlan / furlan-talian de Serling e di Informazion furlane.

Al è il "fi" di cjarte dal DOF, il dizionari ortografic di Informazion Furlane, cumò riviodût, coret, slargjât e ordenât miôr: al à plui di 38.000 jentradis par bande, dut in grafie uficiâl e lenghe di riferiment.
Il presit intîr al è di 48 euros, ma se si prenote prime des fiestis o se si ven a cjolilu là de presentazion si lu paie dome 40 (informazions coop@serling.org , tel./fax 0432 64 91 31).

Odissee a Cerneglons

2008-11-26T10:17:00.000-08:00

Vinars di sere a Cerneglons, o soi a presentâ la Odissee a Cerneglons te sale de place de glesie, a 20.30, cun Cristina Cescutti, Anna Toppano e Licio De Clara che a fasaran lis leturis.

Nostalgjie

2008-11-11T14:24:00.000-08:00

A son passâts scuasi siet mês di cuant che o sin lâts cun Luche e Pauli a Colonia Caroya.
O sin stâts là pôc plui di une setemane, ma in chei dîs a son sucedudis tantis robis che mi àn cambiât la maniere di viodi. E dopo ti coventin mês par capîlu, cun musis e vôs che ti restin simpri dentri: Claudio mi mande lis fotos dal grant campionât di more caroyense che al è a pene finît, li dal Macadam... o sint di gnûf in bocje il savôr di cjocolate e sgnape dal dolç di Ana Lia, ce bon... e tes orelis el golpear di mats intal lengaç misturât dal zûc: quaternassa! dos! siet! tutalamano!
Ator pes stradis di Barcelone i buereârs a vendin ancje camotis rustidis, ancje se ur disin moniatos, e no je une volte che no pensi a Diego, a Marcos, a Marta e Daniel, che ju pues sintî ogni setemane ancje a Onde Furlane...
Ma alc al è cambiât: la nostalgjie, il mâl dal tornâ, un mâl mugnestri. Parcè aio nostalgjie di Colonia Caroya, jo che o pues lâ in Friûl cuant che o vuei, si fâs par dî, e ben ancje chel mi mancje? Parcè vê nostalgjie di alc che, par istint o parcè che nus àn insegnât cussì, o calcolìn un Friûl pierdût, un toc dal Friûl fûr dal Friûl?
Parcè che sì: parcè che tu imparis che aromai no son pierdûts lôr, che no ju vin pierdûts nô, che a son impuartants parcè che ju ai cjatâts cence vêju pierdûts e che, compagn che pardut là che o soi lât a insegnâ, mi àn insegnât di plui lôr.
E cheste e je la vite: il viaç, la cognossince, il volê ben e chel dolôr mugnestri.

Un Friûl dome di lenghe furlane? Nancje par insium!

2008-11-02T11:31:00.000-08:00

Dopo scuasi un secul e mieç che nus cirin di insegnâ il stupit sproc "siamo in Italia, si parla (solo) in Italiano", che al à fat tancj dams in Friûl e in dute Italie, e podarès vignî la tentazion di dî "In Friûl si à di fevelâ dome furlan!". Cheste seconde stupidagjine par fortune no le ai sintude: il Friûl di fat, compagn di scuasi dutis lis entitâts teritoriâls storichis de Europe, al à plui lenghis feveladis di secui dentri des sôs frontieris. Ca e je une mape cui dominis storics dai diviers grups linguistics: chel furlan in blanc, chel sloven in blu (cul rosean, il sloven des valadis de Tor e dal Nadison, il sloven dal Cuei e dal Cjars), chel todesc cun sapadin, sauran, tamavês e carinzian de Valcjanâl, chel talian cul venit dilunc de Livence, cul maranês e cul bisiac.

Si à di imparâ che la gjeografie fisiche (cjale il post di prime), la gjeografie linguistiche e la gjeografie politiche in Europe no son mai in cunvigne tra di lôr: al è il contrari di ce che nus volevin insegnâ cierts nazionaliscj, al è ce che nus volevin platâ altris nazionaliscj e oportuniscj, ma e je la veretât.
Alore ce propueste di politiche linguistiche si puedial fâ pal Friûl?
1) Viodût che lis soluzions nazionalistichis a talian vie (imposizion di une forme sole e scancelazion di chês altris) a son stupidis e criminâls, si à di fâ che une idee come "In Friûl si à di fevelâ dome furlan!" nancje no nassi.
2) Si podarès vê la tentazion di cjapâ une mape come chê parsore e dî: te zone blancje e je uficiâl dome la lenghe furlane, ta chê rosse dome la lenghe todescje, ta chê verde dome la lenghe taliane, ta chê blu dome la lenghe slovene. Nancje cheste no sarès une soluzion inteligjente, e sarès determinade di un conservatorisim sierât e di une pôre di chei altris (ancje se cheste pôre e ven piturade di "rispiet"): cussì cheste strategjie, che e somearès garantî la sorevivence dai diviers grups linguistics, in realtât e dividarès lis comunitâts, e zontarès confins su confins, no produsarès nissune cressite, e sarès pôc miôr dal nazionalisim impositîf che al ispirave la logjiche de soluzion 1). Alore ancje cheste idee chi si à di refudâle: il brut al è che e je la fonde de legjislazion taliane di cumò pe tutele des lenghis minoritariis, che par altris resons in ogni câs no da une tutele dignitose.
3) Vino voie di fâ lis robis ben? Vino tal cjâf un progjet di libertât e un Friûl che al torni a cjapâ sù i siei valôrs storics plui positîfs? Alore ancje se in formis e cun strategjiis diferenziadis daûr di ogni situazion, o vin di fâ in maniere che si slargji la cognossince di dutis lis lenghis feveladis in Friûl, cence complès e razisim.
Se il furlan, il todesc, il sloven e il talian, intes lôr diviersis varietâts, a son un patrimoni dal Friûl alore a son un patrimoni di ducj chei che i vivin parsore: se no cognòs e no pues doprâ ni gjoldi un gno patrimoni, ce mi covential?
Tal moment che ducj chei che a vivin in Friûl a capiran (e in câs a fevelaran, ma almancul capî al è un obietîf avonde facil) dutis cuatri chestis lenghis, cualsisei furlan al podarà fevelâ la sô lenghe e jessi capît di cualsisei bande dal Friûl e capî ce che i disin ducj chei altris furlans, ancje se la lenghe che a doprin e je divierse.
Chest al è un Friûl che al merete fat sù: un Friûl li che ognidun al capìs chei altris e al fevele ce che al vûl. Dome chest al sarà un Friûl libar.

Friûl: ce isal?

2008-10-29T15:00:00.000-07:00

Un post di informazion e formazion, par vie che devant de ignorance di tancj sorestants e comunicadôrs e de confusion che a butin tal cjâf de int no si sa cemût parâsi...

Alore o rispuint a une domande semplice: ce isal il Friûl?

Come cualsisei espression gjeografiche e à cualchi ombre malsigure: in pratiche e je incierte la Valcjanâl, che in cheste mape e je, ma che prin de prime vuere mondiâl e je simpri stade un cjanâl carinzian, ma che dopo de storie des opzions si è in part infurlanade e ancje intalianade. Dal Friûl al fâs part Maran, ma no Grau.

Di cuant che chest teritori al à a ce fâ cul nazionalisim talian la tindince e je stade chê di ridusi in frecuence e in dimension la nozion di Friûl: alore ve che si tache a fevelâ di concets gjeografics mai esistûts prime, che a fasin smamî il Friûl cence ricognossii nissune identitât o che i gjavin tocs, e a nassin il "Triveneto", lis "Tre Venezie", naturalmentri cu la "VENEZIA GIULIA", che ducj i volìn tant ben che mai e che daûr dal câs e corispuint dome al teritori de procincie di Triest, o ancje di chê di Gurize, o ancjemo magari di chês di Udin e Pordenon, e naturalmentri a Est e a Sud e rive fin dulà che e pues la fantasie nazionaliste talianone; ma anìn indevant, o vin ancje "Isontino" che ur permet ai gjornaliscj de RAI, dal Messaggero Veneto, dal Gazzettino e v.i. di fevelâ dal Friûl orientâl cence "ufindi" nissun (si viôt che a clamâ la int cul lôr non a àn pôre di ufindile e che ancjemò a àn tal cjâf chês bielis definizions tant che "fioi de' cani de' furlani" o "dime porco, dime can, no sta dirme mai furlan"...); e po naturlamentri la "Destra Tagliamento", magari il "Liventino", il mitic "(ricco) Nordest".

Mi disaran chescj grancj inventôrs di neogjeografie, che lis mês nozions a son indaûr, che i timps a son cambiâts che il Friûl nol covente plui, nol à sens, si à di vierzisi, no di sierâsi (cuissà parcè al somee che a vierzisi a son simpri lis sachetis de int o lis vissaris de int sassinade in vuere, intant che cui che al fâs lezions di modernitât si siere sui siei interès meschins e personâi...), ma come persone che e lavore cu lis peraulis, tra gramatichis, coretôrs e dizionaris, mi plâs di clamâ lis robis cul lôr non.

Friûl al è Friûl
nazionalist al è nazionalist
ignorant al è ignorant

E tra chescj trê concets chel che o sielç al è il prin.

PS: doman, joibe ai 30 di Otubar apontament a Sant Zorç dal Noiâr, in vile Dora a vot e mieze di sere, se si à voie di fevelâ un pôc dai contignûts dal libri "Venezia Giulia la regione inventata".

Odissee a Codroip

2008-10-20T09:44:00.000-07:00

Par sant Simon a Codroip o sarai a presentâ la Odissee e a ricuardâ il gno amì e compagn di traduzion, il Pic.

L'apontament al è par vinars 24 a vot e mieze di sere li de biblioteche di Codroip.

Cerdanya e Catalunya Nord

2008-10-18T00:01:00.000-07:00

Cumò un fin di setemane cuiet, che cussì o ai ancje il timp di meti sù lis fotos fatis dôs setemanis indaûr in Cerdanya e te Catalogne Nord, tal stât francês, ma simpri Catalogne, almancul pe storie e pai catalaniscj e pai nons des monts. De bande francese, tai paisuts di mont, la int cualchi volte e fevele ancjemò catalan, tant dispès invezit lu àn pierdût e a san dome che francês, ma pardabon, li che o sin lâts noaltris di int o 'nd vin cjatade pocje. Un altri discors diferent al sarès pes zonis plui popoladis, e ancje pe cidute di Perpinyà, dulà che la ativitât militante a pro dal catalan e je plui organizade, ma ancje la pression de lenghe uficiâl e je plui fuarte.

Vinars ai 10 di Otubar

2008-10-08T07:35:00.000-07:00

A cinc e mieze dopomisdì, li dal auditorium de sede gnove de Regjon in vie Sabadini a Udin (devant di Onde Furlane, tant par capîsi) e sarà la presentazion de gnove version dal Grant Dizionari Bilengâl Talian-Furlan dal Centri Friûl Lenghe 2000.
Une ocasion par viodisi, par capî ben un dai plui grancj progjets di politiche linguistiche dai ultins agns e ancje par vê a gratis il cd dal dizionari, plui di dut par chei che no àn une conession tant buine e svelte e che alore no puedin tirâle jù par internet!

Pal Pedró dels Quatre Batlles

2008-09-28T23:00:00.000-07:00

Une piçule escursion pes monts catalanis: pecjât pai nûi bas che no nus àn lassât gjoldi ad in plen il panorame.

Scuele Furlane

2008-08-28T03:50:00.000-07:00

Cuntun pâr di mês di ritart (ma o soi stât vie un pôc!) o segnali ancje jo il blog SCUELE FURLANE, de mestre Lorele la Morete, une des plui bravis e creativis che o vin in Friûl.

Shortbread

2008-08-22T14:48:00.000-07:00

E je vere che si pense che la cusine des isulis britanichis, gjavant salacor il salmon, no vedi masse di dî a chês altris gastronomiis plui innomenadis, ma alc di bon si cjate pardut. I biscots di spongje scozês, magari cuntun te o cualchi alc di plui fuart di bevi dongje, a son propit bogns e facii di fâ.

Ingredients:

Une part di pês di spongje (metìn 100 grams)
Mieze di zucar (50 grams)
Une e mieze di farine (150 grams; se si vûl si pues fâ ancje cuntune part di flôr e mieze di farine di rîs)
Un piç di sâl

Par fâ i biscots si impaste ben zucar e spongje, po dopo si zonte il sâl e la farine. Cuant che al è dut ben messedât si splane cul mescul la paste, che e resti avonde alte (1,5 cm). A son plui formis di shortbread, ma chê plui facile e plui comude a son i fingers, i "dêts": si taie la paste a retangui luncs plui o mancul come un dêt e si fâs parsore busutis cuntun piron o cuntun stechedincj.
Si metin in for a 180 grâts, par un 25 minûts (ma si sa, ogni for al è un tic diferent di chel altri). Si lassin disfredâ su la lastre che a son cuets.
Bogns a son bogns, ma ocjo cu lis caloriis.

Viaç di gnocis in Scozie

2008-08-19T15:23:00.001-07:00

Un biel viaç, chel in Scozie: cul avion de Catalogne a Prestwick, di li cul tren a Glasgow e a Gourock, po dopo in barcje fin a Dunoon e di li finalmentri o vin tacât a pedalâ pardabon cu lis nestris bicicletis: plui indevant o metarai la mape dal zîr, par cumò fotos e cualchi coment.
Prin di dut, cemût che si spietavin o vin cjatât tancj nûi e avonde ploie e ogni tant ancje un aiaron incuintri: ce che no mi spietavi al jere che tantis des fotos che o ai fat a vignissin tant mâl. Ca o met une selezion di chês che plui o mancul si salvin!

Di Dunoon a Tig-na-bruaich: rivis sù che nus tain avonde lis gjambis e il flât, soredut par vie che a son lis primis, ancje e je la prime ploie.

Di Tig-na-bruaich a Kilmartin: o cjatìn lis primis vacjis scozesis pelosis!!!

Di Kilmartin, un puest plen di storie (e di preistorie) pardabon di no pierdi, a Lochawe, cul biel cjistiel di.

Di Lochawe (in tren fin a Connel) a Glen Coe, passant devant dal cjistiel di Stalker.

Di Glen Coe a Fort Williams: une scurtarole da pît de mont plui alte di Scozie, par no cjapâ un stradon une vore traficât. Ae fin une grande fadie, rivis sù che no molin, clapigne e crets, cence podê gustâ par vie dai tavans e dai trements moscjins di chenti, i midges, che se si fermin plui dal timp di meti in bocje un biscot nus rivin intor a centenârs. Ma il paisaç pardabon biel, cundut che al è un implant di culture dai boscs cun tais totâi, une vore diferents di ce che, par fortune e in graciis dai nestris forestâi, al sucêt in Friûl.

Di Fort Williams in tren e traghet fin te isule di Skye, li che o cjatìn un biel soreli.

La matine a visitâ il cjistiel di Eilean Donan e po dopo jù pe isule di Skye fin tal paisut di Elgol (cuntun piçul tribût ae rose dal sgarç, simbul di Scozie).

Une gjite in barcjie a viodi fochis (che no son tes fotos) e uciei di mâr, masse nûi e moviment par che lis fotos mi vegnin di sest.

Di Elgol di gnûf sù par mieze isule fin a Struan, passant devant di un cimitieri ossianic e dongje di monts spetacolârs.

Al passe un altri pâr di dîs, un di ploie a Skye fins a Uig e di li cul traghet fin tes Ebridis esternis. Dopo de part di mont de Isule di Lewis e Harris, incrosant dute la isule o rivìn a Callanish, cui siei cerclis di piere che par gno cont no àn nuie di mancul di Stonehenge. Pôc plui a a Nord un dai Brochs (costruzion protostoriche in forme di tor taronde) conservâts miôr e un paisut di cjasis di piere nere, cul cuviert di torbe e jerbe. Lant indevant fin a Stornoway une biele foto a un biel bo scozês!

Si torne in barcje fin in Scozie grande, a Ullapool.

Dopo doi dîs di stâ fers par cjatâ une gome di biciclete gnove e montâle o tornìn a lâ sù e jù: par recuperâ dîs, cundut des rivis sù, dal aiar e tai ultins doi dîs ploie ancje fuarte, in cuatri tapis di plui di sessante chilometris in dì o fasìn dute la cueste ocidentâl che nus reste e chê setentrionâl e o rivìn a Thurso, cun tos e mâl di cuel.

O passìn tes isulis Orcadis, li che a son monuments preistorics impuartantons: lis cjasis neolitichis di Skara Brae, li che si pues viodi ancjemò i mobii di piere, e lis pieris di Brodgar e di Stennes. Ancje un pôc di soreli, ma tant aiar che mai.

Dopo doi dîs tes orcadis o rivin a Aberdeen in nâf e a pene plui a Sud a son i rescj de fuartece di Dunnottar e une cueste maraveose.

Po dopo o sin stâts cuiets, tornant bande Edimburc e Glasgow cul tren, ma o vevin za fat pôc mancul di 900 km in bici e un disnivel cumulât in rive sù di plui di 10.000 metris.

DEBITS

2008-07-17T01:18:00.000-07:00

In pôcs dîs o torni a partî par un gnûf viaç (chel di gnocis), ma prime o scuen paiâ un debit, almancul iconografic, dal ultin viaç grues che o ai fat, chel di Colonia Caroya. Par câs no jere nancje une foto cun Claudio Roya e Laura, e i lôr fîs Luca e Santino, che in Argjentine nus àn fat sintî pardabon come a cjase. Graciis di cûr!

La setemane che si cole

2008-07-10T05:36:00.000-07:00

Pe setemane che si cole, chê di sant Ermacore e Fortunât, al cole propit ben un cjapitul di storie furlane che no si pues pierdi, cuntun pocje di divulgazion sul prin cristianisim aquileiês. Un argoment pardabon interessant e se si à ocasion si scuen propit lei i libris e scoltâ lis conferencis di Renato Iacumin.

La conte dal ors, o ben: Pordenon furlan o no furlan?

2008-07-09T07:32:00.000-07:00

Fin cumò il Comun di Pordenon al jentrave te zone di tutele delimitade de leç regjonâl 15/96, restade buine ancje pe metude in vore de leç statâl 482/99.
Par un tant daûr de leç la lenghe furlane a Pordenon e jere "presinte in maniere tradizionâl e significative".
Daûr di chescj proviodiments il comun al à ancje domandât e vût une cierte cuantitât di finanziaments.
Se chest al è vêr, la decision dal Consei Comunâl a pene cjapade mi somee ilegjitime: par dimostrâlu o calcoli che une leç di tutele di une lenghe e je compagne di chê di une specie animâl o vegjetâl o di un ben artistic.
Se si fâs une leç di tutele dal ors e un comun al jentre te zone di tutele al vûl dî che l'ors li al è, e duncje chel comun al cjape finanziaments par tutelâlu.
Po dopo cuntune evoluzion legjislative, in plui dai finanziament, pal comun a son ancje cjamis e impegns di cjapâsi sù: ve che a chest pont il Comun al declare che nol vûl jessi dentri te zone di aplicazion, par vie che no i conven plui.
Ma se intal so teritori i ors a son, al scuen tutelâju daûr de gnove legjislazion: che i plasi o che no i plasi i ors a àn i lôr dirits.
A chest pont tancj aministradôrs di Pordenon mi rispuindaressin che di ors (e di furlans che a fevelin par furlan) te lôr citât a son agnorums che no 'nd è... e par cualchi aspiet al à reson. Ma se e je cussì i ents che a àn finanziât il comun di Pordenon fin cumò (Stât, Regjon...) a varessin di domandâ indaûr i bêçs dâts fin cumò, par pôcs che a sedin, fale che no si dimostri che il furlan, a Pordenon, al è estint propit tai ultins sîs mês...

Par altris considerazions su chest argoment... com482.blogspot.com