La Venezia Giulia Regione Inventata a Aquilee

A Aquilee, domenie di matine a 10.00 in municipi, presentazion dal biel libri curât di Roberta Michieli e di Giuliano Zelco e publicât de Kappa Vu. Une biele ocasion par cjatâsi cui autôrs e in câs fâur cualchi domande.
Intant une domande le fâs jo: se cualchidun al pense che la Venezia Giulia e sedi aromai une "realtât acuiside" o un fat di veretât, par plasê puedial segnâ i siei cunfins suntune mape cuntun lapis e cun cualchi criteri?
O crôt che al varà cualchi dificoltât e che al varà ancjemò plui problemis a cjatâ cualchidun altri che al dissegni cheste zone inventade cui stes confins.

Montserrat

Tal cûr de Catalogne e je une mont pardabon uniche, cualchidun al dîs che e somee une mont de Lune, par altris a somein tancj dêts di piere, par catalan si clame Montserrat: la Mont seade.

Tal mieç dai crets al è un santuari cuntune Madone Nere: cemût che a 'nd è ancje in Friûl, e je nere pes cjandelis che a piavin par vê cualchi gracie.
Il santuari di Montserrat, pal so ambient, pe comunitât benedetine che lu ten, pe scuele di cjant, pe biblioteche, pai studis e pes publicazions che si fasin, al è pardabon alc di fondamentâl pe Catalogne.




Pe famee de mê nuvice al è ancje il grant onôr di vê vût un Abât di Montserrat, Gregori Suñol.

Gnûf blog!


Intant che il Furlanist al siere pal Istât si vierç un blog gnûf: al è storiefurlane.blogspot.com
Un blog di divulgazion di nozions di storie furlane: al nas cence masse pretesis e al vûl jessi dome un imprest par cui che i interesse une sintesi di storie furlane, si sa, scrit dut par furlan.